மரண தண்டனையை ஒழிக்க அரசு விரும்பவில்லை

நாட்டில் தற்போதுள்ள சூழ்நிலையைக் கருத்தில்கொண்டு, மரண தண்டனையை ஒழிப்பதற்கு அரசு விரும்பவில்லை என்று மாநிலங்களவையில் மத்திய அரசு தெரிவித்துள்ளது.

மரண தண்டனையை ஒழிப்பது தொடர்பான தனிநபர் தீர்மானத்தை மாநிலங்களவையில் இந்திய கம்யூனிஸ்ட் கட்சியின் டி.ராஜா கொண்டு வந்தார். அதன் மீது அதிமுக எம்.பி. நவநீதகிருஷ்ணனும், திரிணமூல் காங்கிரஸ் கட்சியின் சுகேந்து சேகர் ராயும் வெள்ளிக்கிழமை பேசுகையில், மரண தண்டனை ஒழிக்கப்படுவதை ஆதரிப்பதாகத் தெரிவித்தனர்.

திமுக எம்.பி. திருச்சி சிவா பேசுகையில், “குற்றங்களின் எண்ணிக்கை, குறிப்பாக கீழ்த்தரமான குற்றங்களின் எண்ணிக்கை அதிகரித்துள்ளது. இது மரண தண்டனையால் குற்றங்களைக் கட்டுப்படுத்த முடியவில்லை என்பதையே காட்டுகிறது’ என்றார்.

அவரது கருத்தை ஆதரித்து திமுகவைச் சேர்ந்த டி.கே.எஸ்.இளங்கோவன் பேசுகையில், “இந்தியா, அமெரிக்கா, சீனா, இந்தோனேசியா உள்ளிட்ட 36 நாடுகள்தான் மரண தண்டனையை அமல்படுத்துகின்றன’ என்று தெரிவித்தார்.

எனினும், ராஜாவின் தீர்மானத்தை தாம் எச்சரிக்கையுடன் கூடிய மரியாதையோடு அணுகுவதாக காங்கிரஸ் எம்.பி. ஆனந்த பாஸ்கர் ராபோலு தெரிவித்தார். “நிர்பயா வழக்கு போன்றவற்றைப் பார்க்கும்போது, குற்றத்தின் தீவிரத்தை கவனிப்பது அவசியமாகிறது. அரிதிலும் அரிதான வழக்குகளில் மட்டுமே மரண தண்டனை போன்ற கடுமையான தண்டனைகள் பயன்படுத்தப்பட வேண்டும்’ என்று அவர் வலியுறுத்தினார்.

எம்.பி.க்களின் கருத்துக்குப் பதிலளித்து மத்திய உள்துறை இணையமைச்சர் கிரண் ரிஜிஜு பேசியதாவது:

நாட்டில் தற்போதுள்ள சூழலானது மரண தண்டனையை ஒழிக்கும் அவசியத்தை ஏற்படுத்தும் வகையில் இல்லை. ஒரு வழக்கில் கீழ் நீதிமன்றம் மரண தண்டனை விதித்து அதை உயர் நீதிமன்றம் உறுதிப்படுத்தினாலும் அதனால் பாதிக்கப்பட்டவர் உச்ச நீதிமன்றத்தை அணுகலாம். அங்கு அவரது முயற்சி தோற்றாலும் அவர் மாநில ஆளுநரையும் குடியரசுத் தலைவரையும் அணுகலாம் என்றார் கிரண் ரிஜிஜு.

அதைத் தொடர்ந்து, மரண தண்டனையை ஒழிக்கக் கோரும் தனிநபர் தீர்மானத்தை திரும்பப் பெறுமாறு டி.ராஜாவிடம் ரிஜிஜுவும், மாநிலங்களவை துணைத் தலைவர் பி.ஜே.குரியனும் தெரிவித்தனர். எனினும், அதை ஏற்க டி.ராஜா மறுத்து விட்டார். அதன் பின் அவரது தீர்மானத்தை குரல் வாக்கெடுப்பு மூலம் அவை நிராகரித்தது.

-தினமணி

மரண தண்டனையை ஒழித்தால் குற்றங்கள் பெருகிவிடும் . எத்தனை கொலைகள் செய்தாலும் அவனுக்கு மரண தண்டனை இல்லையென்றால் , நாட்டில் சட்டம் ஒழுங்கு சீர்கெட்டுவிடும் .

கொலையிற் கொடியாரை வேந்தொறுத்தல் பைங்கூழ்
களைகட் டதனொடு நேர் .

என்பது ஐயனின் வாக்கு .

பொருள் : களையை நீக்கினால்தான் பயிர் வளரும்; அதுபோல கொடியவர்களைக் கொலை செய்தால்தான் மக்கள் நிம்மதியாக வாழமுடியும் .