"டிக் டாக்' செயலிக்குத் தடை விதிக்க வேண்டும்

First topic message reminder :



இளைய தலைமுறையினரைச் சீரழிக்கும் "டிக்டாக்'
செயலியைத் தடை செய்ய வேண்டும் என்று பாமக
நிறுவனர் ராமதாஸ் வலியுறுத்தியுள்ளார்.

இது தொடர்பாக செவ்வாய்க்கிழமை அவர் வெளியிட்ட
அறிக்கை:

முகநூல், கட்செவி அஞ்சல் போன்ற சமூக ஊடகமான
டிக்டாக் என்ற பெயரிலான செல்பேசி செயலி கடந்த
2016-ஆம் ஆண்டு செப்டம்பர் மாதம் அறிமுகம்
செய்யப்பட்டது.

சீனத்தைச் சேர்ந்த பைட்-டான்ஸ் என்ற நிறுவனத்தால்
அறிமுகப்படுத்தப்பட்டுள்ள இந்தச் செயலியில்
15 வினாடிகளுக்கு பயனாளிகள் தங்களின் கருத்தைப் படம்
பிடித்து வெளியிட முடியும்.

ஆனால், டிக்டாக் செயலி இப்போது ஆபாசக் களஞ்சியமாக
மாறிப் போயிருப்பதாக குற்றச்சாட்டுகள் எழுந்துள்ளன.
இந்தச் செயலியில் பயனாளிகள் பதிவு செய்யும்
உள்ளடக்கங்களுக்கு எந்தவிதமான கட்டுப்பாடோ,
தணிக்கையோ இல்லை என்பதால், இளம்பெண்கள் உள்ளிட்ட
பயனாளிகள் பலரும் ஆபாசம் நிறைந்த பாடல்களைப் பாடுவது,

திரைப்படங்களில் வரும் பாடல்களுக்கு ஏற்ற வகையில்
அருவருக்கத்தக்க வகையில் அங்க அசைவுகளைச் செய்வது
போன்ற செயல்கள் அதிகரித்து வருகின்றன.

இதில் இடம்பெறும் பல பதிவுகள் பெண்களை இழிவு
படுத்துகின்றன.

உலகின் பெரும்பாலான நாடுகளில் டிக்டாக் செயலி
மிகவும் மோசமான தாக்கத்தையே ஏற்படுத்தி உள்ளது.
குழந்தைகளுக்கும், பதின்வயதினருக்கு பாதிப்பை
ஏற்படுத்துவதாகக் கூறி, இந்தோனேஷிய அரசு அதை
தடை செய்தது. பின்னர், ஆபாச உள்ளடக்கங்கள் இடம்
பெறாது என பைட்-டான்ஸ் நிறுவனம் உத்தரவாதம்
அளித்ததைத் தொடர்ந்து தான் தடை நீக்கப்பட்டது.

அமெரிக்காவில் 16 வயதுக்குள்பட்டவர்கள் டிக்டாக்
செயலியை பயன்படுத்த அனுமதிக்கக்கூடாது என்று
அங்குள்ள இணைய பயன்பாடு கண்காணிப்பு அமைப்பு
பரிந்துரை செய்திருக்கிறது.

பிரான்ஸ் உள்ளிட்ட பல்வேறு நாடுகளில் டிக்டாக்கின்
உள்ளடக்கங்கள் கடுமையான கண்காணிப்புக்கு
உள்ளாக்கப்படுகின்றன.

எனவே, சமூக சீரழிவுக்கு உள்ளாக்கும் டிக்டாக் செயலிக்கு
மத்திய அரசு தடை விதிக்க வேண்டும் என்று அவர்
கூறியுள்ளார்.
-
------------------------------------------
தினமணி