கயத்தாறில் 50 மெகாவாட் சூரியசக்தி மின்நிலையம்

கயத்தார் :
துாத்துக்குடி மாவட்டம், கயத்தாறில், 'டெடா' எனப்படும்,
தமிழ்நாடு எரிசக்தி மேம்பாட்டு முகமை, 50 மெகாவாட்
திறனில், சூரியசக்தி மின் நிலையம் அமைக்க, விரைவில்,
'டெண்டர்' கோர உள்ளது.

விழிப்புணர்வு : தமிழகத்தில், காற்றாலை, சூரியசக்தி
உள்ளிட்ட புதுப்பிக்கத்தக்க மின்சாரம் தொடர்பாக,
முதலீட்டாளர்களிடம் விழிப்புணர்வு ஏற்படுத்தும்
பணியை, டெடா நிறுவனம் மேற்கொண்டு வருகிறது.

மேலும், சூரியசக்தி மின் உற்பத்தியை ஊக்குவிக்க,
மத்திய அரசு வழங்கும் மானியத்தையும், பயனாளிகளுக்கு
வழங்குகிறது.ராமநாதபுரம் மாவட்டம், கடலாடியில்,
மின் வாரியம், 500 மெகாவாட் திறனில், சூரியசக்தி மின்
நிலையம் அமைக்க முடிவு செய்து உள்ளது.

இதேபோல், கயத்தாறில், டெடாவும், 50 மெகாவாட் மின்
நிலையம் அமைக்க உள்ளது.

இதுகுறித்து, டெடா அதிகாரி ஒருவர் கூறியதாவது:

கயத்தாறில், டெடாவுக்கு சொந்தமாக, 350 ஏக்கர் நிலம்
உள்ளது. ஒரு யூனிட் சூரியசக்தி மின்சாரத்தை,
3.47 ரூபாய் என்ற விலைக்கு வழங்க, டெடாவும், மின்
வாரியமும் ஒப்பந்தம் செய்து உள்ளன.

கயத்தாறில், மின் வாரியம், 400 கிலோ வோல்ட் திறனில்,
துணை மின் நிலையம் அமைத்துள்ளது.

ஒப்பந்தம் : அதன் அருகில், ஒப்பந்த நிறுவனம் வாயிலாக,
50 மெகாவாட் திறனில், சூரியசக்தி மின் நிலையம்
அமைக்கப்படும்.இடத்தை மட்டும், டெடா வழங்கும்.

ஒப்பந்த நிறுவனம், சொந்த செலவில், மின் நிலையம்
அமைக்க வேண்டும். அதனிடம், ஒரு யூனிட் மின்சாரத்தை,
மூன்று ரூபாய் அல்லது அதற்கு குறைவான விலைக்கு
வாங்கி, மின் வாரியத்திடம், ஏற்கனவே ஒப்பந்தம் செய்த
விலைக்கு, டெடா விற்பனை செய்யும்.

இதற்கான, 'டெண்டர்' விரைவில் கோரப்படும்.இவ்வாறு
அவர் கூறினார்.

- நமது நிருபர் -
தினமலர்