சென்னையில் டிசம்பர் வரை 600 மி.லி. குடிநீர் வழங்கப்படும் : ஆய்வு கூட்டத்தில் அமைச்சர் எஸ்.பி.வேலுமணி உறுதி

சென்னை:
குடிநீர் விநியோகம் மற்றும் டெங்கு நோய் தடுப்பு நடவடிக்கைகள்,
பல்வேறு வளர்ச்சித் திட்டங்களின் செயலாக்கம் குறித்த ஆய்வுக்
கூட்டம் சென்னைப் குடிநீர் வாரிய கூட்ட அரங்கில் நேற்று
நடைபெற்றது.

கூட்டத்துக்கு அமைச்சர் எஸ்.பி.வேலுமணி தலைமை வகித்தார்.
அப்போது, ஆய்வு நடத்திய அமைச்சர் அதிகாரிகள் மத்தியில்
பேசியதாவது:

சென்னை மாநகரில், அனைத்துப் பகுதிகளிலும் கோடை காலத்தில்
தட்டுப்பாடின்றி சீரான முறையில் குடிநீர் வழங்கிட செயல் திட்டம்
தயாரித்து செயல்படுத்தவும், இதற்கு தேவையான நிதியிருப்பு,
குடிநீர் விநியோகத்திற்கான மின் மோட்டார்கள் பழுது சரி செய்து
தயார் நிலையில் வைக்க வேண்டும்.

புழல், சோழவரம், பூண்டி மற்றும் செம்பரம்பாக்கம் ஆகிய
4 ஏரிகளிலும் 4.24 டிஎம்சி குடிநீர் உள்ளது. மேலும், ஜூலை, ஆகஸ்ட்,
செப்டம்பர் மற்றும் அக்டோபர் ஆகிய 4 மாதங்களில் நமக்கு வழங்க
வேண்டி 8 டிஎம்சி கிருஷ்ணா நீர் பெறுவதற்கு முழுமையான
நடவடிக்கை எடுக்கப்பட்டுள்ளது.

அக்டோபர் மாதத்தில் வடகிழக்கு பருவமழை பெய்யும் என
எதிர்பார்க்கப்படுகிறது.

தற்போது நாள் ஒன்றுக்கு 650 மில்லியன் லிட்டர் குடிநீர் சென்னை
மாநகருக்கு வழங்கப்பட்டு வருகிறது. ஒருவேளை பருவமழை
குறைவாக இருப்பினும், பல்வேறு முயற்சிகள் மூலம் சென்னை
மாநகர பகுதிகளுக்கு தொடர்ந்து 600 மில்லியன் லிட்டருக்கு
குறையாமல் இந்த ஆண்டு டிசம்பர் வரை குடிநீர் வழங்கப்படும்.

கடந்த ஆண்டைப் போலவே, சிக்கராயபுரத்தில் உள்ள
கல் குவாரிகளிலிருந்து நாளொன்றுக்கு 30 மில்லியன் லிட்டர் நீர்
எடுக்க நடவடிக்கை எடுக்கப்பட்டுள்ளது.

ஏரியோர நீர் நிலைகளுக்கு அருகில் பெரிய குழாய்களை இறக்கி,
அதிக சக்திவாய்ந்த மின் மோட்டார்களைப் பொருத்தி நீரை எடுக்க
நடவடிக்கை எடுக்கப்பட்டுள்ளது. போரூர் ஏரியின் நீராதாரத்தை
உபயோகிக்க நடவடிக்கை எடுக்கப்படும்.

இரட்டை ஏரி நீராதாரத்தை குடிநீராக சுத்திகரித்து உபயோகிக்க
நடவடிக்கை எடுக்கப்படும். ஏற்கனவே 9841 குடிநீர்த் தொட்டிகள்
அமைக்கப்பட்டுள்ளன. தேவைப்படும் அனைத்து இடங்களிலும்
குடிநீர்த் தொட்டிகள் நிறுவப்படும்.

மின்அஞ்சல் மூலமும், குறுஞ்செய்தி, வாட்ஸ் ஆப் மூலமும்
பெறப்படும் புகார்கள் மீது உடனுக்குடன் தீர்வு காண வேண்டும்.
கொசு ஒழிப்பு பணியில் தமிழகம் முழுவதும் 1.37 லட்சம்
பணியாளர்கள் ஈடுபடுத்தப்பட்டுள்ளனர்.

இவ்வாறு அவர் பேசினார்.

உள்ளாட்சி தேர்தல் நடத்த நடவடிக்கை:

அமைச்சர் எஸ்.பி.வேலுமணி நிருபர்களுக்கு அளித்த பேட்டியில்,
‘‘உள்ளாட்சி வார்டுகளுக்கான மறுவரையறை பணிகள் விரைவில்
முடிக்கப்பட்டு, அதன் அறிக்கையை நீதிமன்றத்தில் சமர்ப்பித்து
விரைவில் தமிழகத்தில் உள்ளாட்சி தேர்தல் நடத்த நடவடிக்கை
எடுக்கப்படும்’’ என்றார்.
-
---------------------------------------
தினகரன்