பச்சோந்திகள் நிறம் மாறும் விதம்

**சிவா** · **சிவா** Sat Aug 01, 2015 2:08 am

பச்சோந்திகள் இடத்திற்கு ஏற்றவாறு தம் நிறத்தை மாற்றிக்கொண்டு எதிரிகளிடம் இருந்து தப்பித்துக் கொள்கின்றன. அதே வேளையில் தமக்கு வேண்டிய இரையை பிடிப்பதற்கு மறைந்து கொள்ள வசதியாகவும் நிறத்தை மாற்றிக் கொள்கின்றன.

பச்சோந்திகள் எல்லாவற்றாலும் நினைத்தவுடன் நிறம் மாற முடியாது. சிலவகை பச்சோந்திகள் தான் நிறம் மாறும் குணம் கொண்டவை. பிங்க், நீலம், சிவப்பு, ஆரஞ்சு, பச்சை, கருப்பு, பிரவுன், மஞ்சள் என்று நினைத்த நொடியில் நிறத்தை மாற்றிக் கொள்ளும்.

பச்சோந்திகள் இடத்துக்கு தகுந்த மாதிரி நிறத்தை மாற்றிக்கொள்ளும் என்று தான் பெருமான்மையானவர்கள் நினைக்கிறார்கள், அது உண்மையில்லை. பச்சோந்தி இடத்தைவிட தனது எண்ணத்துக்கு ஏற்றபடிதான் தன் நிறத்தை மாற்றிக்கொள்கிறது. அது நிறம் மாறினால் சுற்றி இருப்பவர்களுக்கோ அல்லது மற்ற பச்சோந்திகளுக்கோ ஏதோ ஒரு செய்தி சொல்கிறது என்று அர்த்தம்.

அதேபோல சூழலுக்குத் தகுந்தபடி தன்னை கண்டுபிடிக்க முடியாத படி மறைந்து கொள்ளும் முறைக்கு ‘காமோ ப்ளாஜ்’ என்று பெயர். அதாவது பூக்களும் இலைகளும் சேர்ந்திருக்கும் இடம் என்றால் அதே பூக்களின் நிறமும் இலைகளின் நிறமும் உடலில் யாரோ வரைந்ததுபோல் தனது நிறத்தை டிசைனாக மாற்றிக்கொள்ளும். உற்றுப்பார்த்தால் கூட இருப்பதை கண்டுபிடிக்க முடியாது. இந்த வகை பச்சோந்திகளை ‘ஸ்மித்ட் வார்ப்’ என்கிறார்கள். இப்போது இந்த வகை பச்சோந்திகளை பார்ப்பது அரிதாகி, அவை அழியும் நிலையில் உள்ளன.

பச்சோந்திகளுக்கு நிறத்தை கொடுப்பது நிறமிகள்தான். இதே முறையில்தான் பச்சோந்திகளின் தோலுக்கு கீழே இருக்கும் நிறமிகளும் செயல்படுகின்றன. அவற்றின் உடலில் உள்ள வெவ்வேறு நிறமிகளை திறந்து மூடுவதன் மூலம் தங்கள் நிறத்தை மாற்றிக்கொள்கின்றன.

நமது தலை முடியை கருமையாக்கிக் காட்டுவது நிறமிகள்தான். நிறமியின் செயல் திறன் குறையும் போது முடி வெள்ளையாக மாறுகிறது. ஏனென்றால், முடியின் உண்மையான நிறம் வெள்ளைதான். மனிதனுக்கு எப்படி வயதாகும் போது நிறமிகளின் செயல் திறன் குறைந்து, கொஞ்சம் கொஞ்சமாக வெள்ளை முடி தலை காட்டுகிறதோ அதே போல்தான் பச்சோந்திகளின் நிறமிகளும் இருக்கின்றன.

இப்படி நினைத்த உடன் நிறத்தை மாற்றிக் கொள்ளும், ஆட்டமெல்லாம் இளமையாகவும், ஆரோக்கியமாகவும் இருக்கும் வரைதான். வயதானால் வலிமை போய் நிறமிகளும் செயல் இழந்து, பச்சோந்திகளும் செயல்இழந்து விடுகின்றன. வயோதிகம் என்பது எல்லா உயிரினங்களுக்கும் சிக்கலான ஒன்றாகவே இருக்கிறது.