அடையாறு சாமியார் தலைமறைவு:போலீஸ் தேடுகிறது..!

**Tamilzhan** · **Tamilzhan** Wed Dec 16, 2009 12:40 pm

சென்னை மாம்பலம் இந்தி பிரசார சபா சாலையில் சக்தி விலாஸ் மிஷனை நடத்தி வந்தவர் சாமியார் ஈஸ்வர ஸ்ரீகுமார். இவர் இதே பெயரில் அடையாறு, கோட்டூர்புரம் பகுதிகளிலும் மிஷன் நடத்தினார். அவ்வப்போது இருப்பிடத்தை மாற்றி வந்தார்.

இவர் மீது நுங்கம்பாக்கத்தை சேர்ந்த இளம் பெண் ஹேமலதா என்பவர் போலீஸ் கமிஷனர் ராஜேந்திரனிடம் புகார் கொடுத்தார். அதில், வேலை தேடி சென்ற என்னை காபியில் மயக்க மருந்து கொடுத்து சாமியார் ஈஸ்வர ஸ்ரீகுமார் கற்பழித்தார்.

அதை வீடியோ படமாக எடுத்து வைத்து மிரட்டி அடிக்கடி அழைத்து அவரது ஆசையை தீர்த்துக்கொண்டார் என்று கூறியிருந்தார்.

3 மாதங்களுக்கு முன்பு கொடுத்த புகாரை தேனாம் பேட்டை, அடையாறு, கோட்டூர்புரம், சைதாப்பேட்டை போலீசார் விசாரித்து விட்டு சாமியாருக்கு சாதகமமாக நடவடிக்கை ஏதும் எடுக்காமல் விட்டு விட்டனர். சிலர் அவரை வீட்டை காலி செய்து சென்று விடுங்கள் என்று கூறியதாக தெரிகிறது.

இதனால் சாமியாரும் கடந்த 2 வருடத்தில் மட்டும் 3 இடங்களில் இருப்பிடத்தை மாற்றி உள்ளார். இந்த தகவல் அனைத்தும் பத்திரிக்கைகள் வாயிலாக போலீஸ் கமிஷனர் ராஜேந்திரனின் கவனத்துக்கு சென்றது. அவர் நேரடியாக விசாரித்தார்.
இறுதியாக ஹேமலதா கொடுத்த புகார் மனுவை சைதாப்பேட்டை உதவி போலீஸ் கமிஷனர் அதிவீர ராமபாண்டியன் வாங்கி வைத்துக்கொண்டு பேச்சுவார்த்தை நடத்தி வருவது தெரிய வந்தது. சம்பந்தப்பட்ட அதிகாரியை எச்சரித்த கமிஷனர் உடனடி நடவடிக்கைக்கு உத்தரவிட்டார்.

ஹேமலதாவின் புகார் தியாகராய நகர் உதவி போலீஸ் கமிஷனர் கண்ணபிரானுக்கு அனுப்பப்பட்டது. அவரது மேற்பார்வையில் இன்ஸ்பெக்டர் சரவணன் விசாரித்தார்.

சாமியார் ஈஸ்வர ஸ்ரீகுமார் கடந்த 2 வருடமாக ஹேமலதாவை மிரட்டி அவ்வப்போது தவறு செய்தது தெரிய வந்தது. இதையடுத்து நேற்று இரவோடு இரவாக சாமியார் ஈஸ்வர ஸ்ரீகுமார் மீது 376 (கற்பழிப்பு), 506 (கொலை மிரட்டல்) உள்ளிட்ட 2 முக்கிய குற்ற பிரிவுகளின் கீழ் வழக்கு பதிவு செய்யப்பட்டது.

இதற்கிடையே தன் மீதான புகார் விசுவரூபம் எடுப்பதை அறிந்த சாமியார் ஈஸ்வர ஸ்ரீகுமார் நேற்றே திடீரென தலைமறைவாகி விட்டார். காலையில் நிருபர்களுடன் செல்போனில் பேசி ஷநான் குற்றமற்றவன்' என்று விளக்கம் அளித்த அவர் அதன்பிறகு செல்போனை சுவிட்ஜ் ஆப் செய்து விட்டார்.

தலைமறைவான சாமியார் ஈஸ்வர ஸ்ரீகுமாரை மாம்பலம் போலீஸ் இன்ஸ்பெக்டர் சரவணன் தலைமையிலான தனிப்படை போலீசார் வலை வீசி தேடி வருகின்றனர். ஹேமலதாவிடம் நடந்த சம்பவங்கள் குறித்து பூர்வாங்க விசாரணை நடத்தவும் திட்ட மிட்டுள்ளனர்.