கம்போடியாவில் மே 19, 20-இல் உலகத் தமிழர் மாநாடு

கம்போடியாவில் உலகத் தமிழர் மாநாடு மே 19, 20-ஆம் தேதிகளில் நடைபெற உள்ளது.
இதுகுறித்து பன்னாட்டு தமிழ்ச் சங்கக் கூட்டமைப்புத் தலைவர் தணிகாசலம், தென்புலத்தார் பன்னாட்டுத் தமிழர் கூட்டமைப்பு நிறுவனர் ஒடிஸா பாலு ஆகியோர் புதுச்சேரியில் செய்தியாளர்களுக்கு புதன்கிழமை அளித்த பேட்டி:
கம்போடியா நாட்டின் மிகப் பெரிய வழிபாட்டுத் தலமான அங்கோர்வாட் கோயிலுக்கு அருகில் உலகத் தமிழர் ஒன்று கூடல் மாநாடு வருகிற மே 19, 20 ஆகிய தேதிகளில் நடைபெற உள்ளது.
தென்புலத்தார் பன்னாட்டுத் தமிழர் கூட்டமைப்பு, கம்போடியா தமிழ்ப் பேரவை ஆகியவை இணைந்து இந்த மாநாட்டை நடத்துகின்றன.
மாநாட்டில் பங்கு கொள்வதற்காக உலகில் 152 நாடுகளைச் சேர்ந்த சுமார் 1,200 பேர் பங்கேற்க உள்ளனர். முதன்மையாக தென்கிழக்கு ஆசிய நாடுகளான மலேசியா, சிங்கப்பூர், தாய்லாந்து, மியான்மர், இந்தோனேஷியா, பிலிப்பைன்ஸ், வியத்நாம், லாவோஸ், புருனே, பப்புவா நியூகினியா ஆகிய நாடுகளில் வசிக்கும் தமிழர்கள் ஒன்று கூடி, மற்ற அனைத்து உலக நாடுகளில் இருந்து வருகை தரும் தமிழர்களுக்கு தென்கிழக்காசியாவின் பழைமை வாய்ந்த தமிழர் கோயில்கள், தற்போதைய தென்கிழக்காசிய மக்களின் வாழ்க்கையுடன் பின்னிப் பிணைந்துள்ள பண்டைய கால தமிழர்களின் கலை, கலாசாரம், இசை, நடனம், உணவு, உடை, விளையாட்டு, விவசாயம், கட்டடக் கலை, தமிழ் மொழியின் பரவல் போன்ற தமிழரின் பெருமைகளைப் பறைசாற்றுகின்றனர்.
பிற ஆசிய நாடுகளான சீனா, ஐப்பான், கொரியா, தைவான், இலங்கை மற்றும் கனடா, அமெரிக்கா, பிரான்ஸ், ஜெர்மனி, பெல்ஜியம், டென்மார்க், ஆப்பிரிக்கா, ஆஸ்திரேலியா, துபாய், சவூதி அரேபியா போன்ற பல்வேறு நாடுகளிலிருந்தும் தமிழர்கள் ஒன்று கூட உள்ளனர்.
இந்த மாநாட்டில் கம்போடியாவின் சியாம் ரீப் தென்கிழக்காசிய பல்கலைக்கழகத்தில் தமிழ்நாட்டில் உள்ள ஒரு பல்கலைக்கழகத்துடன் இணைந்து தமிழுக்கான இருக்கை அமைப்பதற்கான ஒரு ஒப்பந்தம் கையெழுத்தாக உள்ளது. ஆய்வுக் கட்டுரைகளைக் கொண்ட விழா மலர் வெளியிட உள்ளோம். மேலும், உலகத் தமிழர் ஒன்றிணைந்து பன்னாட்டு வணிக மையம் தொடங்கப்பட உள்ளது.
தென்கிழக்கு மற்றும் கம்போடிய நாட்டின் தலைவர்களும், தமிழ்நாட்டில் இருந்து அமைச்சர்கள், துணைவேந்தர்கள், தொழிலதிபர்கள், தமிழ் ஆர்வலர்கள், திரைத்துரை பிரமுகர்கள், பேராசிரியர்கள் கலந்து கொள்கின்றனர். மாநாட்டில் பங்கேற்க விரும்புவோருக்கு விமானக் கட்டணம், விசா, தங்கும் இட வசதி உள்ளிட்டவற்றுக்கு உரிய கட்டணத்தின் அடிப்படையில் ஏற்பாடு செய்யப்படும்.
இதுதொடர்பான கூடுதல் விவரங்கள் அறிய 99402 40847, 8870 806789, 98846 12351, 0085 59692 96456 ஆகிய செல்லிடப்பேசி எண்களில் தொடர்பு கொள்ளலாம் எனத் தெரிவித்தனர்.
செய்தியாளர்கள் சந்திப்பின்போது உலக தமிழர் மாநாட்டுக்கான இலட்சினையை அறிமுகப்படுத்திய தணிகாசலம், ஒடிஸா பாலு ஆகியோர்.
நன்றி
தினமணி