அனியூரிஸம் என்றால் என்ன? அறிகுறிகள் என்ன?

``அனியூரிஸம் என்பது மூளைக்குச் செல்லும் ரத்த நாளத்தின் சுவரில் உண்டாகும் பலவீனத்தால், பலூன் போன்று வீக்கம் ஏற்பட்டு அதில் இருந்து ரத்தம் வெளியேறுவது. அனியூரிஸம் இருக்கும் நபருக்கு அந்த வீக்கமானது கிட்டத்தட்ட மூன்று முதல் ஐந்து மில்லிமீட்டர் வரும் வரை, எந்த அறிகுறிகளையும் வெளிப்படுத்தும் வாய்ப்புகள் குறைவு. சில நேரங்களில் ப்ளிஸ்டர் அனியூரிஸம் (Blister aneurysm) அதாவது சிறிய அனியூரிஸமாக இருந்தால், ரத்தம் வெளியேறி பாதிப்பை ஏற்படுத்த வாய்ப்புள்ளது.

அதே போல் ஜயன்ட் அனியூரிஸம் (giant aneurysm) அதாவது பெரிய அனியூரிஸம், கண் நரம்பு போன்ற இடங்களில் வந்தால் சுலபமாகத் தெரிந்துகொள்ள முடியும். அதிகமான ரத்தம் வெளியேறுவதன் மூலம்தான் அனியூரிஸம் என்று தெரிய வரும்.

அனியூரிஸம் என்பது எந்த வயதினருக்கு வேண்டுமானாலும் வரலாம். ஆனால், 50 முதல் 60 வயதை உடையவர்கள்தான் அதிகம் பாதிக்கப்படுவர். ரத்த அழுத்தம், சிறுநீரக பாதிப்பு, சர்க்கரை நோய் இருபவர்களுக்கு அனியூரிஸம் ஏற்படுவதற்கு வாய்ப்புகள் அதிகம். அனியூரிஸம் உள்ளவர்களுக்கு குறிப்பிட்ட நேரத்தில் அதிகமான ரத்த அழுத்தத்தால் அந்த வீக்கத்தில் இருந்து சிறிது சிறிதாக ரத்தம் வெளியேறும். அப்போது, பாதிக்கப்பட்டவர்களுக்கு தலைவலி, கண் நரம்பு பாதிப்பு போன்ற விளைவுகள் ஏற்படலாம்.

அனியூரிஸத்தைத் தடுப்பதற்கு முதலில் ரத்த அழுத்தத்தை கட்டுக்குள் வைக்க வேண்டும். அதற்கு முக்கியமாக உணவில் கட்டுப்பாடு தேவை. அதாவது உப்பு, அசைவ உணவு போன்ற வற்றை அளவோடு எடுத்துக்கொள்ள வேண்டும். சிலருக்கு பிறவியிலேயே அனியூரிஸம் இருக்கலாம். வெயின் ஆஃப் கேலன் அனியூரிஸம் (Vein of galen aneurysm) என்பது, சிறு குழந்தை களுக்கு ஏற்படும் அனியூரிஸம். அதாவது, சிலருக்கு கர்ப்ப காலத்தில் குழந்தை வயிற்றில் இருக்கும்போதே உண்டாகும் ஒலிகளின் மூலம் அனியூரிஸம் இருப்பதைக் கண்டறிய முடியும். சில நேரங்களில் குழந்தை பிறந்த பின்பு ஏற்படும் சில அறிகுறிகள் மூலம் கண்டறிவதுண்டு.

இந்த அனியூரிஸம் ஆண், பெண் இருபாலருக்கும் சமமான ஒன்று. ஆனால் பெண்களைவிட ஆண்களுக்குதான் அனியூரிஸம் அதிகமாக பாதிக்கிறது. ஆண்களுக்கு ரத்த அழுத்தம் அதிகமாக இருப்பதுதான் காரணம். மன அழுத்தத்தால் உண்டாகும் அதிக ரத்த அழுத்தத்தாலும் இப்படி ஏற்பட வாய்ப்புள்ளது".

அனியூரிஸம் குறித்து சென்னையைச் சேர்ந்த இதயநோய் மருத்துவர் ரெபாய் ஷோகதாலியிடம் கேட்டோம்... ``அனியூரிஸம் எங்கு வேண்டுமானாலும் வரலாம். அதாவது, அயோட்டான் என்று சொல்லக்கூடிய பெரிய தமனி, மூளைக்குச் செல்லும் ரத்த நாளங்கள் போன்றவற்றில் ஏற்படலாம். முக்கியமாக இதயத்துக்குள்ளேயும் அனியூரிஸம் வரலாம். ஆனால், முக்கியமாக மாரடைப்பு வந்தவர்களுக்குதான் இதய அனியூரிஸம் ஏற்பட வாய்ப்புள்ளது.

மூச்சு வாங்குதல், நெஞ்சழுத்தம், அதிக ரத்த அழுத்தம் போன்றவை, இதய அனியூரிஸத்தின் முக்கிய அறிகுறிகள். அனியூரிஸம் இருப்பதைத் தெரிந்துகொண்டாலே சிகிச்சை மூலம் சரி செய்துகொள்ள முடியும். தற்போதுள்ள நவீன தொழில்நுட்பத்தில் அறுவைசிகிச்சை இல்லாமலும் இதை சரிசெய்ய முடியும். இறுதி நிலை வரை அதை கவனிக்காமல் சிலர் செய்யும் தவறுகளால் தான் மரணம் ஏற்படுகிறது. ஆனால் ஆரம்பத்திலேயே பாதிப்புக்கு ஏற்ப மருத்துவரை அணுகினால், அனயூரிஸத்தை சரிசெய்வது எளிது” என்கிறார்.

குறிச்சொற்கள் #அனியூரிஸம் #Aneurysm #அன்யூரிசம்