இந்திரஜாலம் காட்டிய இந்திராணி:

இந்திரஜாலம் காட்டிய இந்திராணி: சினிமாவை மிஞ்சும் 'கிரைம்' கதை



மும்பை: ஸ்டார் டிவி முன்னாள் தலைமை செயல் அலுவலர் பீட்டர் முகர்ஜியின் மனைவி இந்திராணி செய்த இந்திரஜால வித்தைகள், இந்தியாவையே அதிர்ச்சியில் ஆழ்த்தி உள்ளது.

வட இந்திய மீடியா உலகில் பீட்டர் முகர்ஜியை தெரியாதவர்கள் கிடையாது. ஹாங்காங்கில் ஸ்டார் டிவியில் பணிபுரிந்துவிட்டு, இந்தியாவிற்கு 1990களின் முற்பகுதியில் வந்தவர். இந்தியாவில் கேபிள் டிவி அறிமுகம் ஆவதற்கு முன்பு, டிஷ் ஆன்டனா மூலம் ஒளிபரப்பான ஸ்டார் டிவிக்கு தலைமை செயல் அலுவலர் ஆனார்.

அதே நிறுவனத்தில் மனிதவள துறை தலைவராக பணியில் சேர்ந்த இந்திராணிக்கும் பீட்டருக்கும் காதல் மலர்ந்தது. இத்தனைக்கும் இருவருக்கும் 16 ஆண்டுகள் வயது வித்தியாசம். கண் இல்லாத காதலுக்கு வயது மட்டும் இருக்கப் போகிறதா என்ன?

ஏற்கனவே திருமணமாகி விவாகரத்து ஆகியிருந்த பீட்டரும், அதே போல திருமணம் ஆகி விவாகரத்து ஆகியிருந்த இந்திராணிக்கும் திருமணம் நடந்தது. தனது தங்கை என்று ஷீனா என்ற இளம்பெண்ணை பீட்டருக்கு அறிமுகம் செய்தார். அதைவிட இன்னொரு சிறுவனான மிகைல் என்பவனை தனது தம்பி என்றார். அதே போல பீட்டருக்கும் ராகுல் என்ற மூத்த தார மகன் இருந்தார்.

கண்ணில் படாமல் மறைத்தார்: ஆனால் அந்த இருவரையும் இந்திராணி, தன்னுடன் இருக்க சம்மதிக்கவில்லை. கவுகாத்தியில் உள்ள தனது பெற்றோரிடம் வளர விட்டார்.
மலர்ந்த காதல்: ஆனால் அவ்வப்போது வந்து சென்ற ஷீனாவுக்கும் ராகுலுக்கும் காதல் மலர்ந்தது. இதை அறிந்த இந்திராணி அதிர்ச்சி அடைந்தார். ஏனெனில் இதற்கு காரணம் இருக்கிறது.

உண்மையில், இந்திராணியின் மகள் தான் ஷீனா, மகன் தான் மிகைல். இதை மறைத்து தான் பீட்டரை இந்திராணி கைப்பிடித்திருந்தார். அப்படிப் பார்த்தால், ராகுலும் ஷீனாவும் அண்ணன் தங்கை முறை வர வேண்டும். இதுவே, இந்திராணியின் கோபத்துக்கு காரணமாக அமைந்தது.
கொலை: இவ்விஷயத்தை முதல் கணவர் சஞ்சீவ் கன்னாவிடம் கூறிய இந்திராணி, அவருடனும் அவரது டிரைவருடனும் சேர்ந்து ஷீனாவை கொன்று புதைத்தனர்.

சிக்கியது எப்படி?: இந்த சம்பவம் நடந்தது 2012ம் ஆண்டு. ஷீனாவை காணவில்லை என்று எல்லோரும் மறந்து விட்டனர். இந்நிலையில் துப்பாக்கி வைத்திருந்ததாக வேறொரு வழக்கில் அந்த டிரைவர் போலீசில் சிக்கினார். இந்நிலையில் கடந்த சில மாதங்களுக்கு முன் ஷீனா காணாமல் போன விஷயம் மர்ம போன் மூலம் போலீசிற்கு தெரிய வந்துள்ளது. அப்போது இந்திராணி வெளிநாடு சென்றிருந்தால், அவர் தப்பி விடக்கூடாது என இந்திராணியும் அவரது முதல் கணவரும் ரகசியமாக கண்காணிக்கப்பட்டனர்.

விசாரணையில் ஏற்கனவே ஷீனாவை அவரும் சஞ்சீவ் கன்னாவும் சேர்ந்து கொன்றது தெரிய வந்தது. தன் மகளை முதல் கணவருடன் சேர்ந்து கொலை செய்த இந்திராணி, மகள் ஷீனாவின் உடலை தனது காரில் ஒரு இரவு முழுவதும் மறைத்து வைத்துள்ளதும் தெரிய வந்துள்ளது. அத்துடன், இந்திராணியின் மகள் தான் ஷீனா என்பதும் தெரிந்தது.

இவ்வளவையும் மறைத்துவிட்ட இந்திராணி, சமுதாயத்தில் தொடர்ந்து பெரிய இடத்து பெண்ணாக தொடர்ந்து நடமாடி வந்தார். பீட்டருக்கு எதுவும் தெரியாமலேயே மறைத்து விட்டார்.
பாவம் பீட்டர்: போலீஸ் மூலம் இவையெல்லாவற்றையும் அறிந்த பீட்டர் அதிர்ச்சியில் இருந்து இன்னமும் மீளவில்லை. ஷினா கொலை வழக்கில் தோண்ட தோண்ட பல உண்மைகள் வெளியாகி வருகின்றன. இது பீட்டரை மட்டுல்ல அனைவருக்குமே அதிர்ச்சி மேல் அதிர்ச்சியை கொடுத்து வருகிறது.
இப்போது சஞ்சீவ் கன்னாவிடம் விசாரணை நடந்து வருகிறது. இதில் மேலும் பல அதிர்ச்சி தகவல்கள் வெளிவரும் என எதிர்பார்க்கப்படுகிறது.
இந்தி சினிமா தயார்: சினிமாவையும் மிஞ்சும் இந்த உண்மைக் கதையை சினிமாவாக எடுக்க, இப்போதே இந்தி சினிமாக்காரர்கள் தயாராகி வருகின்றனர்.


நன்றி தினமலர்

ரமணியன்