-டுபாக்கூர் விளம்பரமா?: பிரபலங்களே உஷார்-

-
புதுடில்லி:
'வழுக்கை தலைக்கு விடிவு, உடல் பருமனை உடனே
குறைக்கலாம்' உள்ளிட்ட டூபாக்கூர் விளம்பரங்களில்
தோன்றும் நடிகர், நடிகையர் உள்ளிட்ட பிரபலங்களுக்கு
இந்திய விளம்பரங்களுக்கான தர நிர்ணய கவுன்சில்,
'செக்' வைத்துள்ளது.
-
இதுபோன்ற விளம்பரங்களில் தோன்றும் முன், கவுன்சில்
வெளியிட்டுள்ள கட்டுப்பாடுகளை பிரபலங்கள் தெரிந்து
வைத்து இருக்க வேண்டும் என அறிவிக்கப்பட்டுள்ளது
-
.விளம்பர துறையில், நேர்மையான, நியாயமான, ஒழுக்கமான
போட்டி மற்றும் கொள்கைகள் இருப்பதை நிலை நிறுத்த,
இந்திய விளம்பரங்களுக்கான தர நிர்ணய கவுன்சில்,
1985 முதல் செயல்பட்டு வருகிறது. இந்த அமைப்பு கடந்த
ஏப்.,13ம் தேதி புதிய நடைமுறைகளை வெளியிட்டுள்ளது.
அதன் விவரம் வருமாறு:
-
வாக்குறுதி
-
விளம்பரங்களில் தோன்றும் பிரபலங்கள், அந்த விளம்பரத்தில்
தரப்படும் வாக்குறுதிக்கு பொறுப்பு ஏற்க வேண்டும்.
விளம்பரத்தில் தோன்றும் பிரபலங்களுக்கும், அந்த
விளம்பரத்தை உருவாக்கிய விளம்பர ஏஜென்சிக்கும்,
கவுன்சிலின் விதிமுறைகள் நன்கு தெரிந்து இருக்க வேண்டும்.
-
பிரபலங்களுக்கு அபராதம்:
-
பிரபலங்கள் பட்டியலில், பொழுதுபோக்கு துறையை
சேர்ந்தவர்கள், விளையாட்டு துறையை சேர்ந்தவர்கள்,
டாக்டர்கள், எழுத்தாளர்கள், சமூக ஆர்வலர்கள்,
கல்வியாளர்கள் ஆகியோர் இடம் பெறுவர்.
-
மக்களை ஏமாற்றும் விளம்பரத்தில் தோன்றியதற்காக
அவர்களிடம் இருந்து அபராதம் வசூலிக்கப்படும்.
-
மருந்துகள் மற்றும் மாய வைத்திய (ஆட்சேபனைக்குரிய
விளம்பரங்கள்) சட்டம் 1954; மருந்துகள் மற்றும் அழகு
சாதன பொருட்கள் சட்டம் - 1940 மற்றும் விதிகள் - 1945 ன்
கீழ் தடை செய்யப்பட்ட பொருட்கள், சிகிச்சைகள் குறித்த
விளம்பரங்களில் பிரபலங்கள் தோன்றக் கூடாது.
-
' உடல் நலத்திற்கு தீங்கானது' என்ற வாசகங்களுடன் பேக்
செய்யப்பட்ட பொருட்கள், விளம்பரங்கள் ஆகியவற்றில்
பிரபலங்கள் தோன்ற கூடாது. கவுன்சிலின் விதிமுறைகளை
ஒரு விளம்பரம் மீறியுள்ளதா என அதில் தோன்றும் முன்,
கவுன்சிலிடம் பிரபலங்கள் கருத்து கேட்கலாம்.
இருப்பினும், அந்த விளம்பரத்திற்கு கவுன்சில் ஒப்புதல்
அளித்ததாக, இதை கருத முடியாது.

டெலி ஷாப்பிங் சேனல்கள்
-
கவுன்சிலின் செகரட்டி ஜெனரல் ஸ்வேதா புரந்தரே
கூறுகையில், '' டிவி சேனல்களில் வரும் விளம்பரங்களில்
பெரும்பாலானவை, கவுன்சிலின் விதிகளுக்கு உட்பட்டு
உள்ளன. ஆனால், டெலி ஷாப்பிங் சேனல்களில் வரும்
விளம்பரங்கள் கவலை அளிப்பதாக உள்ளன,'' என்றார்.
-
கவுன்சில் சேர்மன் சீனிவாசன் கே.ஸ்வாமி கூறுகையில்,
'' ரியல் எஸ்டேட், நிதி நிறுவன விளம்பரங்களில் தோன்றும்
பிரபலங்கள் உஷாராக இருக்க வேண்டும்,'' என்றார்.
-
--------------------------
தினமலர்