ரஜினிகாந்த் வீட்டுக்கு பாதுகாப்பு குறைப்பு வேண்டுகோளை ஏற்று போலீஸ் நடவடிக்கை

**ayyasamy ram** · **ayyasamy ram** Sun Mar 01, 2020 5:10 am

சென்னை,

சென்னையில் கடந்த ஜனவரி மாதம் நடந்த ‘துக்ளக்’ பொன் விழாவில், நடிகர் ரஜினிகாந்த் பெரியார் குறித்து தெரிவித்த கருத்துக்கு திராவிடர் கழகம், தந்தை பெரியார் திராவிடர் கழகம் உள்ளிட்ட பல அமைப்புகள் எதிர்ப்பு தெரிவித்தன.

இதனையடுத்து சென்னை போயஸ்கார்டனில் உள்ள ரஜினிகாந்த் வீட்டின் அருகே போராட்டங்கள் நடைபெற்றன. இதையொட்டி போலீஸ் சப்-இன்ஸ்பெக்டர் தலைமையில் 5 போலீசார் அவரது வீட்டின் அருகே பாதுகாப்பு பணியில் அமர்ந்தப்பட்டனர்.

இந்தநிலையில் தனது வீட்டுக்கு போலீஸ் பாதுகாப்பு வழங்கப்பட்டதை ஆடம்பரமாகவும், அருகில் வசிப்பவர்களுக்கு சிரமமாக இருப்பதாகவும் ரஜினிகாந்த் கருதுகிறார். எனவே போலீசாரை அழைத்து, நீங்கள் வழக்கமான மக்கள் பணியை செய்யுங்கள். எனது வீட்டுக்கு பாதுகாப்பு வேண்டாம் என்று ரஜினிகாந்த் கேட்டுக்கொண்டதாக கூறப்படுகிறது.

துணை கமிஷனர் சந்திப்பு

இதனையடுத்து சென்னை போலீஸ் கமிஷனர் ஏ.கே.விஸ்வநாதன் உத்தரவின்பேரில் சென்னை உளவுப்பிரிவு போலீஸ் துணை கமிஷனர் சு.திருநாவுக்கரசர் நேற்று ரஜினிகாந்தை அவரது இல்லத்தில் சந்தித்து பேசினார்.

அப்போது அவரிடம், ‘உங்களுக்கு போலீஸ் பாதுகாப்பு வழங்கியதை ஆடம்பரமாக நினைக்க வேண்டாம். சட்டம்-ஒழுங்கு பிரச்சினை ஏற்படாமல் தடுப்பது எங்களுடைய பணி’ என்று துணை கமிஷனர் வலியுறுத்தியதாக தெரிகிறது.

பாதுகாப்பு குறைப்பு

இருப்பினும் போயஸ்கார்டனில் மறைந்த முதல்-அமைச்சர் ஜெயலலிதாவின் வேதா இல்லத்துக்கும், தன்னுடைய இல்லத்துக்கும் செல்லும் பாதையில் 3 போலீசார் ஏற்கனவே பாதுகாப்பு பணியில் இருப்பதால், எனது இல்லத்துக்கு 2 போலீசார் மட்டும் பாதுகாப்புக்கு இருந்தால் போதும் என்று ரஜினிகாந்த் கேட்டுக்கொண்டதாக கூறப்படுகிறது.

பின்னர் துணை கமிஷனர் சு.திருநாவுக்கரசர் போயஸ்கார்டனில் போலீஸ் பாதுகாப்பை ஆய்வு செய்து புறப்பட்டு சென்றார். இந்தநிலையில் ரஜினிகாந்த் வேண்டுகோளை ஏற்று அவருடைய வீட்டில் போலீஸ் பாதுகாப்பு குறைக்கப்பட்டது. ஏற்கனவே ஆண் மற்றும் பெண் தனியார் காவலாளிகள் பாதுகாப்பு பணியில் ஈடுபட்டு வருகிறார்கள் என்பது குறிப்பிடத்தக்கது.

தினத்தந்தி

Guest · Guest Sun Mar 01, 2020 12:31 pm

சட்டம் கொண்டு வர வேண்டும்.யாருக்கும் இனிமேல் பாதுகாப்பு இல்லை என.முக்கியமாக சினிமா நடிகர்கள், எம்.எல்.ஏ/எம்.பி.களுக்கு.
மக்களுக்கு மட்டுமே பாதுகாப்பு. வருமா சட்டம்?