போக்குவரத்து விளக்கு உருவான கதை..!

முதலாவது தானியங்கிப் போக்குவரத்து விளக்கு இங்கிலாந்தில்
நிறுவப்பட்டது.

நம் அன்றாட வாழ்வில் சாலைகளில் ஏற்படும் போக்குவரத்து
நெரிசல்களை கட்டுப்படுத்த வண்ண விளக்குகள் பொருத்தப்பட்ட
எச்சரிக்கை விளக்கு (சிக்னல்) கம்பத்தை சாலையில்
பார்த்திருக்கிறோம். இவ்விளக்குகள் 3 வண்ணங்களில் அமைந்திருக்கும்.

அவை முறையே சிவப்பு, மஞ்சள் மற்றும் பச்சை ஆகியன. ஆனால்
இவை எப்பொழுது, எங்கே, யாரால்? கண்டுபிடிக்கப்பட்டது என்பதை
பலரும் அறிந்திருப்பதில்லை.

அது பற்றி பார்ப்போம்..!

19-ம் நூற்றாண்டில் ரெயில்களின் ஓட்டத்தைக் கட்டுப்படுத்த
வெள்ளோட்ட முயற்சியாக சிவப்பு, பச்சை, மஞ்சள் வண்ண விளக்குகள்  
பயன்படுத்தப்பட்டன. விபத்துகளையும், ரெயில்கள் ஒன்றோடு ஒன்று
மோதுவதையும் தவிர்ப்பதற்கு எச்சரிக்கை விளக்கு தேவைப்பட்டது.

அபாயத்தைக் குறிப்பதற்கு ஆயிரக்கணக்கான ஆண்டுகளாகச்
சிவப்பு வண்ணம் பயன்படுத்தப்பட்டு வந்ததால், ‘நிறுத்துவதற்கு’
அது எளிதாகத் தேர்ந்தெடுக்கப்பட்டது.

உருவான கதை

கே.பி.நைட் என்பவர் லண்டன் மாநகரில் 1868-ம் ஆண்டு சாலைப்
போக்குவரத்து எச்சரிக்கை விளக்குகளை கண்டுபிடித்தார்
மக்கள் நெரிசல் மிகுந்த சாலைகளில் இவ்விளக்குகள் நிறுவப்பட்டன
இதில் வேடிக்கை என்னவென்றால் அந்நாளில் தானியங்கிப்
போக்குவரத்து வாகனங்கள் சாலைகளில் ஓடிக்கொண்டு இருக்கவில்லை.

குதிரையை அல்லது குதிரை பூட்டிய வண்டிகளை மட்டுமே மக்கள்
பயன்படுத்தி வந்தனர். சிவப்பு, பச்சை ஆகிய இரு வண்ணங்கள் மட்டும்
அப்போது பயன்படுத்தப்பட்டு வந்தன. உருளையில் நிரப்பப்பட்ட
வாயுவினால் தான் அவ்விளக்குகள் எரிந்தன. இவ்வமைப்பு அப்போது
பெரிய அளவில் வெற்றி பெறவில்லை என்று தான் கூறவேண்டும்.
பின்பு இவரின் விடா முயற்சி வெற்றியை தந்தது.

முதன் முதலில்

அமெரிக்காவின் மிக்சிகன் நகரில் வாகனப் போக்குவரத்து நெரிசல்
மிக அதிகமாகி கட்டுப்படுத்த முடியாமல் போன நிலையில், காவல்
துறையைச் சார்ந்த வில்லியம் பாட்ஸ் என்பவர் ரெயில்வே
சமிக்ஞைகளின் அடிப்படையில் போக்குவரத்து விளக்குகளை அமைக்க
முயற்சி செய்தார்.

சிவப்பு, பச்சை மற்றும் காவி பூசிய மஞ்சள் ஆகிய நிறங்களுடன் கூடிய
விளக்குகளை நிறுவி இவர் தமது முயற்சியில் 1920-ம் ஆண்டு வெற்றி
பெற்றார்.

முதலாவது தானியங்கிப் போக்குவரத்து விளக்கு இங்கிலாந்தில்
நிறுவப்பட்டது. தென்இந்தியாவில் முதல் முதலாக 1953-ம் ஆண்டு
சென்னை எழும்பூரில் நிறுவப்பட்டது என்பது குறிப்பிடத்தக்கது.

நம் அன்றாட வாழ்வில் பார்க்கின்ற போக்குவரத்து எச்சரிக்கை
விளக்குகளுக்கு இவ்வளவு பெரிய கதையா? என்று வியக்க
வைக்கிறதல்லவா! விளக்கின் வரலாறு தெரிந்து கொண்டதோடு
நில்லாமல், விளக்கு சொல்லும் சமிக்ஞையின்படி செயல்பட்டு
விபத்துகளை தவிர்ப்போம்! 
-
------------------------------------
தினத்தந்தி