பேரறிவாளன் உட்பட 7 பேர் விடுதலைக்காக முதல்வரிடம் முறையிட திரைப்பட சங்கங்கள் முடிவு!

முன்னாள் பிரதமர் ராஜீவ் காந்தி கொலை வழக்கில் தண்டனை பெற்று நீண்ட நாட்களாக சிறையில் உள்ள பேரறிவாளன் உட்பட 7 பேரை விடுதலை செய்ய நடவடிக்கை எடுக்கக் கோரி, பேரணியாக சென்று முதல்வர் ஜெயலலிதாவிடம் முறையிடப்போவதாக தமிழ்த் திரைப்பட சங்கங்கள் அறிவித்துள்ளன.


இது தொடர்பாக சென்னையில் இன்று நடிகர் சங்கம், தயாரிப்பாளர் சங்கம், இயக்குநர் சங்கம், ஃபெப்சி உள்ளிட்ட ஒட்டு மொத்த தமிழ் திரையுலக சங்கங்கள் கலந்துகொண்ட செய்தியாளர் சந்திப்பில் நாசர், ஆர்.கே.செல்வமணி உள்ளிட்டோர் கூறுகையில், "பேரறிவாளன் உட்பட 7 பேரின் மரண தண்டனையை ஆயுள் தண்டனையாக உச்ச நீதிமன்றம் 2014-ம் ஆண்டு குறைத்தது. அடுத்த நாளே சட்டமன்றத்தைக் கூட்டி அவர்களை விடுதலை செய்வதாக தமிழக அரசு அறிவித்தது. ஆனால், அந்தத் தீர்ப்புக்கு தடை வாங்கிய அப்போதைய காங்கிரஸ் தலைமையிலான மத்திய அரசு, உச்ச நீதிமன்றத்தை நாடியது.

அதன் தொடர்ச்சியாக, ராஜீவ் காந்தி கொலை வழக்குக் கைதிகள் முருகன், சாந்தன், பேரறிவாளன், நளினி உள்பட 7 பேரை விடுதலை செய்ய முடியாது என உச்ச நீதிமன்றம் தீர்ப்பளித்தது.

ஏழு பேரும் கடந்த 25 ஆண்டுகளாக சிறையில் இருக்கிறார்கள். அவர்களை விடுதலை செய்ய உரிய நடவடிக்கை எடுக்க வேண்டும் என்று முதல்வர் ஜெயலலிதாவிடம் கோரிக்கையை முன்வைக்கிறோம். அரசியலமைப்பின் 161-வது பிரிவை பயன்படுத்தி அவர்களை விடுவிக்க வலியுறுத்துவோம்.



இதனை வெறும் கடிதமாக கொடுக்காமல், முதல்வர் ஒதுக்கும் நேரத்தை வைத்து ஒட்டுமொத்த தமிழ் திரையுலகமும் பேரணியாக சென்று கோரிக்கை மனு அளிக்க இருக்கிறோம். ஒட்டு மொத்த தமிழ் திரையுலகமும் பேரணியாக திரளும்போது மக்கள் மத்தியிலும் விழிப்புணர்வு ஏற்படும்" என்றனர்.

நன்றி விகடன் செய்தி

கடலில் காயம் கரைத்தாற்போல....

தமிழ்நாட்டில்தான் நடிகர் சங்கம் எண்றால் மக்கள் தமிழக அரசைவிட பெரிதாக கருதுகிறார்கள் ,,,,,,,,,,,