2 புதிய ஏவுகணை தாங்கிக் கப்பல்கள் சீன கடற்படையில் சேர்ப்பு

china சீனாவின் 052டி ரக போர்க்கப்பல் (கோப்புப் படம்).
--------------------
-
சீன கடற்படையில் 2 புதிய ஏவுகணை தாங்கி போர் கப்பல்கள்
சேர்க்கப்பட்டுள்ளன.
இதுகுறித்து சீன அரசுக்கு சொந்தமான குளோபல் டைம்ஸ்
பத்திரிகை வெளியிட்டுள்ள செய்தியில், தலியானில்
052டி ரகத்தைச் சேர்ந்த 2 ஏவுகணை தாங்கி போர் கப்பல்கள்,
சீன கடற்படையில் சேர்க்கப்பட்டன.

இதன்மூலம், சீன கடற்படையில் இருக்கும் அத்தகைய கப்பல்களின்
எண்ணிக்கை 20ஆக உயர்ந்துள்ளது எனத் தெரிவிக்கப்பட்டுள்ளது.
இத்தகைய ரக போர் கப்பல்கள், கடலில் மிக விரைவாகவும், மிக
அதிகமான தூரத்துக்கும் பயணிக்கக் கூடியவை. கடலில் விமானந்
தாங்கி போர் கப்பல்களுக்கு அரணாகவும் இக்கப்பல்கள் செல்லும்.

சீனா தனது கடற்படையை நவீனமாக்கும் பணியில் தீவிரமாக
ஈடுபட்டுள்ளது. சீன கடற்படைக்காக விமானம் தாங்கி கப்பல்
உள்ளிட்டவை அந்நாட்டால் கட்டமைக்கப்பட்டு வருகின்றன.

சீனக் கடற்படையில் ஏற்கெனவே ஒரு விமானம் தாங்கி போர்
கப்பல் பயன்பாட்டில் உள்ளது. இன்னொரு விமானம் தாங்கி
போர் கப்பல், சீன கடற்படையால் பரிசோதிக்கப்பட்டு வருகிறது.

மேலும், 3ஆவது விமானம் தாங்கி போர் கப்பலையும் சீனா
கட்டமைத்து வருகிறது. இதேபோல், இன்னும் சில ஆண்டுகளில்
5 முதல் 6 விமானம் தாங்கி போர் கப்பல்களை கட்டமைப்பதற்கு
சீனா திட்டமிட்டுள்ளது.

சீனாவிடம் 052சி ஏவுகணை தாங்கி போர் கப்பல் பயன்பாட்டில் உள்ளது.
அந்த வரிசையில், 052டி ரக கப்பல் கட்டமைக்கப்பட்டுள்ளது.

இந்த கப்பலில் ரேடார் சாதனங்கள், புதிய ஆயுதங்கள், சாதனங்கள்
உள்ளிட்டவை பொருத்தப்பட்டுள்ளன.

அதேநேரத்தில் அமெரிக்காவிடம் 60 ஏவுகணை தாங்கி போர்
கப்பல்கள் உள்ளன. ரஷியாவிடம் 15 ஏவுகணை தாங்கி போர்
கப்பல்கள் உள்ளன.

தினமணி