நீர்,நிலவள திட்ட பணிகளுக்காக ஒதுக்கீடு செய்த நிதியில் ரூ.1.50 கோடியில் 2 சொகுசு கார் 10 ஏ.சி. வாங்கிய அதிகாரிகள்

சென்னை: நீர், நிலவள திட்ட பணிகளுக்காக ஒதுக்கீடு செய்த நிதி ரூ1.50 கோடி செலவில் 2 சொகுசு கார், 10 ஏசி வாங்கிய சம்பவம் பொதுப்பணித்துறையில் சர்ச்சையை ஏற்படுத்தியுள்ளது. தமிழகத்தில் பாசன உள்கட்டமைப்புகளை மேம்படுத்தும் நோக்கில் நீர், நில வளத்திட்டம் கொண்டு வரப்பட்டது. இதற்கான திட்ட அலுவலகம் சேப்பாக்கம் எழிலகம் வளாகத்தில் உள்ளது. அந்த அலுவலகம் 2007 முதல் செயல்பட்டு வருகிறது. இந்த அலுவலகத்தில் திட்ட இயக்குனர், செயற்பொறியாளர் உள்ளிட்ட பல்வேறு நிலைகளில் 100க்கும் மேற்பட்ட அதிகாரிகள் பணியாற்றி வருகின்றனர்.
இந்த அலுவலகத்தின் மூலம் தான் தமிழக முழுவதும் செயல்படுத்தப்பட்டு வரும் நீர்வள,நில வள திட்டம் கண்காணிக்கப்பட்டு வருகிறது. இந்த நிலையில் தற்போது, நீர்,நிலவள திட்டம் இரண்டாவது கட்டமாக உலக வங்கி நிதியுதவியின் கீழ் ரூ.3 ஆயிரம் கோடி செலவில் 4,778 ஏரிகள், 477 அணைகள்ட்டுகளை புனரமைத்தல், தடுப்பணை கட்டுதல் உள்ளிட்ட பணிகள் மேற்கொள்ளப்படுகிறது. இதற்கான திட்ட அறிக்கை தயார் செய்து உலக வங்கியின் ஒப்புதலுக்கு அனுப்பி வைக்கப்பட்டது. முதற்கட்டமாக ரூ.780 கோடி செலவில் 1,200 ஏரிகளை புனரமைக்க உலக வங்கி நிதி ஒதுக்கீடு செய்ய சம்மதம் தெரிவித்திருப்பதாக கூறப்படுகிறது. இதை தொடர்ந்து தமிழக அரசு சார்பில் ரூ.780 கோடி நிதி ஒதுக்கீடு செய்து அரசாணை வெளியிடப்பட்டுள்ளது.
இந்த நிலையில் தற்போது இப்பணிக்காக பொதுப்பணித்துறை சார்பில் டெண்டர் விடப்பட்டு, ஒரு சில இடங்களில் பணிகள் நடந்து வருகிறது. இந்த நிலையில், நீர்வள,நில திட்டத்திற்கு ஏரி, அணைக்கட்டு, தடுப்பனை கட்டுவதற்கு ஒதுக்கப்பட்டுள்ள இந்த நிதியில் ரூ1.50 கோடி மதிப்பில் 2 சொகுசு கார் மற்றும் 15 ஏசி உள்ளிட்ட பொருட்கள் வாங்கப்பட்டுள்ளதாக கூறப்படுகிறது. இதற்காக, செயற்பொறியாளர் நிலையிலான அதிகாரி ஒருவர் ஒப்புதல் அளித்து பில் தொகை சம்பந்தப்பட்ட நிறுவனங்களுக்கு செட்டில் செய்யப்பட்டிருப்பதாக கூறப்படுகிறது. ஏரிகள் புனரமைப்பு பணிக்கு ஒதுக்கீடு செய்யப்பட்டிருந்த நிதியில் இருந்து கார், ஏசி வாங்கியிருப்பது பொதுப்பணித்துறையில் சர்ச்சையை ஏற்படுத்தியுள்ளது. இது குறித்து பொதுப்பணித்துறை அதிகாரி ஒருவர் கூறும் போது, நீர்வள,நிலவள திட்ட அலுவலகத்தில் ஏசி இருந்தும் புதிதாக வாங்க வேண்டிய அவசியம் இல்லை. அதே போன்று உயர் அதிகாரிகளுக்காக 2 சொகுசு காரும் வாங்கப்பட்டுள்ளது. அப்படியிருந்தும் அரசு நிதியை வீணாக்கும் நோக்கத்தில் இது போன்று வாங்கியுள்ளனர். இந்த விவகாரத்தில் அரசு உரிய விசாரணை நடத்த வேண்டும்’ என்றார்.
நன்றி
தினகரன்