ரூ.39 ஆயிரத்துக்கு ஏலம் போன எலுமிச்சைப் பழம்!

-
விழுப்புரம் மாவட்டம், திருவெண்ணெய்நல்லூர்
அருகே உள்ள இரட்டை குன்று முருகன் கோயிலில்
நடைபெற்ற பங்குனி உத்திர விழாவில், ஒரு
எலுமிச்சைப் பழம் ரூ.39 ஆயிரத்துக்கு ஏலம் போனது.
–
திருவெண்ணெய்நல்லூர் ஒன்றியம், ஒட்டனந்தல்
கிராமத்தில் பிரசித்தி பெற்ற பாலதண்டாயுதபாணி
கோயில் உள்ளது. சின்ன மயிலம் என்றும் இரட்டை
குன்று முருகன் கோயில் என்றும் அழைக்கப்படும்
இக்கோயிலில் பங்குனி உத்திரத் திருவிழா ஆண்டு
தோறும் விமரிசையாக நடைபெற்று வருகிறது.
–
விழாவின் ஒரு பகுதியாக கோயில் எலுமிச்சைப்
பழங்களை ஏலம் விடுவது பழங்காலந்தொட்டு நடை
பெற்று வருகிறது. இக்கோயிலில் நிகழாண்டு பங்குனி
உத்திரத் திருவிழா கடந்த 14ஆம் தேதி முதல் நடை
பெற்று வருகிறது. விழா மொத்தம் 11 நாள்கள் நடை
பெறும். இதில் முதல் 9 நாள் திருவிழாவின்போது
இரட்டை குன்றின் மீது அமைந்துள்ள முருகனின்
வேல் மீது ஒவ்வொரு நாளும் ஒரு எலுமிச்சை பழம்
வீதம் ஒன்பது நாள்களுக்கு பக்தர்கள் குத்தி வைப்பர்.
–
இந்த எலுமிச்சை பழங்கள் 11ஆவது நாள் விழாவில்
நள்ளிரவில் நடைபெறும் இடும்பன் பூஜையில் கருவாடு
சோறு படையலுக்குப் பிறகு ஊர் மக்கள் முன்னிலையில்
ஏலம் விடப்படும்.
–
அதன்படி, வியாழக்கிழமை நடைபெற்ற இடும்பன்
பூஜையில் கோயில் எலுமிச்சைப் பழங்கள் பாலகிருஷ்ணன்
நாட்டாண்மை, சண்முகம் ஆசாரி ஆகியோர் முன்னிலையில்
ஏலம் விடப்பட்டன.
–
மகத்துவம் வாய்ந்ததாகக் கருதப்படும் இந்த எலுமிச்சைப்
பழங்களை ஏலம் எடுப்பதற்கு பல்வேறு பகுதிகளிலிருந்து
ஏராளமானோர் குவிந்தனர். இவர்களில் குழந்தைப்பேறு
இல்லாதோர், தொழில் முனைவோர், வியாபாரிகள் உள்ளிட்ட
பல்வேறு தரப்பினர் எலுமிச்சைப் பழங்களை ஏலம் எடுப்பதற்கு
போட்டி போட்டனர்.
–
இதில் குழந்தை பாக்கியம் தருவதாக பக்தர்களால்
நம்பப்படும் முதல் நாள் எலுமிச்சைப் பழம் ரூ.39 ஆயிரத்துக்கு
விலை போனது. அந்த பழத்தை ஒட்டனந்தல் கிராமத்தைச்
சேர்ந்த ஜெயராமன் அமராவதி தம்பதியினர் ஏலம் எடுத்தனர்.
–
மொத்தமாக 9 எலுமிச்சை பழங்களும் ரூ.57,722-க்கு ஏலம்
போனது. கடந்த ஆண்டு விழாவில் முதல் நாள் எலுமிச்சைப்
பழம் ரூ.23 ஆயிரத்துக்கும், மொத்த எலுமிச்சைப் பழங்கள்
ரூ.61,200-க்கும் ஏலம் போனது குறிப்பிடத்தக்கது.
–
————————————-