உற்ற பிணியின் அடையாளம்

குழலோன் · குழலோன் Sun Jun 21, 2015 9:07 pm

கற்ற கல்வியில் சிறக்கவில்லை
காரணம் ஏனென்று அறியவில்லை
மற்றவர் மத்தியில் மதிப்பில்லை
மறந்தும் நற்செயல் புரிவதில்லை

சுற்றம் நட்பின் அறிவுரைகள்
சற்றும் கருத்தில் பதிவதில்லை
வெறுமை வாழ்க்கை வாழ்ந்தாலும்
பொருட்டாய் எதையும் கொள்வதில்லை

அரசியல் சினிமா அரட்டைகளும்
அறிவற்ற அலைபேசிப் பிதற்றல்களும்
பயனற்ற இணையப் பகிர்வுகளும்
அன்றாட வாழ்க்கைப் பணிகளாகும்

இற்றை நாளில் இதுபோல
இளையர் பலரும் திரிவதுதான்
உற்ற பிணியின் அடையாளம்
உதவாது நாட்டிற்கு ஒருபோதும்

சிறுமை கொண்டு வாழ்வதிலே
சிறிதும் நமக்குப் பயனுளதோ!
அறிவை ஆற்றலைப் பெருக்கியே
வாழ்வதில் ஏதும் குறையுளதோ!

**M.Jagadeesan** · **M.Jagadeesan** Mon Jun 22, 2015 3:30 pm

அருமையான கவிதை படைத்த குழலோனுக்கு வாழ்த்துக்கள் !

கற்ற வழியிலே நின்றால்தான்
கல்வி எப்பவும் சிறந்திடுமே !
மற்றவரை நீ மதித்தால்தான்
மற்றவர் உன்னை மதித்திடுவர் !

சுற்றம் நட்பின் அறிவுரைகள்
சற்றும் கருத்தில் கொள்ளாதீர் !
சுற்றம் என்பது உட்பகையாம் !
சுருட்டுவ தொன்றே அவர்வழியாம் !

அரசியல் சினிமா அரட்டைகளும்
அறிவற்ற டி. வி . சீரியலும்
முட்டாள்கள் ஆடும் கிரிக்கெட்டும்
மனித குலத்தின் பகையாகும் !

காதல் நோய்க்கு இரையாகிக்
கருத்தைக் கெடுத்துக் கொள்ளாதீர் !
போதையின் பாதையில் போகாதீர் !
பிறன்மனை என்றும் நாடாதீர் !

நாமுண்டு நம்முடைய வேலையுண்டு
நல்லது செய்வதற்கு இறைவனுண்டு
என்கின்ற நம்பிக்கை மனதில்கொண்டு
எழுபவன் வாழ்விலே ஏற்றம்உண்டு !