போயஸ் கார்டனும்… போக்குவரத்து நெரிசலும்!

சுமார் 217 நாட்கள் கழித்து மக்கள் முன் வரும் ஜெயலலிதா, எளிமையாக, ஆடம்பரமில்லாமல் யாரையும் தொந்தரவு செய்யாத வகையில் போக்குவரத்து நெரிசல் இல்லாமல் வந்து செல்வார் என எதிர்பார்த்த நிலையில், போக்குவரத்து நெரிசல் இல்லாமல் போயஸ் கார்டனுக்கு வண்டி திரும்பாது என்ற சபதத்துடன் மக்களை வெயிலில் சிக்க வைத்து விட்டார்கள்.

ஐந்தாவது முறையாக தமிழக முதல்வராக பதவி ஏற்க ஜெயலலிதாவுக்கு மக்களின் போக்குவரத்தை, இயல்பு வாழ்க்கையை பாதிக்கும் விதமாக வரவேற்பு என்ற பெயரில் கஷ்டப்படுத்தி கட்சியினர் கொடுத்த இம்சைகள் தேர்தல் வரை எதிரொலிக்கும் என்றே சொல்லத் தோன்றுகிறது. எப்படியாவது எம்.எல்.ஏ. சீட் வாங்க வேண்டும் அல்லது அரசு ஒப்பந்த வேலை மூலம் கோடீஸ்வரனாக வேண்டும் என்பதற்காக கட்சியினர் கொடுத்த வரவேற்பு எதிர்பார்த்ததைவிட அதிகம் கொடுத்து அம்மாவின் மனம் குளிர வைத்து விட்டனர். எங்கு பதவி ஏற்றவுடன் இட மாறுதல் செய்து விடுவாரோ எனப் பயந்து போலீசாரும் தீவிர "கடமை" உணர்ச்சியில் அனைத்து உயர் அதிகாரிகளும் ஜெயலலிதா முன் தோன்றி விசுவாசத்தை காட்டினர்.

உலகின் வல்லரசான அமெரிக்க அதிபருக்கு கூட இப்படி ஓர் வரவேற்பை இந்திய அரசாங்கம் கொடுத்திருக்குமா என கேள்வி கேட்க வைக்கும் அளவிற்கு வரவேற்பும், மக்களை இம்சைப்படுத்தும் போக்குவரத்து நெரிசலும் இருந்தது.

மக்களும் நம்மிடம் சொல்லாமல் தேர்தல் தேதி கொடுத்து விட்டார்களோ என குழப்பத்திலும், இன்னமும் "வர வேண்டியது வரவில்லையே" என கலக்கத்திலும், 'பொதுத் தேர்தல் வருவதற்கான அறிகுறிகள்தான் இது... எனவே கைச் செலவிற்கு இனி கவலை இல்லை' என மன உறுதியுடன் கவலை மறந்து நின்று வேடிக்கை பார்த்தனர்.

ஆளுநர் மாளிகையில் இருந்து அண்ணா சாலைக்கு ஜெயலலிதா வந்ததால், அண்ணா சாலையில் கடும் போக்குவரத்து நெரிசல் ஏற்பட்டது.. உங்கள் ஒருவருக்கு பாதுகாப்பு என்று இவ்வளவு போலீசையும் களமிறக்கி, போக்குவரத்தை மறித்து மக்களையும் கஷ்டப்படுத்துவது மக்களின் பாதுகாப்பை கேள்விக்குறியதாக்கி விட்டது. பாதை தெரியாமல் சிக்கி கொண்டவர்கள்படும் அவஸ்தையும், சாலை சரி இல்லாத பகுதியில் மாட்டிக் கொண்டவர்களும் அதிகம். பெட்ரோல் போட முடியாமல் வண்டியை உருட்டிக்கொண்டு சென்றவர்களும் அதிகம்.

அண்ணா சாலையை ஏதோ கட்சிக்காரர்கள் அவர்கள் "வீட்டு அண்ணா" போட்ட சாலையாக நினைத்து ஆங்காங்கே ப்ளெக்ஸ் போர்டுகளும், வரவேற்பு மேளதாளங்களும் செய்து உங்கள் விடுதலையை மறக்க முடியாதபடி எங்களை சாலையில் 3 மணி நேரத்திற்கு மேல் சிறை வைத்தனர். வெயிலின் கொடுமை ஒரு பக்கமும், வண்டியை எந்தப்பக்கமும் திரும்பிச் செல்ல முடியாதபடி கடும் வாகனப்புகை சூழ குழந்தைகளுடன் இரு சக்கர வாகனத்தில் மாட்டிக்கொண்ட பெண்களும், வயதானவர்களும் பட்ட அவஸ்தையை அரசியல்வாதிகளும், போலீசாரும் அனுபவித்தால் மட்டுமே தெரியும் அந்தக்கொடுமை. நெரிசலில் சிக்காத 108 அவசர வண்டிகளும் எமனிடம் சிக்காத நோயாளிகளும் மிகவும் குறைவு.

நேற்று ஆளுனரை ஜெயலலிதா சந்திக்கும் செய்தி தெரிந்தும் பாதுகாப்பில், போக்குவரத்தில் குளறுபடி செய்தது ஏன்? போயேஸ் கார்டனில் இருந்து புறப்படும் தகவல் போலீசுக்கு தெரியாதா? ஒரே இடத்தில் நூற்றுக்கும் மேற்பட்ட போலீசுக்கு மேல் நின்று கொண்டு மற்ற இடங்களில் போக்குவரத்தை சரி செய்யத் தவறியது மக்களின் போக்குவரத்தை சிக்கலாக்கி விட்டது.

தங்களது பிறந்தநாள், கட்சி கூட்டத்திற்கு வருகை, தலைமைச் செயலக வருகை, திருமண விழாவிற்கு வருகை என எங்கு சென்றாலும் போக்குவரத்து நெரிசல் ஏற்படும் என்று சொல்லும் அளவிற்கு போலீஸ் தங்களது போக்குவரத்தில் மட்டுமே கவனமாக இருந்தனர்.

நீங்கள் வீட்டை விட்டு வெளியே வந்தால் மக்கள் வீட்டில் முடங்க வைக்கும் அளவிற்கு போக்குவரத்து நெரிசலை கொடுப்பது நியாயமா? உங்களுக்காக எந்த பலனும் எதிர்பார்க்காமல் நீங்கள் வழக்கில் வெற்றி பெற மொட்டை போட்டவர்களை மொட்டை வெயிலில் மூன்று மணி நேரம் தவிக்க விடுவது நியாயமா? அன்றாடம் மிதிபட்டு, இடி பட்டு ரயில், பேருந்தில் பயணம் செய்யும், இரு சக்கர வாகனத்தில் சிரமத்துடன் வேலைக்குச் செல்லும் சராசரி மனிதர்களை என்றைக்குத் தான் முதல்வர் மனமிறங்கி போக்குவரத்தை எளிதாக்குவாரோ என சென்னைவாசிகள் புலம்பி வருகின்றனர். உங்கள் அருகில் இருக்கும் அமைச்சர்கள், போலீஸ் உயர் அதிகாரிகள் யாராவது ரயில், பேருந்து, இரு சக்கர வாகனத்தில் சீருடை அணியாமல் பயணம் செய்து பார்த்தல் அந்த “கொடுமையான அனுபவம்” தெரிந்து எளிமையாக வாழ வழி விடுவார்கள். அதற்குத்தான் வாய்ப்பே இல்லையே.

இனி ஒவ்வொரு நாளும் சட்டமன்றம் கிளம்பும்போதெல்லாம் போக்குவரத்து நெரிசலா என்று வாகன ஓட்டிகள் புலம்புவது தேவையா? பல கோடி பேர் ஓட்டளித்து வெற்றி பெற்ற உங்களுக்கு மக்கள் தானே பாதுகாப்பு. புரட்சித் தலைவர் எம்.ஜி.ஆர். யாரையும் போக்குவரத்து சிக்கலில் கஷ்டப்படுதியதில்லை, ஆட்சி முடங்கினாலும் மக்களின் இயல்பு வாழ்க்கையை, போக்குவரத்தை முடக்காத எளிமையான முதல்வராக, மக்கள் மனதில் நீங்கா இடம் பெற்று விட்டார் முன்னாள் முதல்வர் பன்னீர் செல்வம்,

வருங்காலத்திலாவது, போக்குவரத்து முடங்காமல் துரிதமாக இருக்கிறது, முதல்வர் வருகையால் போக்குவரத்து வசதிகள் தரமாகவும், சீராக உள்ளது என்று மக்கள் சொல்லும் அளவிற்கு போலீசார் நவீன போக்குவரத்து சாதனங்களை பயன்படுத்தியும், துல்லியமான தகவல் தொடர்பு சாதனங்கள் மூலம் முதல்வர் வருகையால் பொது மக்கள் பாதிப்படையாமல் திட்டமிட வேண்டியது மிக மிக அவசியம். சென்னை போன்ற பெரு நகரத்தில் முதல்வரின் வருகையால் அன்றாடம் போக்குவரத்து நெரிசல் செய்தி மக்கள் இயல்பு வாழ்க்கை பாதிப்படைவதோடு முதல்வர் மீதான நல் எண்ணத்தையும் பாதிக்கும்.

உங்களுக்கு கட்சியினர் மட்டும் ஓட்டு போட்டு நீங்கள் வெற்றிபெறவில்லை. பொது மக்களாகிய நாங்களும் ஒட்டு போட்டதால்தான் நீங்கள் வெற்றி பெற்றீர்கள் என்பதை நினைவு படுத்த விரும்புகிறேன். இலவசம் கொடுத்து எங்களை சந்தோஷப் படுத்துவதைவிட, இதுபோன்ற போக்குவரத்து இம்சைகளை கொடுக்காமல் இருந்தாலே போதும். சந்தோஷத்தை விட வாழ்வில் நிம்மதியே முக்கியம். ஆர்ப்பாட்டமான அரசியலையும், கட்சியினரின் அடவடியையும் மக்கள் விரும்புவதில்லை. மக்களின் கஷ்டம் தீர ,"மக்களுக்காக உழைக்க" 5வது முறையாக முதல்வராகும் உங்களுக்கு நல் வாழ்த்துக்கள்!!.

விகடன்!