இமாசல பிரதேசத்தில் நிலச்சரிவில் 45 பேர் உயிரோடு மண்ணில் புதைந்து சாவு

சிம்லா,
இமாசல பிரதேச மாநிலத்தில் நேற்று முன்தினம் திடீர் மேக வெடிப்பு காரணமாக இடைவிடாது பலத்த மழை பெய்தது.

இந்த மழைக்கு இடையே மணாலியில் இருந்து காத்ராவுக்கு 40 பேருடன் ஒரு அரசு பஸ்சும், மணாலியில் இருந்து சம்பாவுக்கு 30 பேருடன் மற்றொரு அரசு பஸ்சும் புறப்பட்டு சென்றதாக கூறப்படுகிறது. வழியில் பயணிகள் யாரும் ஏறினார்களா என்பது குறித்து தகவல் இல்லை.

இவ்விரு பஸ்களும் மண்டி–பதன்கோட் தேசிய நெடுஞ்சாலையில் இரவு நேரத்தில் சென்று கொண்டிருந்தன.
வழியில், இவ்விரு பஸ்களும் பயணிகள், டிரைவர்கள், கண்டக்டர்கள் டீ குடிப்பதற்காக கோட்ரூபி என்ற இடத்தில் நிறுத்தப்பட்டிருந்தன.

அப்போது சற்றும் எதிர்பாராத வகையில், அந்த சாலையில் ராட்சத நிலச்சரிவு ஏற்பட்டது. இந்த நிலச்சரிவில் 2 பஸ்களுடன் 800 மீட்டர் நீள சாலையும் புதைந்தது.

இதில் இடிபாடுகளில் ஒரு பஸ் சுவடு தெரியாமல் மண்ணில் புதைந்து போய் விட்டதாக தகவல்கள் கூறுகின்றன.

நிலச்சரிவில் 2 பஸ்கள் சிக்கிக்கொண்டது குறித்த தகவல் அறிந்ததும், ராணுவ வீரர்களும், தேசிய பேரிடர் மீட்பு படையினரும் அங்கு விரைந்தனர். போலீஸ், உள்ளூர் நிர்வாகத்தினர், உள்ளூர்வாசிகள் உதவியுடன் அவர்கள் மீட்பு பணியில் விடிய விடிய ஈடுபட்டனர்.

போலீஸ் உயர் அதிகாரிகளும் சம்பவ இடத்துக்கு விரைந்தனர்.

இந்த சம்பவத்தில், 45 பயணிகள் உயிரோடு மண்ணில் புதைந்து பலி ஆனார்கள். அவர்களது உடல்கள் மீட்கப்பட்டு விட்டன. மேலும் பலரை காணவில்லை. இதனால் சாவு எண்ணிக்கை உயரும் என்று அஞ்சப்படுகிறது.

மாநில போலீஸ் டி.ஜி.பி. சோமேஷ் கோயல் சம்பவம் பற்றி கூறுகையில், ‘‘முதல் கட்ட விசாரணையில், மணாலி–காத்ரா வால்வோ பஸ்சில் 8 பேரும், மணாலி–சம்பா பஸ்சில் 47 பேரும் பயணம் செய்ததாக தெரிய வந்துள்ளது என்றார்.

நிலச்சரிவில் கார்கள் உள்ளிட்ட வேறு சில வாகனங்களும் சிக்கி பெருத்த சேதம் அடைந்துள்ளதாக தெரிய வந்துள்ளது.

நிலச்சரிவில் பஸ்கள் சிக்கி உயிரிழந்தவர்களுக்கு பிரதமர் நரேந்திர மோடி தனது ஆழ்ந்த இரங்கலை தெரிவித்துள்ளார்.

இதுபற்றி டுவிட்டரில் வெளியிட்டுள்ள பதிவில் அவர், ‘‘இமாசல பிரதேசத்தில் நிலச்சரிவால் நிகழ்ந்த வாகன விபத்துகளில் உயிரிழப்புகள் ஏற்பட்டிருப்பது குறித்து அறிந்து மிகுந்த மன வேதனை அடைந்தேன். அவர்களை இழந்து தவிக்கிற குடும்பத்தினருக்கு ஆழ்ந்த அனுதாபங்களை தெரிவித்துக்கொள்கிறேன்’’ என கூறி உள்ளார்.

நிலச்சரிவு ஏற்பட்ட இடத்துக்கு மாநில முதல்–மந்திரி வீரபத்ர சிங் நேற்று சென்று பார்வையிட்டார். இந்த துயர சம்பவத்தில் உயிரிழந்தவர்களின் குடும்பங்களுக்கு தலா ரூ.5 லட்சம் நிவாரணம் வழங்கப்படும் என அவர் அறிவித்தார்.
-
--------------------
-தினத்தந்தி