வராக்கடன்களை வசூலிக்க அவசர சட்டம்

வராக்கடன்களை வசூலிக்க அவசர சட்டம் ஜனாதிபதி
பிரணாப் முகர்ஜி ஒப்புதல் : ரிசர்வ் வங்கிக்கு கூடுதல் அ
திகாரம் வழங்க வழி செய்யும்
-
புதுடெல்லி :
-
வராக்கடன்களை வசூலிக்க ரிசர்வ் வங்கிக்கு கூடுதல்
அதிகாரம் வழங்க வகை செய்யும் அவசர சட்டத்திற்கு
ஜனாதிபதி பிரணாப் முகர்ஜி ஒப்புதல் வழங்கினார்.

பொதுத்துறை வங்கிகளில் வராக்கடன்களின் மதிப்பு
ஆண்டுதோறும் வேகமாக உயர்ந்து வருகிறது.

தொழிலதிபர் விஜய் மல்லையா போன்று, வேண்டுமென்றே
கடனை செலுத்தாதவர்களிடமிருந்து பணத்தை வசூலிக்க
முடியாமல் வங்கிகள் திணறி வருகின்றன.

இதனால் 2016ம் ஆண்டு டிசம்பர் வரையிலான கணக்கெடுப்பில்,
நாடு முழுவதும் பொதுத்துறை வங்கிகளில் வராக்கடனின்
மொத்த மதிப்பு ₹6.06 லட்சம் கோடியாக அதிகரித்துள்ளது.
இந்த வராக்கடன்களை வசூலிக்கவும், வராக்கடன்களின்
எண்ணிக்கையை குறைக்கவும் மத்திய அரசு அவசர சட்ட
திருத்தம் மேற்கொள்ள முடிவு செய்தது.
-
அதைத் தொடர்ந்து அவசர சட்டம் ஜனாதிபதியின் ஒப்புதலுக்கு
அனுப்பி வைக்கப்பட்டது. ஜனாதிபதி பிரணாப் முகர்ஜியும், நேற்று
முன்தினம் இரவே அவசர சட்டத்திற்கு அனுமதி வழங்கி உள்ளார்.

இதன் மூலம், இந்த அவசர சட்ட மசோதா நாடாளுமன்றத்தில்
தாக்கல் செய்யப்பட்டு பின்னர் நிறைவேற்றப்படும்.

அவசர சட்டத்தில் மேற்கொள்ளப்பட்டுள்ள திருத்தங்கள்
தொடர்பான தகவல்கள் முழுமையாக வெளியிடப்படவில்லை.

மத்திய நிதி அமைச்சர் அருண் ஜெட்லி நேற்று அளித்த
பேட்டியில், ‘வராக்கடன்களை கண்டறியவும், அவற்றில்
விரைவான முடிவு எடுக்கவும் ரிசர்வ் வங்கிக்கு கூடுதல்
அதிகாரம் வழங்கப்பட்டுள்ளது.

இதன் மூலம் கடன் பெற்றவர்கள் திவாலானாலோ,
நிதி நெருக்கடியில் சிக்கினாலோ மேற்கொள்ள வேண்டிய
நடவடிக்கைகள் குறித்து வங்கிகளுக்கு ரிசர்வ் வங்கியே
நேரடி உத்தரவுகளை பிறப்பிக்கும்’ என்றார்.
-
---------------------------------
தினகரன்