சினிமாவை மிஞ்சும் திக்..திக்.. : கணவனை துரத்தி துரத்தி கொல்ல முயன்ற மனைவி

-
பெங்களூரு :
பெண் ஒருவர் தனது கணவனை துப்பாக்கியால் சுட்டதுடன்,
தப்பி ஓடிய அவரை துரத்திச் சென்று கொல்ல முயன்ற
சம்பவம் பெங்களூருவில் நடந்துள்ளது.

சாய்ராம் (53), தனது மனைவி ஹம்சா (48) உடன் ஓசூரில்
இருந்து பெங்களூருவுக்கு காரில் சென்றுள்ளார். வழியில்
அனிகல் என்ற பகுதியில் காரை நிறுத்தி விட்டு,
இருவரும் மது அருந்தி உள்ளனர்.

தொடர்ந்து சாய்ராம் காரை ஓட்டிச் சென்றுள்ளார். அப்போது
இருவருக்கும் இடையே தகராறு ஏற்பட்டுள்ளது.

சண்டை முற்றி, ஒரு கட்டத்தில் ஹம்சா தனது கணவனை
துப்பாக்கியால் 3 முறை சுட்டுள்ளார். அதிஷ்டவசமாக உயிர்
தப்பிய சாய்ராம், காரை நிறுத்தி விட்டு, அவ்வழியாக வந்த
பஸ் ஒன்றில் ஏறி தப்பிச் செல்ல முயன்றுள்ளார்.

ஆனால் அப்படியும் ஹம்சா விடாமல் காரில், பஸ்சை துரத்திச்
சென்றுள்ளார்.

பஸ்சை முந்திச் சென்று காரை குறுக்கே நிறுத்தி,
வழிமறித்துள்ளார். பின் ஆத்திரத்துடன் பஸ்சில் ஏறி, சாய்ராமை
கொல்ல முயன்றுள்ளார். பஸ்சில் இருந்த சக பயணிகள்
ஹம்சாவை தடுத்து சாய்ராமை காப்பாற்றி உள்ளனர்.

சாய்ராம் உயிருக்கு ஆபத்தான நிலையில் மருத்துவமனையில்
அனுமதிக்கப்பட்டுள்ளார். ஹம்சாவை கைது செய்த போலீசார்,
அவரிடம் விசாரித்து வருகின்றனர். ஹம்சா செக்யூரிட்டி
ஏஜன்சி ஒன்றை நடத்தி வருவதாக போலீசார் தெரிவித்துள்ளனர்.
-
---------------------------
தினமலர்