பொறியாளரை கடத்தி துப்பாக்கி முனையில் திருமணம்

SK · SK Sat Jan 06, 2018 2:08 pm

பீஹாரில், பொறியாளரை கடத்திச் சென்ற பெண் வீட்டார், அவரை கட்டாயப்படுத்தி, துப்பாக்கி முனையில், பெண்ணின் கழுத்தில் தாலி கட்ட செய்த சம்பவம் அதிர்ச்சியை ஏற்படுத்தி உள்ளது.

பீஹார் மாநிலம் பாட்னாவைச் சேர்ந்த, பொறியாளர் வினோத்குமார், 29, தன் நண்பரின் திருமணத்தில் பங்கேற்பதற்காக சென்று கொண்டிருந்தார். அப்போது, அங்கு வந்த ஒரு கும்பல், அவரை கடத்திச் சென்றது. பாட்னா புறநகர் பகுதியில் உள்ள, ஒரு வீட்டிற்கு அழைத்துச் சென்ற அந்த கும்பல், அங்கு புத்தாடை உடுத்தி, ஆபரணங்கள் சூடிய நிலையில், தயாராக இருந்த ஒரு பெண்ணின் கழுத்தில் தாலி கட்டச் சொல்லி கட்டாயப்படுத்தியது. இதனால், அதிர்ச்சி அடைந்த வினோத்குமார், பெண் வீட்டாரிடம் கதறி அழுது, தன்னை விடுவிக்கும்படி கெஞ்சினார்.

எனினும், அவரை விடுவிக்காத பெண் வீட்டார், துப்பாக்கி முனையில், வினோத்குமாரை தாலி கட்ட வைத்தனர். வினோத்குமார் மிரட்டப்பட்ட, 'வீடியோ' பதிவுகளுடன், அவரின் சகோதரர், போலீசில் புகார் அளித்தார். அப்பகுதி போலீசார் வழக்கு பதிவு செய்ய மறுத்து விட்டனர்.

இதையடுத்து, போலீஸ், எஸ்.பி., தலையீட்டால், வினோத்குமார் அங்கிருந்து விடுவிக்கப்பட்டார். இது குறித்து, போலீசார் வழக்கு பதிவு செய்து விசாரிக்கின்றனர். பீஹாரில், 2016ல், மணமகன் கடத்தப்பட்டது தொடர்பாக, 3,000க்கும் மேற்பட்ட வழக்குகள் பதிவாகி இருப்பதாக கூறப்படுகிறது.

பொறியாளரை கடத்தி துப்பாக்கி முனையில் திருமணம் 03NYtg5LSJekCamlNN6n+Tamil_News_large_1933415