'பி.எம்., கேர்ஸ்' நிதிக்கு 5 நாளில் ரூ.3,076 கோடி வழங்கியது யார்?'

புதுடில்லி:
''பிரதமர் மோடியால், கொரோனா நிவாரணத்திற்காக ஏற்படுத்தப்பட்ட, 'பி.எம்., கேர்ஸ்' அறக்கட்டளைக்கு, ஐந்து நாட்களில், 3,076 கோடி ரூபாய் நன்கொடை வழங்கியது யார்,'' என, முன்னாள் மத்திய நிதியமைச்சர், ப.சிதம்பரம் கேள்வி எழுப்பியுள்ளார்.

நேற்று, பி.எம்., கேர்ஸ் அறக்கட்டளை வலைதளத்தில், கடந்த, 2019 - 20ம் நிதியாண்டின் தணிக்கை செய்யப்பட்ட நிதி நிலை அறிக்கை வெளியிடப்பட்டது. இது குறித்து, ப.சிதம்பரம் வெளியிட்டுள்ள அறிக்கை:

பி.எம்.,-கேர்ஸ் நிதி நிலை அறிக்கையில், இந்தாண்டு, மார்ச், 27 - 31 வரையிலான, ஐந்து நாட்களில், 3,076 கோடி ரூபாய் நன்கொடை பெற்றுள்ளதாக தெரிவிக்கப்பட்டுள்ளது. இதில், உள்நாட்டினர், 3,075.85 கோடி ரூபாய்; வெளிநாட்டினர், 39.67 லட்சம் ரூபாய் வழங்கியுள்ளதாக கூறப்பட்டுள்ளது.

மேலும், அறக்கட்டளை துவக்கப்பட்ட போது, 2.25 லட்சம் ரூபாய் இருந்ததாகவும், 35 லட்சம் ரூபாய் வட்டி கிடைத்ததாகவும் வலைதளம் கூறுகிறது. இருந்தும், நன்கொடை வழங்கிய, உள்நாட்டினர் மற்றும் வெளிநாட்டினரின் பெயர்கள் அதில் இல்லை. பெருந்தொகையை நன்கொடையாக அளித்தோர் பெயர்களை, பி.எம்., கேர்ஸ் வெளியிடாதது ஏன் என, தெரியவில்லை.

ஒவ்வொரு தொண்டு நிறுவனமும், குறிப்பிட்ட அளவுக்கு மேல் பெறும் நன்கொடை தொடர்பாக, அவற்றை வழங்கியோர் பெயர்களை வெளியிட வேண்டும் என, சட்டம் கூறுகிறது. இதில், பி.எம்., கேர்ஸ் அறக்கட்டளைக்கு மட்டும் விதி விலக்கு அளிக்கப்பட்டுள்ளதா... நன்கொடை தந்தோர் பெயர்களை வெளியிட, அறக்கட்டளை ஏன் அஞ்சுகிறது.இவ்வாறு, அதில் கூறப்பட்டுள்ளது.

கடந்த மாதம், பி.எம்., கேர்ஸ் நிதியை, தேசிய பேரிடர் நிவாரண நிதியத்தில் சேர்க்கக் கோரிய வழக்கில், 'அந்த அமைப்பு ஓர் அறக்கட்டளை என்பதால், அது பெறும் நன்கொடையை, தேசிய பேரிடர் நிவாரண நிதியத்தில் சேர்க்க முடியாது' என, உச்ச நீதிமன்றம் தீர்ப்பு வழங்கியது.

ஏற்கனவே, என்.டி.டி.வி., நிறுவனம், தகவல் அறியும் உரிமைச் சட்டத்தின் கீழ், நன்கொடையாளர் விபரங்களை கோரியதற்கு, 'பி.எம்., கேர்ஸ், பொது நிறுவனம் அல்ல என்பதால் தகவல் தர முடியாது' என தேசிய தகவல் ஆணையம் மறுத்து விட்டது.

அதே சமயம், அறக்கட்டளையின் தணிக்கை செய்யப்பட்ட நிதி நிலை அறிக்கையில், பி.எம்., கேர்ஸ் சார்பாக, பிரதமர் அலுவலக அதிகாரிகள் கையெழுத்திட்டது ஏன் என்ற கேள்வி எழுந்துஉள்ளது.

இதுகுறித்து, மத்திய அரசு அதிகாரி ஒருவர் கூறியதாவது: அறக்கட்டளை தலைவராக, மோடி உள்ளார். அவருக்கு, அறக்கட்டளை நிர்வாக குழுவில், மூன்று உறுப்பினர்களை நியமிக்கும் அதிகாரம் உள்ளது. அதன் அடிப்படையில், பிரதமர் அலுவலக அதிகாரிகள், நிதி நிலை அறிக்கையில் கையெழுத்திட்டுஉள்ளனர். இவ்வாறு அவர் கூறினார்.

தினமலர்

அதெல்லாம் சொல்ல முடியாது