அறிமுக வீரர் கே.எல்.ராகுலின் அசத்தல் சதத்தால் ஜிம்பாப்வேவை வீழ்த்தியது இந்தியா

-
ஹராரே:
அறிமுக வீரர் கே.எல்.ராகுலின் அபாரமான சதத்தால் ஜிம்பாப்வேவுக்கு
எதிரான முதல் ஒரு நாள் போட்டியில் இந்திய அணி 9 விக்கெட்
வித்தியாசத்தில் வெற்றி பெற்றது.

169 ரன்கள் எடுத்தால் வெற்றி என்ற இலக்குடன் விளையாடிய இந்திய
அணி  சார்பில் அறிமுக வீரர்கள் கே.எல்.ராகுலும், கருண் நாயரும்
ஆட்டத்தைத் தொடங்கினர்.
தங்களுக்கு அளிக்கப்பட்ட வாய்ப்பைத் தக்கவைக்கும் வகையில்
இருவரும் நிதானமாக விளையாடினர்.

எனினும் கருண் நாயர், சாட்ரா வீசிய பந்தில் ஷிக்கந்தர் ராசாவிடம்
`கேட்ச்' கொடுத்து 7 ரன்களில் வெளியேறினார்.

இதையடுத்து ராகுலுடன் இணைந்தார் அம்பதி ராயுடு. இரு வீரர்களும்
நிதானமாக விளையாடினர். ஜிம்பாப்வே வீரர்களின் பந்துவீச்சை எவ்வித
சிரமமுன்றி எதிர்கொண்ட இருவரும் நிதானமாக ரன்களைச் சேர்த்தனர்.

அதிலும் முதல் ஒருநாள் சர்வதேச போட்டியில் விளையாடும்
கே.எல்.ராகுல் சிறப்பாக விளையாடினர். 57 பந்துகளில் தனது முதல்
அரை சதத்தைப் பதிவு செய்தார். அவருக்குத் துணையாக விளையாடிய
அம்பதி ராயுடு 93 பந்துகளில் தனது அரை சதத்தை நிறைவு செய்தார்.

42 ஓவர்கள் முடிவில் இந்திய அணி 165 ரன்கள் எடுத்திருந்தபோது,
ராகுல் 92 ரன்களுடன் களத்தில் இருந்தார். 43-வது ஓவரைச் சந்தித்த
ராகுல், இரண்டாவது பந்தில் 2 ரன்கள் எடுத்து தனது எண்ணிக்கையை
94 ஆக உயர்த்தினார். அப்போது இந்திய அணியின் வெற்றிக்கு 2 ரன்கள்
மட்டுமே தேவைப்பட்டது.

எனினும், அடுத்த பந்தை சிக்ஸருக்கு விரட்டி, அறிமுகப் போட்டியிலேயே
சதம் அடித்த வீரர்கள் பட்டியலில் இணைந்தார் ராகுல். இந்தப் போட்டியில்
அடிக்கப்பட்ட ஒரே ஒரு சிக்ஸரும் அதுவே.

இந்திய அணி 42.3 ஓவர்களில் ஒரு விக்கெட்டை மட்டுமே இழந்து
173 ரன்கள் எடுத்து 9 விக்கெட் வித்தியாசத்தில் வெற்றி பெற்றது.

முன்னதாக டாஸ் வென்ற டாஸ் வென்ற தோனி பீல்டிங்கை தேர்வு
செய்தார். இந்திய அணியின் மூத்த வீரர்கள் விராட் ஹோலி,
ரோஹித் சர்மா, ஷிகர் தவான், அஜிங்கா ரஹானே, ரவிச்சந்திரன்
அஸ்வின் ஆகிய மூத்த வீரர்களுக்கு இத்தொடரிலிருந்து ஓய்வு
அளிக்கப்பட்டுள்ளது.

ஐபிஎல் போட்டிகளில் சிறப்பாக விளையாடியதால் இந்திய அணியில்
இடம்பெற்ற யுவேந்திர சாஹல், கே.எல்.ராகுல், கருண் நாயர்
ஆகியோருக்கு விளையாடும் 11 பேர்களில் இடம் அளிக்கப்பட்டது.
மூவரும் முதன் முறையாக இந்திய அணிக்காக சர்வதேசப் போட்டியில்
விளையாடினர்.

இந்திய அணிக்காக தவன் குல்கர்னியும், ஷரனும் பவுலிங்கை
தொடங்கினர். இந்திய அணியின் பந்துவீச்சை சமாளிக்க முடியாமல்
ஜிம்பாப்வே வீரர்கள் அடுத்தடுத்து தங்களது விக்கெட்டுகளை
பறிகொடுத்தனர். 24 ஓவர்கள் முடிவில் அந்த அணி 5 விக்கெட்டுகளை
இழந்து 77 ரன்கள் மட்டுமே எடுத்திருந்தது.

இதையடுத்து இணைந்த ஷிக்கந்தர் ராசாவும், சிக்கும்புராவும்
இணைந்து விக்கெட் வீழ்ச்சியை தடுத்து நிறுத்தினர். இந்த இணை
6-வது விக்கெட்டுக்கு 38 ரன்கள் சேர்த்தது. ஷரன் ஆப் ஸ்டம்புக்கு
வெளியே வீசிய பந்தை அடிக்க முயன்று தனது விக்கெட்டை பறி
கொடுத்தார்  ஷிக்கந்தர் ராசா. அவர் 23 ரன்களில் வெளியேறினார்.

இறுதியில் ஜிம்பாப்வே அணி 49.5 ஓவர்களில் 168 ரன்களுக்கு அனைத்து
விக்கெட்டுகளையும் இழந்தது. அந்த அணியின் சிக்கும்புரா அதிக
பட்சமாக 41 ரன்கள் எடுத்தார்.

இந்திய அணியின் சார்பில பூம்ரா 9.5 ஓவர்களில் 28 ரன்களை
மட்டுமே விட்டுக் கொடுத்து 4 விக்கெட்டுகளை வீழ்த்தினார்.
அறிமுக வீரர் சாஹல் 27 ரன்கள் விட்டுக்கொடுத்து ஒரு
விக்கெட்டை வீழ்த்தினார்.
-
-------------------------------------------
தினமணி