மதுக்கடைகள் 2 நாள் மூடல் நடிகர் அம்பரீஷ் மறைவு எதிரொலி

-
பெங்களூரு:
கர்நாடகாவில், பிரபல நடிகர், அம்பரீஷ், 66, மரணம்
அடைந்ததை அடுத்து, அசம்பாவிதம் நடப்பதை தடுக்க,
பெங்களூரில், இரண்டு நாட்கள்மதுக்கடைகள்
மூடப்படுவதாக அறிவிக்கப் பட்டுள்ளது.

கன்னட திரையுலகில் ஜாம்பவான் நடிகர்களில் ஒருவரும்,
காங்.,கைச் சேர்ந்த அரசியல்வாதியுமான, அம்பரீஷ்,
மாரடைப்பால், பெங்களூரில் நேற்று முன்தினம் காலமானார்.

இவர், மன்மோகன் சிங் பிரதமராக இருந்தபோது, மத்திய
அமைச்சரவையில் இடம்பெற்றிருந்தார்.பெங்களூரு,
கன்டீரவா மைதானத்தில், நேற்று பொதுமக்கள் பார்வைக்காக,
அம்பரீஷ் உடல் வைக்கப்பட்டிருந்தது.

அவரது உடலுக்கு,பல்லாயிரக்கணக்கான தொண்டர்கள்,
நீண்டவரிசையில் சென்று அஞ்சலி செலுத்தினர்.

நடிகர்கள் ரஜினிகாந்த், சிரஞ்சீவி, மோகன் பாபு, கன்னட
நடிகர் சிவ்ராஜ் குமார் உட்பட ஏராளமானோர் அஞ்சலி
செலுத்தினர். அம்பரீஷின் உடலை பார்த்து, சிரஞ்சீவியும்,
மோகன் பாபுவும் கதறி அழுதனர்.

அம்பரீஷின் உடல் மூவர்ண கொடி போர்த்தப்பட்டு,
விமானப்படை ஹெலிகாப்டரில், அவரது சொந்த
மாவட்டமான, மாண்டியாவுக்கு எடுத்து செல்லப்பட்டது.

அம்பரீஷ் உடலுக்கு அஞ்சலி செலுத்த, மாண்டியாவில்
விஸ்வேஸ்வரய்யா ஸ்டேடியத்தில், ஏராளமானோர் திரண்டு
இருந்தனர்.அம்பரீஷ் மறைவையொட்டி, பெங்களூரு நகரில்,
8,000 போலீசார் பாதுகாப்பு பணியில் ஈடுபடுத்தப்பட்டனர்.

'அசம்பாவிதம் ஏற்படாமல் தடுக்க, பெங்களூரில் இரண்டு
நாட்கள் மதுக்கடைகள் மூடப்படும்' என, அரசு அறிவித்து
உள்ளது.

அம்பரீஷ் உடலுக்கு இறுதிச் சடங்குகள், பெங்களூரில்,
கன்டீரவா ஸ்டூடியோவில் இன்று நடக்கும் என, அரசு
வட்டாரங்கள் கூறின.மறைந்த அம்பரீஷுக்கு, மனைவியும்,
நடிகையுமான சுமலதா, ஒரு மகன் உள்ளனர்.

சுமலதா, தமிழில், முரட்டுக்காளை என்ற படத்தில், ரஜினியுடன்
நடித்திருந்தார்.
-
-------------------------
தினமலர்