திருப்பத்தூர் அருகே குறும்பர் நடுகல் கண்டெடுப்பு

திருப்பத்தூரை அடுத்த மத்தூர் அருகே குறும்பர் கல் என்று அழைக்கப்படும் நடுகல் கண்டறியப்பட்டது.
திருப்பத்தூர் தூய நெஞ்சக் கல்லூரிப் பேராசிரியர்கள் ஆ.பிரபு, சு.சிவசந்திரகுமார் மற்றும் சமூக ஆர்வலர் முத்தமிழ், ஆய்வு மாணவர்கள் சரவணன், பரத் உள்ளிட்டோர் பழங்காலத் தொல்லியல் தடயங்களைக் கண்டறிந்து ஆவணப்படுத்தும் முயற்சியில் ஈடுபட்டு வருகின்றனர்.
திருப்பத்தூரில் இருந்து 20 கி.மீ. தொலைவில் கிருஷ்ணகிரி மாவட்டம், மத்தூர் அருகே உள்ள அத்திப்பள்ளம் எனும் கிராமத்தில் நடுகல் ஒன்றையும், அதன் அருகில் உள்ள கல்வெட்டையும் கண்டெடுத்தனர்.
இதுகுறித்து அவர்கள் கூறியதாவது:
இந்த நடுகல் அப்பகுதி மக்களால் குறும்பர் கல் என்றழைக்கப்படுகிறது. நடுகல்லில் உள்ள வீரனின் வலது கரத்தில் நீண்ட வாளும், இடது கையில் போர்க்களத்தில் பயன்படுத்தும் தற்காப்புக் கேடயமும் உள்ளது. தலையில் கொண்டையும், நீண்ட காதுகளும் காணப்படுகின்றன. கால்களில் கழலும், கைகளில் பூணும், கழுத்தில் பலவித ஆபரணங்களும் உள்ளன. கழுத்தில் உள்ள ஆபரணம் இவ்வீரன் ஒரு சிற்றரசன் என்பதைக் காட்டுகிறது.
வீரனுக்கு அருகில் பெண்ணின் உருவம் இடம்பெற்றுள்ளது. வீரன் மடிந்தவுடன் அவனோடு தன்னையும் மாய்த்துக்கொண்ட அவனது மனைவியாக இருக்கக்கூடும். கூடுதலாக நடுகல்லில் ஏர்க்கலப்பை போன்ற வடிவமும் இடம்பெற்றுள்ளது.
பொதுவாக அரசனுக்குரிய நடுகல்களில் அவனது வெண்கொற்றக் குடை இடம்பெறுவது உண்டு. ஆனால், இந்த நடுகல்லில் இடம்பெற்றுள்ள இவ்வுருவம் ஏர்க்கலப்பை போன்றே காணப்படுகிறது.
நிலத்துக்கு மேற்புறம் சுமார் 5 அடி உயரமும், 6 அடி அகலமும் கொண்டதாக இந்நடுகல் அமைந்துள்ளது. நடுகல்லின் முன்புறம் கல்தூண்கள் நடப்பட்டுள்ளன. இது 13-ஆம் நூற்றாண்டைச் சேர்ந்த ஹொய்சாளர் காலத்தைச் சேர்ந்ததாக இருப்பதற்கு வாய்ப்புள்ளது. பொதுவாக குறும்பர் என்ற சொல் குறுநில மன்னர், பழைமையான ஒரு இன மக்கள், வேடர் இனத்தாரை குறிப்பதாகவும் கூறப்படுகிறது.
இந்நடுகல்லானது இப்பகுதியை ஆட்சி செய்து மடிந்த குறுநில இனக்குழுத் தலைவனுக்காக எடுக்கப்பட்ட நடுகல் என்பது புலப்படுகிறது. இந்நடுகல் அமைந்திருக்கும் இடத்துக்கு 100மீட்டர் அருகே கல்வெட்டு ஒன்றும் உள்ளது. இக்கல்வெட்டு தெலுங்கு மொழியில் பொறிக்கப்பட்டு சிதைந்த நிலையில் காணப்படுகிறது. இதுபோன்ற வரலாற்று ஆவணங்களை இளம் தலைமுறையினர் அறிந்திடும் வகையில் அவற்றை பாதுகாத்திட தொல்லியல் துறையினர் முன்வர வேண்டும் என்று அவர்கள் தெரிவித்தனர்.
நன்றி
தினமணி