பலத்த பாதுகாப்புடன் அமர்நாத் புனித யாத்திரை தொடக்கம்

**ayyasamy ram** · **ayyasamy ram** Sat Jul 02, 2016 11:19 am

ஜம்மு-காஷ்மீர் மாநிலத்தில், ஆண்டுதோறும் 48 நாள்களுக்கு
மேற்கொள்ளப்படும் அமர்நாத் புனித யாத்திரை, பலத்த
பாதுகாப்புகளுடன் வெள்ளிக்கிழமை (ஜூலை 1) தொடங்கியது.

மாநில துணை முதல்வர் நிர்மல் சிங் கொடியசைத்து வைக்க,
1,282 பேர் இடம்பெற்றுள்ள முதலாவது யாத்ரீகர்கள் குழு அமர்நாத்
பனி லிங்கத்தை நோக்கி புறப்பட்டுச் சென்றது.

அப்போது நிர்மல் சிங் பேசுகையில், ""இந்த ஆண்டில் மேற்
கொள்ளப்படும் அமர்நாத் புனித யாத்திரை சுமுகமாகவும்,
அமைதியாகவும் நடைபெற போதுமான பாதுகாப்புகள்
செய்யப்பட்டுள்ளன'' என்று தெரிவித்தார்.

இதுகுறித்து காவல்துறை உயரதிகாரி ஒருவர் தெரிவித்ததாவது:

ஜம்மு நகரின் பகவதி நகர் பகுதியில் அமைந்துள்ள அடிமட்ட
முகாமில் வான்வழி பாதுகாப்புக்கு முதல்முறையாக ஆளில்லா
விமானங்கள் பயன்படுத்தப்படுகின்றன.

இங்கிருந்து பஹல்கம், பால்டல் ஆகிய இரண்டு முகாம்களுக்கும்
செல்லும் இரண்டு வழிகளிலும் 12,500 துணை ராணுவப் படை
வீரர்களும், 8,000 போலீஸாரும் ஈடுபடுத்தப்பட்டுள்ளனர்.

பாதுகாப்பு நடவடிக்கைகளில் பல்வேறு நவீன தொழில்நுட்பங்கள்
பயன்படுத்தபடுகின்றன. மேலும், பகவதி நகர் முகாமில் கண்காணிப்பு
மையமும் அமைக்கப்பட்டுள்ளது.

இதனிடையே, பாதுகாப்பு ஏற்பாடுகள் குறித்து ஆய்வு செய்யவும்,
அமர்நாத் பனி லிங்கத்தின் முதல் தரிசனத்தில் பங்கேற்கவும்
மத்திய உள்துறை அமைச்சர் ராஜ்நாத் சிங் இரண்டு நாள் பயணமாக
காஷ்மீர் வந்துள்ளார்.
-
----------------------------
தினமணி