தமிழகம், புதுச்சேரியில் கனமழை தொடரும்- வானிலை ஆய்வு மையம்

டிசம்பர் 04, 2020 10:44

சென்னை:

சென்னை வானிலை ஆய்வு மையம் கூறியிருப்பதாவது:

வங்கக்கடலில் நிலைகொண்டுள்ள ஆழ்ந்த காற்றழுத்த
மண்டலத்தால் தமிழகம், புதுச்சேரியில் கனமழை தொடரும்

சென்னை, திருவள்ளூர், காஞ்சிபுரம், வேலூர், ராணிப்பேட்டை,
விழுப்புரம், கடலூர், நாகை, திருவாரூர், தஞ்சை, புதுச்சேரி,
காரைக்கால், கள்ளக்குறிச்சி, நாமக்கல், சேலம், அரியலூர்
மாவட்டங்களிலும் கனமழை தொடரும்.

ஆழ்ந்த காற்றழுத்த தாழ்வு மண்டலத்தால் 8 இடங்களில்
அதி கனமழை பதிவாகி உள்ளது. கொள்ளிடம் 36 செ.மீ.,
சிதம்பரம் 34 செ.மீ., பரங்கிப்பேட்டை 26 செ.மீ., மணல்மேடு,
குறிஞ்சிப்பாடியில் தலா 25 செ.மீ., திருத்துறைப்பூண்டியில் 22,
சீர்காழி, குடவாசலில் தலா 21 செ.மீ., ராமேஸ்வரத்தில் 20 செ.மீ.,
பேராபூரணி, மஞ்சளாறு, புவனகிரி, மயிலாடுதுறையில்
தலா 19 செ.மீ. மழை பதிவாகி உள்ளது.

கறம்பக்குடி, பட்டுக்கோட்டையில் தலா 17 செ.மீ.,
மதுக்கூரில் 16 செ.மீ., ஸ்ரீமுஷ்ணத்தில் 15 செ.மீ. மழை
பதிவாகி உள்ளது.

மாலைமலர்

புரெவி புயலால் விமான சேவைகள் ரத்து-
திருவனந்தபுரம் விமான நிலையம் 8 மணி நேரம் செயல்படாது
-
திருவனந்தபுரம்:

புரெவி புயல் வழவிலுந்து ஆழ்ந்த காற்றழுத்த தாழ்வு மண்டலமாக மாறி, ராமநாதபுரம் அருகே நிலைகொண்டுள்ளது. இதன் காரணமாக டெல்டா மாவட்டங்களில் கனமழை பெய்து வருகிறது. நீண்டநேரமாக ஒரே இடத்தில் காற்றழுத்த தாழ்வு மண்டலம் நீடிப்பதால் கனமழைக்கான தொடர வாய்ப்பு உள்ளது. ராமேஸ்வரத்தில் கடுமையான சூறைக்காற்று வீசுகிறது. கடல் மிகவும் கொந்தளிப்பாக காணப்படுகிறது.

காற்றழுத்த தாழ்வு மண்டலம் மேலும் நகர்ந்து கேரளாவை நோக்கி செல்லும் என கணிக்கப்பட்டுள்ளது. இதனால் கேரளாவில் புயல் எச்சரிக்கை விடுக்கப்பட்டு, முன்னெச்சரிக்கை நடவடிக்கைகள் மேற்கொள்ளப்பட்டுள்ளன. திருவனந்தபுரம் விமான நிலையத்தில் இன்று காலை 10 மணி முதல் விமான சேவைகள் ரத்து செய்யப்பட்டன. மாலை 6 மணி வரை விமான நிலையம் மூடப்படுகிறது. அவசர தேவைகளுக்கு மட்டுமே விமானங்கள் இயக்கப்படும் என தெரிவிக்கப்பட்டுள்ளது.

புயல் மற்றும் கனமழை எச்சரிக்கை காரணமாக திருவனந்தபுரம், கொல்லம், பத்தனம்திட்டா, ஆலப்புழா, இடுக்கி ஆகிய மாவட்டங்களில் இன்று பொதுவிடுமுறை அறிவிக்கப்பட்டுள்ளது.

வலுவிழந்த புரெவி புயல் கேரள மாநிலம் வழியாக செல்லும் வரை, இந்த முன்னெச்சரிக்கை நடவடிக்கைகள் மற்றும் எச்சரிக்கைகள் தொடரும் என கேரள முதல்வர் பினராயி விஜயன் கூறி உள்ளார்.

மாலைமலர்

கனமழையால் வெள்ளக்காடாக மாறியது சென்னை... வாகன ஓட்டிகள் கடும் அவதி
-

-
சென்னை:

புரெவி புயல் வலுவிழந்து ஆழ்ந்த காற்றழுத்த தாழ்வு மண்டலமாக மாறி உள்ளது. இந்த காற்றழுத்த தாழ்வு மண்டலத்தால் சென்னை நகர் மற்றும் புறநகர் பகுதிகளில் கனமழை கொட்டுகிறது. நேற்று இரவு வரை விட்டு விட்டு மிதமான மழை பெய்த நிலையில் இன்று அதிகாலை முதல் சென்னை மற்றும் சுற்றுவட்டார பகுதிகளில் விட்டு விட்டு கனமழை பெய்து வருகிறது.

சென்னையில் திருவல்லிக்கேணி, ராயப்பேட்டை, தி நகர், கிண்டி, திருவான்மியூர், வண்ணாரப்பேட்டை, அம்பத்தூர், ஆவடி, பட்டாபிராம், கொளத்தூர், குரோம்பேட்டை உள்ளிட்ட பல்வேறு இடங்களில் பரவலாக மழை பெய்து வருகிறது.

இதனால் சென்னை வெள்ளக்காடாக மாறியது. தாழ்வான பகுதிகள் தண்ணீரில் மிதக்கின்றன. சாலைகளில் வெள்ளம் கரைபுரண்டு ஓடுவதால் வாகன ஓட்டிகள் கடும் அவதிக்குள்ளாகினர்.

வங்கக்கடலில் நிலைகொண்டுள்ள ஆழ்ந்த காற்றழுத்த தாழ்வு மண்டலம் இன்று காலை 3 மணி நேரமாக நகராமல் ஒரே இடத்தில் நீடிப்பதால் மிக கனமழை தொடர வாய்ப்பு உள்ளது என வானிலை ஆய்வு மையம் தெரிவித்துள்ளது.

சென்னை, தூத்துக்குடி, திருநெல்வேலி, கன்னியாகுமரி, தென்காசி, இராமநாதபுரம், சிவகங்கை, புதுக்கோட்டை, திருச்சி, தஞ்சாவூர், திருவாரூர், நாகபட்டிணம் , கடலூர், காஞ்சிபுரம், செங்கல்பட்டு, திருவண்ணாமலை, விழுப்புரம் மாவட்டங்களில் அடுத்த ஆறு மணி நேரத்தில் ஒரு சில இடங்களில் மிக கன மழை பெய்யக் கூடும் என வானிலை ஆய்வு மையம் எச்சரித்துள்ளது. இதனால் அந்த பகுதி மக்கள் பாதுகாப்பாக இருக்கும்படி அறிவுறுத்தப்பட்டுள்ளது.

மாலைமலர்