நடிகை பாலியல் புகாா்: பாலிவுட் இயக்குநா் அனுராக் காஷ்யப்பிடம் 8 மணி நேரம் விசாரணை

-

மும்பை: பாலியல் புகாருக்கு ஆளான பாலிவுட் இயக்குநா் அனுராக் காஷ்யப்பிடம் மகாராஷ்டிர காவல்துறையினா் வியாழக்கிழமை 8 மணி விசாரணை நடத்தினா்.

‘இமைக்கா நொடிகள்’ தமிழ் திரைப்படத்தில் வில்லனாக நடித்தவா், பிரபல இந்திப்பட இயக்குநா் அனுராக் காஷ்யப். அவா் மீது பாலிவுட் நடிகை பாயல் கோஷ், மும்பை வொ்சோவா காவல் நிலையத்தில் பாலியல் புகாா் அளித்தாா். 2013-ம் ஆண்டு படவாய்ப்பு கேட்டு சென்றபோது, அவா் தன்னை பாலியல் ரீதியாகத் துன்புறுத்தியதாக பாயல் கோஷ் அந்தப் புகாரில் கூறியிருந்தாா்.

அதன் அடிப்படையில், அனுராக் காஷ்யப் மீது காவல்துறையினா் கடந்த வாரம் முதல் தகவல் அறிக்கை பதிவு செய்தனா். ஆயினும் போலீஸாா் தொடா் நடவடிக்கை எதுவும் எடுக்கவில்லை என்ற குற்றச்சாட்டை பாயல் கோஷ் முன்வைத்தாா்.

அதன் பின்னா், இந்திய குடியரசு கட்சித் தலைவரும் மத்திய சமூக நீதி மற்றும் அதிகாரமளித்தல் துறை இணையமைச்சருமான ராம்தாஸ் அத்வாலேவுடன் இணைந்து பத்திரிகையாளா்களைச் சந்தித்த நடிகை கோஷ், ‘காஷ்யப் கைது செய்யப்பட வேண்டும்’ என்று வலியுறுத்தினாா். இது தொடா்பாக மகாராஷ்டிர ஆளுநா் பகத்சிங் கோஷியாரியை கடந்த செவ்வாய்க்கிழமை நேரில் சந்தித்து மனு அளித்தாா்.

இந்த நிலையில், விசாரணைக்கு ஆஜராகுமாறு காஷ்யப்புக்கு காவல்துறையினா் புதன்கிழமை அழைப்பாணை விடுத்தனா். அதனடிப்படையில், தனது வழக்குரைஞருடன் மும்பை வொ்சோவா காவல் நிலையத்தில் வியாழக்கிழமை காலை 10 மணிக்கு காஷ்யப் ஆஜரானாா்.

இதுகுறித்து காவல்துறை அதிகாரி ஒருவா் கூறுகையில், ‘விசாரணைக்காக காவல் நிலையத்தில் காலை 10 மணிக்கு இயக்குநா் காஷ்யப் ஆஜரானாா். அவா் சில ஆவணங்களுடன் வந்திருந்தாா். அவா் வந்த சிறிது நேரத்தில் அவருடைய வழக்குரைஞரும் காவல்நிலையம் வந்தாா். இயக்குநரிடம் காவல்துறையினா் 8 மணி நேரம் விசாரணை நடத்தினா். பின்னா் அவா் காவல்நிலையத்திலிருந்து புறப்பட்டுச் சென்றாா்’ என்று கூறினாா்.

தினமணி

இந்த வழக்கு குறித்து அனுராக் காஷ்யப்பின் வழக்குரைஞர்
வெளியிட்டுள்ள அறிக்கையில் கூறப்பட்டுள்ளதாவது:

ஒரு படத்தின் படப்பிடிப்புக்காக 2013 ஆகஸ்ட் மாதம் முழுக்க
அனுராக் காஷ்யப் இலங்கையில் இருந்தார். இதற்கான
ஆவணங்கள் காவல்துறையினரிடம் அளிக்கப்பட்டுள்ளன.

இந்த வழக்கு தொடர்பாக என்ன தீர்ப்பு வந்தாலும்
அனுராக் காஷ்யப் மீது அவதூறு பரப்ப வேண்டும் என்கிற
நோக்கத்தில் பாயல் கோஷ் செயல்பட்டுள்ளார்.

தவறான தகவல் தந்த அவர் மீது நடவடிக்கை எடுக்கவேண்டும்
என்று அறிக்கையில் கூறப்பட்டுள்ளது.

தினமணி