எதையும் தாங்கும் இதயம்

தீண்டும் தீண்டும் துயரம் - தினம்
தோண்டத் தோண்ட உயரும்
வேண்டும் வேண்டும் உதயம் - அது
எதையும் தாங்கும் இதயம்

வெந்து போன சோற்றுக்குள்
வேகாத அரிசிகளாய்
விடை தேடி விடைதேடி
விடை காணா மயக்கமா?
பச்சோந்தித் தோல் போலத்
தெரிந்ததோர் விடை கூட

நேற்றோர் முகமாகி
இன்றோர் நிறமானதா?

தேய்கிறதா மணித் தோழா
துயிலாத உயிர்க் குஞ்சு
விலகாத கதவின் முன்
விரல் கூட்டித் தினந்தட்டி?

நண்பர்களே பகைவரெனில்
பகைவர் தாம் நண்பர்களோ
இருட்டுகளின் தத்துவங்கள்
உறக்கத்தை மேய்கிறதா?

ஒளிந்திருக்கும் இருட்காட்டில் விகாரத்தின் எச்சங்கள்
உனக்குள்ளும் நஞ்சென்ற
நிசங்காட்டிச் சுடுகிறதா?

நிசமென்று வந்ததெலாம்
நிழல்தானோ முழுப் பொய்யோ
தொப்புள் கொடி அறுத்தெறிந்த
அப்பொழுதே தாய் பொய்யோ?

காலத்தின் சுழற்சிகளில்
அனுபவத்தின் ஆய்வுகளில்
கண்ட ஞானக் கீற்றின் முன்
நீயுந்தான் ஓர் பொய்யோ?

அய்யய்யோ நடுக்கங்கள்
அசராத தண்டனைகள்
இடு காட்டுத் தீப்பொறியாய்த்
தளிருயிரைத் தீய்க்கிறதா?

துயர் வேண்டாம் உயிர்த் தோழா
தீய்க்கட்டும் தீருமட்டும்
தெரிந்து கொள் புரிந்து கொள்
தெளிவாய் ஓர் பேரூண்மை!

இன்று தான்உன் வாழ்வமுதின்
இனிப்பான சுகப் பயணம்
உண்மையான பொற்றளத்தில்
உயிர்ச் சுவடு பதிக்கிறது!

முட்டையிருள் ஓடுடைக்கக்
குட்டிகளும் அழுமோடா
முட்டியதை உடைத்தெறிந்து
முளை விட்டு வெளியில் வா!

சத்தியங்கள் அனைத்தும் நீ
சந்தித்துத் தெளியாமல்
வாழ்வென்னும் வெண் குதிரை
விவரமுடன் ஓடுமோடா!

துயரங்கள் பெருக்கெடுக்கத்
துக்கத்தின் கணக்கெடுத்தாய்
இன்பங்கள் வேண்டுமெனில்
இரு புறமும் அலசிப் பார்!

வரவுகளும் செலவுகளும்
வாழ்வென்னும் நியதியடா
வரப் போகும் இன்பமினி
வந்தவற்றை விஞ்சுமடா!

செலவுகளில் சிதையாமல்
சொர்க்க வழி தினந்தேடு
வரவுகளை எதிர் நோக்கி
வலுவாக நீச்சலிடு!

ஓடுடைத்து இம்முறை நீ
உனக்காகப் பிறக்கின்றாய்
வீரனாகப் பிறக்கின்றாய்
விழவில்லை மரணத்துள்!

தீண்டும் தீண்டும் துயரம் - தினம்
தோண்டத் தோண்ட உயரும்
வேண்டும் வேண்டும் உதயம் - அது
எதையும் தாங்கும் இதயம் !


புகாரி

எல்லாம் எனக்கு புதிதாக இருக்கிறது அண்ணா