நாளை முதல் 3 நாட்களுக்கு லாரிகளில் ஜவுளி லோடு ஏற்றமாட்டோம்: உரிமையாளர்கள் சம்மேளனம் அறிவிப்பு

நாமக்கல்:

லோடுகளை முறைப்படுத்த கோரி நாளை முதல் 3 நாட்கள்
லாரிகளில் ஜவுளி லோடு ஏற்றுவதில்லை என கலெக்டரை
சந்தித்த பின்  மாநில செயலாளர் தெரிவித்துள்ளார்.  

தமிழகத்தில் இருந்து வடமாநிலங்களுக்கு தினமும் சுமார்
3,000 லாரிகள் ஜவுளிலோடு ஏற்றிச் செல்கிறது.  

ஈரோடு, திருப்பூர், பல்லடம், சோமனூர் ஆகிய பகுதியில் உள்ள
ஜவுளி ஆலைகளில் இருந்து சேலம், நாமக்கல் மாவட்டத்தை
சேர்ந்த ஆயிரத்துக்கும்  மேற்பட்ட லாரிகள் ஜவுளி லோடு ஏற்றி
செல்கிறது.

சராசரியாக 25 டன் ஜவுளி லோடு லாரிகளில் ஏற்றி செல்லப்படுகிறது.
ஜவுளி லோடு புக்கிங்  செய்யும் ஏஜென்டுகள் மற்றும் லோடு
உரிமையாளர்கள் அரசின் விதிமுறைகளை மீறி அதிக உயரம் மற்றும்
அகலமாக லோடுகளை லாரிகளில் ஏற்றி  அனுப்புகிறார்கள்.

இதனால், லாரி உரிமையாளர்களுக்கு ஒவ்வொரு
மாவட்டம் மற்றும் மாநிலங்களில் போக்குவரத்து
துறையினர் அபராதம் விதிக்கின்றனர்.

ஜவுளி லோடுகளை முறைப்படுத்தக்கோரி நாளை (5ம்தேதி)
முதல் 3 நாட்கள் (7ம்தேதி) வரை ஜவுளி லோடுகளை
ஏற்றுவதில்லை என மாநில லாரி  உரிமையாளர்கள் சம்மேளனம்
முடிவு செய்துள்ளது.   இதற்கான துண்டு பிரசுரம் மற்றும் லாரி
உரிமையாளர்களுக்கான விழிப்புணர்வு நோட்டீசை  நேற்று
நாமக்கல்லில் மாநில லாரி உரிமையாளர்கள் சம்மேளன
செயலாளர் வாங்கிலி வெளியிட்டார்.  

பின்னர் அவர் கூறுகையில், ‘‘3.8 மீட்டர்  உயரம், 2.6 மீட்டர் அகலம்,
12 மீட்டர் நீளம் உள்ளபடி, ஜவுளி லோடுகளை ஏற்றவேண்டும் என
அரசு விதிமுறை இருக்கிறது. ஆனால், ஜவுளி லோடு  உரிமையாளர்கள்
மற்றும் லாரி புக்கிங் செய்பவர்கள் இதை பின்பற்றாமல் லோடு
ஏற்றுகின்றனர்.

இதனால் லாரி உரிமையாளர்களுக்கு ஆன்லைன் மூலம்
போக்குவரத்து துறையினர் அபராதம் விதிக்கின்றனர். தொழிலில்
உள்ள பல்வேறு  நெருக்கடியில், அந்த அபராதத்தை லாரி
உரிமையாளர்களால் செலுத்த முடியவில்லை. எனவே, ஜவுளி லோடு
ஏற்றுவதை முறைப்படுத்த வலியுறுத்தி  நாளை முதல் 3 நாட்கள்
ஜவுளி லோடுகளை லாரிகளில் ஏற்றமாட்டோம்.

இதுகுறித்து நாமக்கல் கலெக்டர், எஸ்பி எங்களை அழைத்து பேசினர்.  
அவர்களிடம் எங்களது முடிவில் மாற்றம் இல்லை என கூறிவிட்டோம்’’
என்றார்.

தினகரன்