மவுன யுத்தம் - சிறுவர் கதை

-

சீனாவிலுள்ள மடாலயங்களில் ஒரு வழக்கம்
இருந்தது. வாதத்தில் வெற்றி பெரும் துறவி
மடத்தில் தங்கி இருக்கலாம். தோற்றவர்
வெளியேற வேண்டும்.
-
அந்த புத்தமடத்தில் அண்ணன், தம்பியான
துறவியர் இருவர் தங்கி இருந்தனர்! அவர்களில்
அண்ணன் அறிவாளி; தம்பியோ முட்டாள்.
-
திடீரென்று, அங்கு வந்த துறவி ஒருவர்,
''நீங்கள் இந்த மடத்தை என்னிடம் விட்டுவிட்டு
இப்போதே செல்ல வேண்டும். இல்லையேல்,
புனிதமான புத்த மதக் கொள்கைகள் பற்றி
வாதிடுவோம்,'' என்றார்.
-
அன்று பேசா நோன்பு இருந்த அண்ணன்,
தன் தம்பியை அழைத்தார்.
-
''அந்தத் துறவியிடம் சைகையாலேயே
வாதிடலாமா என்று கேட்டு வா,'' என்று
சைகையாலே சொன்னார்.
-
உடனே தம்பி அந்தத் துறவியை புத்தர்
கோவிலுக்குள் அழைத்துச் சென்றான்.
இருவரும் சைகையாலேயே பேசிக் கொண்டனர்.
சிறிது நேரம் சென்றது. வந்திருந்த துறவி எழுந்தார்.
-
நேராக அண்ணனிடம் சென்று, ''உங்கள் தம்பி
விவாதத்தில் என்னை வென்று விட்டார்,'' என்றார்.
-
வியப்படைந்த அண்ணன் தன் மவுனத்தைக்
கலைத்தார். ''உங்களுக்குள் என்ன விவாதம்
நடந்தது?'' என்று கேட்டார்.
-
''நான் புத்தர் ஒருவர்தாம் என்று குறிப்பதற்காக
ஒரு விரலை நீட்டினேன். உடனே அவர், புத்தரும்,
அவருடைய அறிவுரைகளும் என்று இரண்டு இரு
விரல்களை நீட்டினார்.
-
''நான் உடனே புத்தர், அவர் அறிவுரை, அவர் சீடர்கள்
என்று மூன்றாகப் பிரிக்கலாம் என்று மூன்று
விரல்களைக் காட்டினேன்.
-
''அதற்குப் பதிலாக அவர், இவை மூன்றும் ஒன்றுதான்
என்பதைக் குறிப்பாக உணர்த்துவதற்காகக் கை
விரல்களை இறுக மூடிக் கொண்டு ஒன்று என்று
காட்டினார்.
-
''நான் தோல்வியை ஒப்புக் கொண்டு வந்து விட்டேன்.
எனக்கு விடை தாருங்கள்,'' என்று சொல்லிவிட்டுச்
சென்றார்.
-
அவர் சென்ற சிறிது நேரத்திற்குள், ''எங்கே அந்தத்
திமிர் பிடித்தவன்? அவனை என்ன செய்கிறேன் பார்,''
என்று கோபத்துடன் கத்திக் கொண்டே வந்தான் தம்பி.
-
அவனை அமைதிப்படுத்திய அண்ணன், ''என்ன நடந்தது?
சொல்,'' என்று கேட்டார்.

''அந்தத் துறவி வந்தவுடன் என் ஒரு கண் குருடு
என்பதை ஒரு விரலால் காட்டினான். விருந்தினரோடு
எதற்குத் தகராறு என்று கோபத்தை அடக்கிக் கொணடு,
''ஆண்டவன் அருளால் உங்களுக்கு இரண்டு கண்கள்
உள்ளன,'' என்று இரு விரல்களைக் காட்டினேன்.

''அந்தத் திமிர் பிடித்தவன் அமைதியாக இருக்கவில்லை.
அப்படிப் பார்த்தாலும் உனக்கு ஒரு கண். எனக்கு இரண்டு
கண். ஆக, மொத்தம் நம் இருவருக்கும் மூன்று கண்கள்
என்று மூன்று விரல்களைக் காட்டினான்.
-
''என்னால் கோபத்தை அடக்க முடியவில்லை. கையை
இறுக மூடி, அவனை ஓங்கிக் குத்தலாம் என்று முயற்சி
செய்தேன்.
-
''அதற்குள் இங்கு ஓடிவந்து விட்டான். எங்கே அவன்?''
என்று கத்தினான்.
-
''உன் முட்டாள்தனம் வென்றது. அந்தத் துறவி தன்
தோல்வியை ஒப்புக்கொண்டு சென்று விட்டார்,'' என்று
தம்பியைக் கட்டித் தழுவிக் கொண்டார் அண்ணன்.
-
--------------------
சிறுவர்மலர்

ம்ம்... மஹாகவி காளிதாசரும் இப்படித்தான் அந்த ராஜகுமாரியை தோர்க்க அடித்ததாக படத்தில் காட்டுவார்கள் ....சிவாஜியும் சௌகார் ஜானகியும் அருமையாக நடிப்பார்கள்