கொரோனாவை கட்டுப்படுத்த கற்றுக்கொடுக்கும் 4 நாடுகள்

புதுடில்லி:
உலகம் முழுவதும் பெரும் அச்சுறுத்தலை ஏற்படுத்தி வரும் கொரோனா வைரசை
அழிக்க முடியாமல் உலக நாடுகள் கடுமையாக போராடி வருகின்றன. ஆனால்,
தைவான், தென்கொரியா, ஜெர்மனி, ஐஸ்லாந்து ஆகிய நான்கு நாடுகள்
கொரோனாவை முற்றிலுமாக அழிக்க முடியாவிட்டாலும் சில நடவடிக்கைகள்
மூலமாக அதனை கட்டுப்படுத்த முடியும் என காட்டுகின்றன. அந்த நாடுகள்
மேற்கொண்டுள்ள நடவடிக்கைகள் என்ன.. வாங்க பார்க்கலாம்..

தைவான்:

சார்ஸ் தொற்று பரவிய காலத்தில் மிகவும் பாதிக்கப்பட்ட நாடுகளில் ஒன்றாக
தைவான் இருந்தது, 181 பேர் இந்த தொற்றால் உயிரிழந்தனர். ஆனால்,
கொரோனாவின் பிறப்பிடமான சீனாவின் கடற்கரையிலிருந்து
வெறும் 180 கி.மீ தூரத்தில் இருந்தாலும், இதுவரை 395 பேர் மட்டுமே பாதிக்கப்பட்டு,
6 பேர் பலியாகியுள்ளனர். சீனாவில் கொரோனா பரவத்தொடங்கியதாக உலக
சுகாதார அமைப்பு டிச.,31ம் தேதி எச்சரித்த அடுத்த நாளான ஜனவரி 1 முதல்
வூஹானில் இருந்து தைவான் வந்த அனைத்து பயணிகளையும் சோதனையிடத்
தொடங்கியது.

2003ம் ஆண்டில் சார்ஸ் பரவலுக்கு பின்னர் அந்நாட்டு அரசு, மத்திய தொற்றுநோய்
மையத்தை அமைத்திருந்தது. அதனை ஜன.,20ம் தேதி முதல் செயல்படுத்த தொடங்கியது.
அனைத்து தனிமைப்படுத்தப்பட்ட நபர்களையும் தைவான் அதிகாரிகள், தொடர்ந்து
கண்காணித்து வந்துள்ளனர்.

அந்நாட்டில் முதல் பாதிப்பு வந்தப்பிறகு மேலும் தீவிரமாக்கினர். 14 நாட்கள் தனிமைப்படுத்தப்பட்ட
விதியை மீறியதற்காக 10,000 டாலர் அபராதமும் விதிக்கப்பட்டது. சமூக இடைவெளியை
பின்பற்றும் வழிமுறைகளும் நடைமுறையில் உள்ளன. இவ்வாறான கடுமையான கட்டுப்பாடுகளால்
தைவான் நாடு, கொரோனா பரவலை கட்டுப்படுத்தி வருகிறது.

தென் கொரியா:

2015ம் ஆண்டில் மெர்ஸ் தொற்றால் மோசமாக பாதிக்கப்பட்ட தென் கொரியா,
கொரோனா வைரசை கட்டுப்படுத்த டிரைவ்-த்ரூ சோதனைகளை
அறிமுகப்படுத்துவதன் மூலம் சோதனையை துரிதப்படுத்தியது.

நாடு முழுவதும் அமைக்கப்பட்ட 500 சோதனை கிளினிக்குகளுக்கும்
கூடுதலாக டிரைவ்-த்ரூ சோதனை மையங்கள் இருந்தன. அதன் மூலம்
தென்கொரியாவின் மக்கள்தொகையில் அரை மில்லியனுக்கும்
அதிகமானவர்களை சோதிக்க முடிந்தது.

ஜனவரி 3 முதல் வூஹானில் இருந்து வரும் மக்களைத் சோதனையிடுவதிலும்
தனிமைப்படுத்துவதிலும் இது முன்னோக்கி இருந்தது.

ஜெர்மனி:

ஜெர்மனியில் கொரோனா தொற்றால், 1.38 லட்சத்துக்கும் அதிகமானோர்
பாதிக்கப்பட்டிருந்தாலும், அதன் இறப்பு விகிதம், மற்ற ஐரோப்பிய அண்டை
நாடுகளை விட மிகக் குறைவாக இருந்து வருகிறது. இதுவரை, ஜெர்மனியின்
இறப்பு எண்ணிக்கை 4,105 ஆக உள்ளது. அதே நேரத்தில் ஜெர்மனியுடன்
ஒப்பிடுகையில் இங்கிலாந்தில் பாதிப்பு எண்ணிக்கை குறைவாக இருந்தாலும்,
இறப்பு எண்ணிக்கையில் மூன்று மடங்கிற்கும் அதிகமாக உள்ளது.

பெருமளவு கட்டுப்படுத்தியதற்கு ஜெர்மனியின் சுகாதார அமைப்பே காரணம்.
கொரோனா பாதித்த நோயாளிகளுக்கு 12,000 படுக்கைகள் தேவைப்படும்
பொழுது, 1,47,000 படுக்கைகளை தயார்ப்படுத்தி வைத்திருந்தது.

இது தேவையை விட 12 மடங்கு அதிகமாகும். அதனாலேயே பிரான்ஸ், ஸ்பெயின்,
இத்தாலி போன்ற நாடுகள் தங்கள் நோயாளிகளை சிகிச்சைக்காக ஜெர்மனிக்கு
அனுப்பியது.

ஐஸ்லாந்து:

ஐஸ்லாந்தில் 1,700க்கும் மேற்பட்டோர் கொரோனாவால் பாதிக்கப்பட்டாலும்,
இதுவரை 8 உயிரிழப்புகளை மட்டுமே கொண்டுள்ளது. அந்நாடு சோதனையிட்டதில்
50 சதவீதத்திற்கும் அதிகமானோருக்கு எந்த அறிகுறிகளும் காட்டவில்லை.

முதல் 6 பேர் உறுதிப்படுத்தப்பட்ட பிறகு, இத்தாலியில் இருந்து வந்த அனைத்து
பயணிகளுக்கும் தனிமைப்படுத்தப்பட்ட நடவடிக்கைகளை விதித்தது. அவர்களின்
தொடர்புகளைக் கண்டறிந்து, போலீஸ் படையைப் பயன்படுத்தி அவர்கள்
தனிமைப்படுத்தப்பட்ட மண்டலங்களில் தங்கியிருப்பதை உறுதிசெய்தது.

கொரோனாவை கட்டுப்படுத்த ஒவ்வொரு நாடும் பல்வேறு விதமான நடவடிக்கைகளை
கையாண்டு வருகின்றன. அவற்றில் மிக முக்கியமானது துரித நடவடிக்கையே.
அறிகுறிகளை கண்டறிந்து அவர்களின் தொடர்புகளை தனிமைப்படுத்தி தொடர்ந்து
கண்காணிப்பது, ஊரடங்கும், சமூக விலகலை பின்பற்றுவது என நடவடிக்கைகள்
மாறுபடலாம்.

ஆனால், மக்களின் ஒத்துழைப்பும் இல்லையெனில் மேற்கூறிய நாடுகளிலும் கூட
கொரோனாவை கட்டுப்படுத்துவது சாத்தியமாகி இருக்காது.

தினமலர்