நேதாஜி உடல் எரியூட்டப்பட்டதற்கான சான்றிதழ் வெளியீடு !

இந்திய தேசிய ராணுவத்தின் தலைவராக இருந்த நேதாஜியின் மரணத்தில் பல்வேறு சர்ச்சைகள் நிலவி வந்த நிலையில், அவர் தைவானில் நிகழ்ந்த விமான விபத்தில் இறந்து விட்டதாக போஸ்பைல்ஸ். இன்போ என்ற பிரிட்டனை சேர்ந்த இணையதளம் நம்பத் தகுந்த தகவல்களை தெரிவித்துள்ளது.

இது தொடர்பாக,  விபத்துக்குள்ளான விமானத்தில் நேதாஜியுடன் பயணித்த இந்திய தேசிய ராணுவத்தின் கர்னல் முஜிபூர் ரகுமான்கான்,  கடந்த 1945-ம் ஆண்டு ஆகஸ்ட் 24-ம் தேதி அளித்திருந்த அறிக்கையை அண்மையில், இந்த இணையதளம் வெளியிட்டிருந்தது.

அந்த அறிக்கையில், நேதாஜியின் உடலை தானே எரியூட்டியதாகவும் அவர் தெரிவித்திருந்தார். தற்போது அந்த இணையதளம் நேதாஜி எரியூட்டப்பட்டது தொடர்பான ஆவணத்தையும் வெளியிட்டுள்ளது.

நேதாஜியின் இறப்பு குறித்து,   கடந்த 1956-ம் ஆண்டு தைவான் அரசு அளித்ததாக பிரிட்டன்  வெளியுறவுத்துறை அமைச்சகத்தில்  பாதுகாத்து வைக்கப்பட்டுள்ள ஆவணம் எண் 1852/6  தெரிவிப்பதன்படி,


கடந்த 1945-ம் ஆண்டு ஆகஸ்ட் 15-ம் தேதி நேதாஜி விமான விபத்தில் இறந்துள்ளார். அவரது உடல் 22-ம் தேதி எரியூட்டப்பட்டதாக அந்த ஆவணம் தெரிவிக்கிறது.  தைவானை சேர்ந்த அரசு அதிகாரி டான் டி- டி என்பவர் நேதாஜியின் உடலை எரியூட்டப்பட்டதற்கான ஆவணத்தை அளித்துள்ளார்.

நேதாஜி எரியூட்டப்பட்டது குறித்து டான் டி- டி அளித்த  வாக்கு மூலமும் இடம் பெற்றுள்ளது. அதில் ,  ''என்னிடம் ஒரு ஜப்பானிய ராணுவ அதிகாரி,  இந்தியர் ஒருவருடன்  காரில் அவரது உடலை எடுத்து வந்தனர். அந்த இந்தியர் வெள்ளை நிற உடை அணிந்திருந்தார். உடல் எங்கும் கட்டுகள் போடப்பட்டிருந்தன. முகத்திலும் பேண்டேஜ் போடப்பட்டிருந்தது. அவர் மிகவும் துக்ககரமான நிலையில் இருந்தார். சுபாஷ் சந்திர போஸின் ராணுவத்தில் இருந்த கர்னல் முஜீபுர் ரகுமான்கான்தானாகத்தான் அவர் இருக்க கூடும்.

ஜப்பானிய அதிகாரி,  ''இவர் இந்தியாவின் சுப்ரீம் காமெண்டர், ஜப்பானை நோக்கி  சென்று கொண்டிருக்கும் விபத்தில் சிக்கி விட்டார். இவரது உடலை எரிக்க வேண்டுமென்று கேட்டுக் கொண்டார். அதற்கு ஒருநாள் முன்னதாகவே சுபாஸ் சந்திர போஸின் இறப்பு சான்றிதழையும் எங்களுக்கு வழங்கி விட்டார். அன்றைய தினமே  சுபாஷ் சந்திர போஸின் உடலை எரித்தோம். பின்பு 23-ம் தேதி அதே ஜப்பானிய ராணுவ அதிகாரி,  அந்த இந்தியருடன் வந்து அவரது சாம்பலை வாங்கி சென்றனர்'' எனக் கூறியதாக அந்த இணையதளம் தெரிவித்துள்ளது.

நன்றி விகடன் செய்தி

ரமணியன்