சேலம் அருகே 3,000 ஆண்டுகளுக்கு முந்தைய பெருங்கற்கால ஈமச் சின்னம் கண்டுபிடிப்பு!

சேலம்: நங்கவள்ளி அருகே சூரப்பள்ளிநைனானூரில் சுமார் 3,000 ஆண்டுகளுக்கு முந்தைய பெருங்கற்கால ஈமச் சின்னத்தை சேலம் வரலாற்று தேடல் குழுவினர் கண்டுபிடித்துள்ளனர். இதுகுறித்து பேசிய வரலாற்று தேடல் ஆர்வலர் சீனிவாசன், பழனிசாமி என்பவர் கொடுத்த தகவலின் பேரில் சூரப்பள்ளிநைனானூர் கிராமத்துக்குச் சென்று பார்த்தபோது தனியாருக்குச் சொந்தமான ஒரு தோட்டத்தில் செங்குத்தான நடுகல் இருந்தது. இந்த நடுகல்லை ஆய்வு செய்து பார்த்ததில் பெருங்கற்கால ஈமச் சின்னம் என்பது தெரியவந்துள்ளது என்று கூறியுள்ளார். பெருங்கற்காலம் என்பது சங்க இலக்கிய காலங்களுக்கு முற்பட்ட சுமார் 3,000 ஆண்டுகளுக்கு முந்தைய காலத்தில் இறந்தவர்கள் புதைக்கப்பட்ட இடத்தில் பெரிய பெரிய கற்களைக் கொண்டு நினைவுச் சின்னம் எழுப்புவார்கள். இந்தக் காலத்தைப் பெருங்கற்காலம் என்று வரலாற்று ரீதியாக அழைக்கிறோம்.
அந்த வகையில் பெருங்கற்கால ஈமச் சின்னமாகத் திகழும் இந்த நடுகல் 3,000 ஆண்டு பழைமை வாய்ந்தது. தற்போது இந்த நடுகல் 10 அடி உயரத்திலும், 6 அடி அகலத்திலும் இருக்கிறது. ஆனால், இந்தக் கல் 15 முதல் 20 அடி உயரம் இருந்திருக்கலாம். காலப்போக்கில் இது உடைந்துவிட்டது. கல் உடைந்ததற்கான அடையாளங்கள் இருக்கிறது என்று அவர் தெரிவித்துள்ளார். மேலும் இந்தக் கல் நம் மூதாதையர் வழிபாட்டு அடையாளமாகவும் இருந்து வருவதாகவும், அரசு தொல்லியல் துறை மூலம் அடையாளம் கண்டு இந்தப் பெருங்கற்கால சின்னம் பாதுகாக்கப்படும் என்று சீனிவாசன் கூறியுள்ளார். இந்தக் பெருங்கற்கால சின்னம் காலம்காலமாக இருந்து வருவதாகவும், இந்தக் கல்லை சாமியாக நினைத்து பொங்கல் தினத்தில் முன்னோருக்கு வழிபாடு செய்யும் நாளில் பூஜை செய்து வணங்கி வருகிறோம் என்றும் பெருங்கற்கால சின்னம் இருக்கும் நிலத்தின் உரிமையாளர் கூறியுள்ளார்.
நன்றி
தினமணி