வேலூர் பாராளுமன்ற தொகுதியில் தேர்தல் ரத்து - தேர்தல் ஆணையம் அதிரடி

**ayyasamy ram** · **ayyasamy ram** Tue Apr 16, 2019 8:10 pm

பதிவு: ஏப்ரல் 16, 2019 19:53
-
பல கோடி ரூபாய் கைப்பற்றப்பட்ட வேலூர் பாராளுமன்ற
தொகுதியில் தேர்தல் ரத்து செய்யப்படுவதாக தேர்தல்
ஆணையம் இன்றிரவு அதிரடி அறிவிப்பை வெளியிட்டுள்ளது.
-
வேலூர் பாராளுமன்ற தொகுதியில் தேர்தல் ரத்து -
தேர்தல் ஆணையம் அதிரடி
-
சென்னை:

வேலூர் பாராளுமன்ற தொகுதியில் தி.மு.க. வேட்பாளராக
அக்கட்சியின் பொருளாளர் துரைமுருகனின் மகன்
கதிர் ஆனந்த் நிறுத்தப்பட்டார்.

வேலூர் தொகுதியில் முதல்கட்ட பிரசாரம் தொடங்கிய சில
நாட்களிலேயே துரைமுருகன், அவரது கல்லூரிகளில் வருமான
வரித்துறையினர் திடீர் சோதனையில் ஈடுபட்டனர்.

இதில் ரூ.10.50 லட்சம் பணம் சிக்கியது. அந்த பணத்துக்கு
கணக்கு காட்ட முடியும் என்று துரைமுருகன் கூறினார்.

கடந்த 1-ந்தேதி காட்பாடியில் தி.மு.க. பிரமுகர்கள் வீடுகளில்
வருமான வரித்துறையினர் 2-வது கட்டமாக சோதனை
நடத்தினர். அப்போது மூட்டைகளில் கட்டுகட்டாக
வைக்கப்பட்டிருந்த ரூ.11.48 கோடி பணம் பறிமுதல்
செய்யப்பட்டது. இதனால் எந்த நேரத்திலும் தேர்தல் ரத்தாகும்
என்று பரவலாக பேசப்பட்டது.

வருமான வரித்துறை அதிகாரிகளின் அறிக்கையை பொருத்து
தேர்தல் ஆணையம் இறுதி முடிவு எடுக்கும் என்று
தமிழக தலைமை தேர்தல் அதிகாரி சத்யபிரத சாகு
தெரிவித்திருந்தார்.

இதற்கிடையில் பணம் பறிமுதல் செய்யப்பட்ட சம்பவத்தில்
தி.மு.க. வேட்பாளர் கதிர் ஆனந்த் மீது வழக்குப்பதிவு செய்து
நடவடிக்கை எடுக்குமாறு வேலூர் பாராளுமன்ற தொகுதிக்கான
தேர்தல் செலவின கண்காணிப்பு அலுவலர்
சிலுப்பன் போலீஸ் சூப்பிரண்டு அலுவலகத்தில் புகார் அளித்தார்.

அவர் அளித்துள்ள மனுவின் மீது நடவடிக்கை எடுப்பது குறித்து
காட்பாடி மாஜிஸ்திரேட் ஜெயசுதாகரிடம் போலீசார் ஆலோசனை
நடத்தினர். நேற்று இரவு வெகுநேரம் நடந்த ஆலோசனையில்
முழுமையான முடிவு கிடைக்கவில்லை.
இதனால் மாஜிஸ்திரேட் எந்த உத்தரவையும் பிறப்பிக்கவில்லை.

இன்று மீண்டும் மாஜிஸ்திரேட்டிடம் காட்பாடி டி.எஸ்.பி. சங்கர்,
இன்ஸ்பெக்டர் புகழ் ஆலோசனை நடத்தினர். இதையடுத்து
மாஜிஸ்திரேட் வழக்கு பதிவு செய்ய உத்தரவிட்டார்.

அதைத் தொடர்ந்து வேட்பாளர் கதிர் ஆனந்த் கட்டுகட்டாக பணம்
பறிமுதல் செய்யப்பட்ட வீட்டின் உரிமையாளர் சீனிவாசன்,
தாமோதரன் ஆகிய 3 பேர் மீதும் காட்பாடி போலீசார் வழக்கு
பதிவு செய்தனர்.

கதிர் ஆனந்த் மீது 125 (ஏ) பிரிவின் கீழ் பிரமான பத்திரத்தில்
தவறான தகவல் அளித்தல், சீனிவாசன், தாமோதரன் ஆகியோர்
மீது 171 (இ மற்றும்சி) பிரிவின் கீழ் வாக்காளர்களுக்கு பணம்
வினியோகிக்க முயற்சி செய்ததாக வழக்கு பதிவு செய்யப்பட்டுள்ளது.

இது தொடர்பாக போலீசார் முதல் கட்ட விசாரணையை
தொடங்கியுள்ளனர்.

தி.மு.க. வேட்பாளர் கதிர் ஆனந்த் தாக்கல் செய்ய வேட்புமனுவில்
தன்னிடம் ரூ.98 ஆயிரத்து 450-ம், தனது மனைவி சங்கீதாவிடம்
ரூ.6 லட்சத்து 45 ஆயிரம் பணம் கையில் இருப்பதாக குறிப்பிட்டுள்ளார்.

ஆனால், வருமான வரித்துறை சோதனையில் ஏராளமான பணம்
பறிமுதல் செய்யப்பட்டுள்ளது. இந்த முரண்பட்ட தகவல் காரணமாக
வேட்பாளர் மீது வழக்கு பதிவு செய்யப்பட்டுள்ளது.

வேலூரில் கைப்பற்றப்பட்ட பணம் மற்றும் இதர விவகாரங்கள்
தொடர்பாக ஜனாதிபதிக்கு தேர்தல் ஆணையம் அறிக்கை
அனுப்பி இருந்தது. கடந்த 14-ம் தேதி அனுப்பப்பட்ட இந்த
அறிக்கையில் வேலூர் தொகுதியில் தேர்தலை ரத்து செய்ய
வேண்டும் என தேர்தல் ஆணையம் வலியுறுத்தி இருந்தது.

தேர்தல் ஆணையத்தின் இந்த பரிந்துரையை ஏற்று வேலூர்
பாராளுமன்ற தொகுதியில் தேர்தலை ரத்து செய்ய ஜனாதிபதி
ராம்நாத் கோவிந்த் இன்று ஒப்பிதல் அளித்தார்.

இதையடுத்து, பல கோடி ரூபாய் கைப்பற்றப்பட்ட வேலூர்
பாராளுமன்ற தொகுதியில் தேர்தல் ரத்து செய்யப்படுவதாக
தேர்தல் ஆணையம் இன்றிரவு அதிரடி அறிவிப்பை
வெளியிட்டுள்ளது.
-
------------------------------------
-மாலைமலர்

**ayyasamy ram** · **ayyasamy ram** Tue Apr 16, 2019 10:06 pm

வேலூர் தேர்தல் ரத்து ஜனநாயகப் படுகொலை: ஸ்டாலின் கருத்து
----

திருச்சி: வேலூர் தொகுதி நாடாளுமன்றத் தேர்தல் ரத்து என்பது ஜனநாயகப் படுகொலை என்று திமுக தலைவர் ஸ்டாலின் கருத்து தெரிவித்துள்ளார்.

வேலூர் நாடாளுமன்றத் தொகுதியில் வாக்காளர்களுக்கு பணப்பட்டுவாடா செய்ய பெருமளவு பணம் குவிக்கப்பட்டுள்ளது என்று கிடைத்த தகவலின் காரணமாக சில நாட்களுக்கு முன்பு நடத்தப்பட்ட வருமான வரித்துறை சோதனையில் கோடிக்கணக்கில் பணம் சிக்கியது.

குறிப்பாக திமுக பொருளாளர் துரைமுருகனின் ஆதரவாளர்களின் இடங்களில் நடந்த சோதனையில் ரூ. 11 கோடிக்கு மேல் பணம் சிக்கியது. இதனையடுத்து அத்தொகுதியில் தேர்தல் ரத்து செய்யப்படுமா என்ற கேள்வி எழுந்தது.

அதன் தொடர்ச்சியாக அதிக அளவில் கணக்கில் வராத பணம் பறிமுதல் செய்யப்பட்ட விவகாரத்தின் காரணமாக வேலூர் தொகுதி நாடாளுமன்றத் தேர்தல் ரத்து செய்யப்படுவதாக தேர்தல் ஆணையம் செவ்வாய் இரவு அறிவித்துள்ளது

இந்நிலையில் வேலூர் தொகுதி நாடாளுமன்றத் தேர்தல் ரத்து என்பது ஜனநாயகப் படுகொலை என்று திமுக தலைவர் ஸ்டாலின் கருத்து தெரிவித்துள்ளார்.

நாளை மறுநாள் நடைபெற உள்ள தேர்தலுக்கான பரப்புரை செவ்வாய் மாலை 6 மணியோடு நிறைவு பெற்ற நிலையில், திருவாரூரில் தனது பரப்புரையை முடித்துக் கொண்ட திமுக தலைவர் ஸ்டாலின் விமானம் மூலம் திருச்சி வந்தார்.

திருச்சி விமான நிலையத்தில் செய்தியாளர்கள் அவரிடம் வேலூர் தேர்தல் ரத்து குறித்துக் கேள்வி எழுப்பினர். அதற்கு பதிலளித்து அவர் கூறியதாவது:

வேலூர் தொகுதி நாடாளுமன்றத் தேர்தல் ரத்து என்பது ஜனநாயகப் படுகொலை.

இது திமுகவுக்கு களங்கம் கற்பிக்கும் முயற்சி.

தேனியில் ஓபிஎஸ் மகன் பணப்பட்டுவாடா செய்கிறார்; அவர் மீது எந்த நடவடிக்கையும் எடுக்கவில்லை

தற்போது கனிமொழி வீட்டில் மட்டும் வருமானவரி சோதனை நடைபெறுகிறது.

தூத்துக்குடியில் தமிழிசை தங்கியுள்ள வீட்டில் கோடிக்கணக்கில் பணம் உள்ளது,. அங்கு ஏன் சோதனைகள் நடைபெறவில்லை?

வருமான வரித்துறை, அமலாக்கத்துறை மற்றும் சிபிஐ ஆகிய அமைப்புகளை மோடி திமுகவுக்கு எதிராகப் பயன்படுத்துகிறார்.

பணப்பட்டுவாடா தொடர்பான எங்களின் புகார்கள்மீது தேர்தல் ஆணையம் நடவடிக்கை எடுப்பதில்லை.

இனி வரும் காலங்களில் தேர்தல் ஆணையம் என்பதும் சீர்திருத்தம் செய்யப்பட வேண்டும்.

இவ்வாறு அவர் தெரிவித்தார்.

-
தினமணி

வேலூர் பாராளுமன்ற தொகுதியில் தேர்தல் ரத்து - தேர்தல் ஆணையம் அதிரடி

வேலூர் பாராளுமன்ற தொகுதியில் தேர்தல் ரத்து - தேர்தல் ஆணையம் அதிரடி

Re: வேலூர் பாராளுமன்ற தொகுதியில் தேர்தல் ரத்து - தேர்தல் ஆணையம் அதிரடி

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக