தமிழ்ச் சமுதாயம்

தமிழநம்பி · தமிழநம்பி

ஐயா,
வணக்கம்.
நான் நமிழநம்பி.

தொழினுட்பம் படித்துப் பணியாற்றியவன்.

தமிழில் முதுகலைப் பட்டந்தாங்கி.

இதழியல் மக்கள் தொடர்பியல் படித்திருக்கிறேன்.

தமிழில் கட்டுரைகள், மரபுப்பாடல்கள் எழுதி வருகிறேன்.
மின்னிதழ்களான 'திண்ணை' , 'பதிவுகள்', 'கீற்று' போன்றவற்றில்
என் கட்டுரைகளும் பாடல்களும் வெளிவந்துள்ளன.

புதுச்சேரியிலிருந்து வெளிவரும் தமிழிலக்கண இலக்கியத் திங்களிதழ்களான
'நற்றமிழ்', 'தெளிதமிழ்' இதழ்களிலும், சென்னையிலிருந்து வெளிவரும் தூயதமிழ்த்
திங்களிதழான 'தென்மொழி'யிலும் என் பாடல்களும் கட்டுரைகளும் இடம்பெற்றுள்ளன.

முனைவர் ஆபிரகாம் தொ.கோவூரின் உண்மைக் கதைகளையும் கட்டுரைகளையும் மொழிபெயர்த்து
இருக்கிறேன். அவை மின்னிதழ்களிலும் அச்சிதழ்களிலும் வந்துள்ளன.

மரபுப்பாடல் எழுத விரும்புவோர்க்குப் பயிற்சி தந்து வருகிறேன்.

தொடர்ந்து வலைப்பதிவிலும் எழுதி வருகிறேன்.

என் வலை : http://thamizhanambi.blogspot.com

ஈகரை நடத்தும் கவிதைப் போட்டிக்குத் தமிழ்ச் சமுதாயம் என்ற பிரிவிற்குச்
'செந்தமிழ் இனமே! செந்தமிழ் இனமே!' என்ற ஒருபாடலை மட்டும் விடுக்கின்றேன்.

பாடலைக் கீழே தந்திருக்கிறேன்.

நன்றி.

அன்பன்,
தமிழநம்பி.

--------------------------------------------------------------------------------------------------------

செந்தமிழ் இனமே! செந்தமிழ் இனமே!

- தமிழநம்பி -

செந்தமிழ் இனமே! செந்தமிழ் இனமே!

முந்து தமிழும் முதனா கரிகமும்

இலக்கியச் சிறப்பும் இலக்கணச் செழுமையும்

துலக்குறு அறிவொடு இலக்குறு வாழ்வும்

நெடுவரைப் பனிமலை நெற்றியில் விற்கயல்

கொடும்புலி பொறித்த கடுமறத் திறத்தொடும்

மிகையுங் கொளாது குறையுங் கொடாது

தகைமிகு வணிகம் தரைகட லோடி

நுண்கலை வானியல் நுட்ப அறிவியல்

எண்ணியல் நாட்டியம் பண்ணிசை யாழொடும்

செழிப்புற விளங்கிய செந்தமிழ் இனமே!

அழிப்புற ஒடுக்குற இழிதாழ் வுற்றே

இரண்டகக் கொடியரால் எய்தினை வீழ்ச்சி!

திரண்டவுன் சீர்மைச் சிறப்பெலா மிழந்தனை!

இன்மொழி நாட்டொடு இன்னினந் தொழும்புறத்

தன்னலத் தமிழரே முன்னின் றனரே!

இளந்தமிழ் உளங்காள்! எண்ணுக இதனை!

துளக்கறு மறிவில் துளங்கலில் விளங்கி

நம்மொழி நம்மினம் நம்நா டுற்ற

நம்பறு மடிமை விம்முறு விலங்கு

ஒடித்து நொறுக்கிப் பொடித்திடு நோக்கில்

அடிப்படைத் திட்டம் ஆய்ந்து துணிந்து

என்றுங் கண்டிலா எழுச்சியோ டெழுக!

முன்னைப் பிழையும் உன்னித் தவிர்த்துத்

தகவில் இரண்டகம் தக்காங் கொறுத்து

இகலறுத் தினத்தார் இணைவுற எழுந்து

ஈட்டுக மீட்சி! இத்தரை

காட்டுக நந்தழிழ் கணிக்கருந் திறமே!

-----------------------------------------------

கலைவேந்தன் · Sun Feb 14, 2010 12:54 am by கலைவேந்தன்

நிலையற்றது வாழ்க்கை : நிலைபெற்றது மரணம்..!!
கலையுற்றது வறட்சி: நிலைபெற்றது மௌனம்..!!

தமிழ்ச் சமுதாயம்

தமிழ்ச் சமுதாயம்

தமிழ்ச் சமுதாயம் :: Comments

Re: தமிழ்ச் சமுதாயம்

Create an account or log in to leave a reply

Create an account

Log in