குறளும் கவிதையும்

**M.Jagadeesan** · **M.Jagadeesan** Sun 7 Feb 2016 - 12:15

பாலைப் பருகியுள்ளேன் !
தேனைச் சுவைத்துள்ளேன் !
பாலோடு தேன்கலந்து
பருகிய அனுபவம் இல்லை !

கண்ணே ! உந்தன்
பைங்கனி இதழின்
பழரசம் பருக
பாலோடு தேன்கலந்து
பருகிய இன்பம் பெற்றேன் !

பாலொடு தேன்கலந் தற்றே , பணிமொழி
வாலெயி றூறிய நீர். ( காதல் சிறப்புரைத்தல் - 1121 )

காதலன் : கண்ணுக்குள்ளே உன்னைப் பாரு - அது
....................காவியம் ஆயிரம் கூறும் !

காதலி : பாவை அங்கு இருக்கையிலே - இந்தப்
................பாவையின் உருவம் தெரிந்திடுமோ ?

காதலன் : பூவை உனக்கு இடம் வேண்டி- அந்தப்
....................பாவையைப் போகச் சொல்லி விட்டேன் !
...................ஆதலால் கண்ணே நீ வருவாய் – இந்த
...................அந்தகன் கண்ணுக்கு ஒளி தருவாய் !

கருமணியிற் பாவாய்நீ போதாய்; யாம்வீழும்
திருநுதற் கில்லை இடம். ( காதல் சிறப்புரைத்தல் -1123 )

என்னுயிர் நீதானே !
உன்னுயிர் நான்தானே !

நீ சிரித்தால் நான் சிரிப்பேன் சிங்காரப் பெண்ணே !
நீ அழுதால் நான் அழுவேன் ஒய்யாரப் பெண்ணே !

நீயின்றி நானில்லை ! நிலவின்றி வானில்லை !
தீயின்றி ஒளியில்லை ! திருவின்றி உலகில்லை !

உடம்பார் அழியின் உயிரார் அழிவர் !
உயிரார் அழியின் உடம்பார் அழிவர் !

உடலாக நானிருக்க உயிராக நீயிருக்க
உடலிங்கு இயங்கிடுமோ
உயிர் நீங்கிய பின்னாலே !

உடம்பொ டுயிரிடை என்னமற் றன்ன
மடந்தையொ டெம்மிடை நட்பு . ( காதல் சிறப்புரைத்தல் -1122 )

சசி · சசி Sun 7 Feb 2016 - 12:36

அருமையான குறள் கவிதை ஐயா. நன்றி

pricillashly · pricillashly Sun 7 Feb 2016 - 19:41

அருமை

**T.N.Balasubramanian** · **T.N.Balasubramanian** Sun 7 Feb 2016 - 20:03

Jagadeesan சூப்பருங்க

ரமணியன்

**M.Jagadeesan** · **M.Jagadeesan** Sun 7 Feb 2016 - 20:26

சசி, Pricillashly , மற்றும் ரமணியன் ஐயாவுக்கு நன்றி !

K.Senthil kumar · K.Senthil kumar Sun 7 Feb 2016 - 21:04

மிகவும் அருமை ஐயா.. குறளும் கவிதையும் 1571444738

**M.Jagadeesan** · **M.Jagadeesan** Sun 7 Feb 2016 - 21:35

நன்றி செந்தில்குமார் !

**M.Jagadeesan** · **M.Jagadeesan** Mon 8 Feb 2016 - 10:41

இருமனப் பெண்டிர் இல்லம் ஏகி
பொருளைத் தொலைத்து சிறுமை அடைந்து
மானம் இழந்து மதியும் கெட்ட
ஈனப் பிறவிகாள்! ஒருசொல் கேளீர்!

கட்டிய மனைவி காதல் மிக்கு
இன்முகம் காட்டி இருகை நீட்டி
உம்மை அணைத்து உடற்பசி நீக்கும்
அத்தகு இன்பம் அறியாயோ நீ?

குலமகள் முயக்கம் தருகிற இன்பம்
ஈட்டிய பொருளை வீட்டகத் திருந்து
உறவுடன் பகிர்ந்து அறவோர்க் களித்து
தானும் உண்டு மகிழ்தலை ஒக்கும்.

குறள் :

தம்மில் இருந்து தமதுபாத்து உண்டற்றால்
அம்மா அரிவை முயக்கு. ( புணர்ச்சி மகிழ்தல்-1107 )

கருத்து :

இல்லற வாழ்க்கையிலிருந்து , நல்வழியிலே ஈட்டிய பொருளைப் பிறர்க்குக் கொடுத்துத் தாமும் பங்கிட்டு உண்பதுபோல , இந்தப் பெண்ணின் தழுவல் இன்பமாக இருக்கிறது.

**M.Jagadeesan** · **M.Jagadeesan** Mon 8 Feb 2016 - 11:18

அசுவனி முதலா ரேவதி ஈறாக
விசும்பில் உள்ள விண்மீன் கூட்டம்
ஒவ்வொரு நாளும் ஒவ்வொன் றாகத்
திங்களின் அருகே திகழொளி காட்டும்

அன்றொரு நாளில் ஆகாய வீதியில்
திங்களின் அருகே நிற்க வேண்டிய
விண்மீன் ஒன்று நிலை தடுமாறி
மங்கை ஒருத்தியின் வண்ண முகத்தை
மதியென் றெண்ணி மயக்கம் கொண்டு
பூமிப் பந்தின் புறத்தே நிற்கும்.!

குறள்

மதியும் மடந்தை முகனும் அறியா
பதியில் கலங்கிய மீன். ( நலம் புனைந்துரைத்தல் - 1116 )

கருத்து: சந்திரனுக்கும், பெண்ணின் முகத்திற்கும் மாறுபாடு தெரியாததால் , விண்மீன்கள் தங்கள் இடங்களினின்றும் நிலைகலங்கி சுழல்கின்றன

**krishnaamma** · **krishnaamma** Mon 8 Feb 2016 - 11:26

மிகவும் அருமை ஐயா!.........நேற்றே பார்த்தேன், ஒன்று தான் படித்தேன் இப்போ மற்றதும் படித்து பின்னூட்டம் போடுகிறேன் ஐயா புன்னகை

.....நீங்கள் தொடருங்கள் , நாங்கள் உங்களைத் தொடரகக் காத்திருக்கோம் !................ குறளும் கவிதையும் 3838410834

Sponsored content · Sponsored content

குறளும் கவிதையும்

குறளும் கவிதையும்

Re: குறளும் கவிதையும்

Re: குறளும் கவிதையும்

Re: குறளும் கவிதையும்

Re: குறளும் கவிதையும்

Re: குறளும் கவிதையும்

Re: குறளும் கவிதையும்

Re: குறளும் கவிதையும்

Re: குறளும் கவிதையும்

Re: குறளும் கவிதையும்

Re: குறளும் கவிதையும்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக