சச்சின் பைலட் மனு குறித்து உயர்நீதிமன்றம் முடிவெடுக்கலாம்: உச்சநீதிமன்றம் அனுமதி

புதுடில்லி: ராஜஸ்தானில், சச்சின் பைலட் உள்ளிட்ட
19 அதிருப்தி காங்கிரஸ் எம்.எல்.ஏ.,க்கள் தாக்கல் செய்த மனு
மீது உயர்நீதிமன்றம் முடிவெடுக்கலாம் என உச்சநீதிமன்றம்
தெரிவித்துள்ளது.
ஆனால், அந்த தீர்ப்பு உச்சநீதிமன்றத்தின் இறுதி தீர்ப்புக்கு
கட்டுப்பட்டது எனவும் கூறியுள்ளது.

காங்கிரஸ் ஆட்சி நடக்கும் ராஜஸ்தான் மாநிலத்தில், முதல்வர்
அசோக் கெலாட்டிற்கு எதிர்ப்பு தெரிவித்து, சச்சின் பைலட்
போர்க்கொடி துாக்கினார். இதையடுத்து, அவரது துணை முதல்வர்
மற்றும் மாநில காங்கிரஸ் தலைவர் பதவி பறிக்கப்பட்டது.

'நோட்டீஸ்'

தொடர்ந்து, 'சச்சின் பைலட் மற்றும் அவரது ஆதரவு எம்.எல்.ஏ.,க்கள்,
18 பேரை தகுதி நீக்கம் செய்ய வேண்டும்' என, காங்கிரஸ் கொறடா
அளித்த புகாரின்படி, 19 பேருக்கும் விளக்கம் கேட்டு, சபாநாயகர்
ஜோஷி, 'நோட்டீஸ்' அனுப்பினார்.

இதை எதிர்த்து,19 பேரும், ராஜஸ்தான் உயர் நீதிமன்றத்தில் மனுதாக்கல்
செய்தனர்.இந்த வழக்கை விசாரித்த உயர் நீதிமன்றத்தின், இரண்டு
நீதிபதிகள் அமர்வு, நாளை வரை, 19 பேர் மீதும், எந்த நடவடிக்கையும்
எடுக்க, சபாநாயகருக்கு தடை விதித்தது.

இந்நிலையில், ராஜஸ்தான் உயர் நீதிமன்றம் விதித்துள்ள தடையை
எதிர்த்து, சபாநாயகர் சி.பி.ஜோஷி, உச்ச நீதிமன்றத்தில் மேல்முறையீடு
செய்துள்ளார்.

மனுவில், 'சபாநாயகர் அதிகாரத்தில், யாரும் தலையிட முடியாது.
ராஜஸ்தான் உயர் நீதிமன்றம் பிறப்பித்த உத்தரவு, சட்ட விரோதமானது.
அதனால், உயர் நீதிமன்ற உத்தரவுக்கு தடை விதிக்க வேண்டும்' எனக்
கூறியுள்ளார்.

தலையீடு கூடாது

இந்த வழக்கு உச்சநீதிமன்றத்தில் விசாரணைக்கு வந்த போது, சபாநாயகர்
சி.பி. ஜோஷி சார்பில் ஆஜரான வழக்கறிஞர் கபில் சிபல் வாதாடுகையில்,
தகுதி நீக்க நோட்டீஸ் மீது பதிலளிக்க காலக்கெடுவை நீட்டிக்க வேண்டும்
என உயர்நீதிமன்றம் உத்தரவிட முடியாது.

இது நீதித்துறையின் வரம்பில் வராது. சபாநாயகர் எடுக்கும் தகுதி நீக்க
நடவடிக்கைகளில் நீதிமன்றம் தலையிட முடியாது. தகுதி நீக்கம் குறித்து
எந்த முடிவும் எடுக்காத நிலையில், நீதிமன்றம் தலையிடக்கூடாது.

இந்த காலகட்டத்தில் நீதிமன்றம் எந்த உத்தரவும் பிறப்பிக்க முடியாது.
பதிலளிக்க காலக்கெடுவை நீட்டிக்கவும், எந்த உத்தரவும் பிறப்பிக்க
முடியாது என நீதிமன்றம் கூற முடியாது என தெரிவித்தார்.

நடவடிக்கை ஏன்

அப்போது நீதிபதிகள், எந்த காரணத்திற்காக தகுதி நீக்க நடவடிக்கை
எடுக்கப்படுகிறது என கேள்வி எழுப்பினர்.

அதற்கு கபில் சிபல் அளித்த பதில்: எம்.எல்.ஏ.,க்கள் கட்சி கூட்டத்தில்
பங்கேற்காமல், கட்சி விரோத நடவடிக்கையில் ஈடுபட்டனர்.
அவர்கள் ஹரியானாவில் ஓட்டலில் தங்கியுள்ளனர். அவர்களை தொடர்பு
கொள்ள முடியவில்லை. கட்சிக்கு எதிராக, நம்பிக்கையில்லா தீர்மானம்
கொண்டு வந்துள்ளனர் என தெரிவித்தார்.

இந்த தருணத்தில் தகுதி நீக்க நடவடிக்கை எடுக்கலாமா அல்லதுவேண்டாமா
என்பது குறித்து நீதிமன்றம் தெரிவிக்க வேண்டும். எம்.எல்.ஏ.,க்களுக்கு எதிராக
தகுதி நீக்கம் செய்ய முடியுமா என ஆராய அனுமதிக்க வேண்டும் எனவும்
கூறினார்.

தீர்ப்பு வழங்கலாம்

இதனை தொடர்ந்து நீதிபதிகள், அதிருப்தி எம்.எல்.ஏ.,க்கள் தொடர்ந்த
வழக்கில் உயர்நீதிமன்றம் தீர்ப்பு வழங்கலாம். ஆனால், அந்த தீர்ப்பை
அமல்படுத்தக்கூடாது. அதிருப்தி எம்.எல்.ஏ.,க்களுக்கு சபாநாயகர் அனுப்பிய
நோட்டீசுக்கு எதிராக விசாரணை தொடர்பாக உயர்நீதிமன்றத்தின் வரம்பு
குறித்து சபாநாயகர் எழுப்பிய கேள்வி உச்சநீதிமன்றத்தில் உள்ளது.

இந்த விவகாரம் சிக்கலானது. அதுகுறித்து ஆழமாக விசாரணை நடத்த
வேண்டும் என தெரிவித்தனர்.

அப்போது, சபாநாயகர் தரப்பில், இந்த விவகாரத்தில் உச்சநீதிமன்றம்
முடிவெடுக்கும் வரை சச்சின் பைலட் உள்ளிட்ட 19 எம்.எல்.ஏ.,க்கள் மீது
தகுதி நீக்க நோட்டீஸ் தொடர்பாக நடவடிக்கை எடுக்கப்படாது என
தெரிவித்தார்.

சரியா

நீதிபதிகள் மேலும் கூறுகையில், ஜனநாயகத்தின் எதிர்காலம் குறித்து
முக்கிய கேள்வி எழுந்துள்ளது. சபாநாயகர் மூலம் தகுதி நீக்க நோட்டீஸ்
அனுப்பி எதிர்ப்பு குரல்களை  அடக்குவது சரியா?

இது குறித்து முடிவெடுக்கப்பட வேண்டும் என தெரிவித்தனர்
-
தினமலர்