தலையில் காயத்துடன் சென்ற சிறுவனுக்கு தையலுக்கு பதில் `Fevikwik

பணியிலிருந்த மருத்துவர், ஊழியர்கள் காயம் ஏற்பட்ட இடத்தில் தையல் போட்டு சிகிச்சை அளிப்பதற்கு பதிலாக `ஃபெவிகுவிக்' பூசி ஒட்டி அனுப்பிவைத்ததாகச் சொல்லப்படுகிறது.

தெலங்கானா மாநிலம், ஜோகுலம்பா கத்வேல் மாவட்டத்திலுள்ள அலம்பூர் நகரைச் சேர்ந்தவர் வம்சி கிருஷ்ணா. விவசாயியான இவருக்கு பிரணவ் என்ற மகன் இருக்கிறான். அண்மையில் விளையாடும்போது கீழே விழுந்ததில், சிறுவன் பிரணவுக்குக் கண் புருவம் பகுதியில் காயம் ஏற்பட்டிருகிறது. அதனால் சிகிச்சைக்காக வம்சி கிருஷ்ணா தன்னுடைய மகனை, அந்தப் பகுதியிலுள்ள தனியார் மருத்துவமனைக்கு அழைத்துச் சென்றிருக்கிறார். அங்குப் பணியிலிருந்த மருத்துவர், ஊழியர்கள் காயம் ஏற்பட்ட இடத்தில் தையல் போட்டு சிகிச்சை அளிப்பதற்கு பதிலாக `ஃபெவிகுவிக்' பூசி ஒட்டி அனுப்பிவைத்ததாகச் சொல்லப்படுகிறது.

கண் புருவத்தில் தையல் போட்டு சிகிச்சை அளிக்காமல், அந்தப் பகுதி ஒட்டப்பட்டிருப்பதால் சந்தேகமடைந்த வம்சி கிருஷ்ணா, மகனை மற்றொரு மருத்துவமனைக்கு சிகிச்சைக்காக அழைத்துச் சென்றார். அங்கு பிரணவைப் பரிசோதித்த மருத்துவர்கள், அவருடைய புருவத்தை `ஃபெவிகுவிக்' மூலம் ஒட்டியிருப்பதைக் கண்டறிந்தனர். மேலும், உடனே அதை அறுவை சிகிச்சை செய்து அகற்ற வேண்டும் என்றும் தெரிவித்திருக்கின்றனர்.

அதைத் தொடர்ந்து, மருத்துவர்கள் அறுவை சிகிச்சை செய்து சிறுவனின் கண் புருவம் பகுதியைச் சரி செய்திருக்கின்றனர். இந்த அதிர்ச்சி சம்பவம் தொடர்பாக சிறுவனின் தந்தை வம்சி கிருஷ்ணா, போலீஸிடம் புகாரளித்தார். அதன்பேரில், அங்கு விரைந்த போலீஸார், சுகாதாரத்துறை அதிகாரிகள் சம்பந்தப்பட்ட மருத்துவமனைக்குச் சீல்வைத்தனர். தொடர்ந்து இந்தச் சம்பவம் தொடர்பாக வழக்கு பதிவுசெய்து விசாரணை மேற்கொண்டுவருகின்றனர்.

ஃ பெவி குவிக் ஒட்டிய கைகளுக்கு, ஃ பெவி குவிக் மூலம் 
கைகளை ஒட்டினால்தான், வருங்காலத்தில் இம்மாதிரி 
சிகிச்சை செய்யமுடியாது.