தமிழக அரசு அலுவலகங்களில் 300 மெகாவாட் மிச்சப்படுத்தலாம்

-
மின் சிக்கனத்தை கடைபிடிக்க, அரசு அலுவலகங்களில், சாதாரண டியூப் லைட்டிற்கு பதில், எல்.இ.டி., பல்ப் பொருத்துமாறு, மின் வாரிய அதிகாரிகள் வேண்டுகோள் விடுத்துள்ளனர்.
–
தமிழகத்தில், மின் தேவை, உற்பத்தியை விட அதிகம் உள்ளதால், மின் பற்றாக்குறை நிலவுகிறது. இதை சமாளிக்க, மின் வாரியம் சார்பில், மின் தடை, மின் கட்டுப்பாடு உள்ளிட்ட, பல நடவடிக்கைகள் எடுக்கப்பட்டு வருகின்றன. தற்போது, ‘லைட் எமிடிட்டிங் டியோட்ஸ் – எல்.இ.டி.,’ என்ற, நவீன பல்ப், குறைந்த மின்சாரத்தில், அதிக வெளிச்சத்தை தருகிறது. அதன்படி, 40 வாட்ஸ் திறன் கொண்ட, சாதாரண டியூப் லைட்டில் கிடைக்கும் வெளிச்சம், 20 வாட்ஸ் ‘காம்பேக்ட் புளோராசென்ட் லேம்ப் – சி.எப்.எல்.,’ – 10 வாட்ஸ் எல்.இ.டி., பல்பில் கிடைக்கிறது. மேலும், 40 வாட்ஸ் சாதாரண டியூப் லைட், 22 மணி நேரம்; 20 வாட்ஸ் சி.எல்.எல்., 44 மணி நேரம்; 10 வாட்ஸ், எல்.இ.டி., பல்ப், 96 மணி நேரம் எரியும் போது, ஒரு யூனிட் மின்சாரம் செலவாகிறது. இதையடுத்து, அரசு அலுவலகங்களில், சாதாரண டியூப் லைட்டிற்கு பதில், எல்.இ.டி., பல்ப் பயன்படுத்துமாறு, மின் வாரிய அதிகாரிகள் சார்பில், பல துறை அதிகாரிகளுக்கு கோரிக்கை விடுக்கப்பட்டுள்ளது.
–
இதுகுறித்து, எரிசக்தி துறை அதிகாரி ஒருவர் கூறியதாவது: தமிழகத்தில், மின் இணைப்பு பெற்றுள்ள, எட்டு லட்சம் குடிசை வீடுகளுக்கு, மின் வாரியம் சார்பில், இலவசமாக சி.எப்.எல்., பல்ப் வழங்கியதன் மூலம், நாள்தோறும், 50 மெகாவாட் மின்சாரம் சிக்கனம் செய்யப்பட்டு உள்ளது. சாதாரண சி.எப்.எல்., பல்புடன் ஒப்பிடும் போது, எல்.இ.டி., பல்ப் விலை சற்று அதிகமாக உள்ளது. ஆனால், அதன் ஆயுட்காலமும், பயன்பாடும் அதிகம் உள்ளது. எனவே, அரசு துறைகள், உள்ளாட்சி அமைப்புகள் என, ஒரு லட்சம் மின் இணைப்புகளில், எல்.இ.டி., பல்ப் பொருத்துவதன் மூலம், நாள்தோறும், 250 – 300 மெகாவாட் மின்சாரம் சிக்கனமாகும். இவ்வாறு, அவர் கூறினார்.
-
தலைமை அலுவலகம்:
–

–

சென்னை, மின் வாரிய தலைமை அலுவலகத்தில், எல்.இ.டி., பல்ப் பொருத்துவதற்காக, 16 வாட்ஸ் திறன் கொண்ட, நான்கு அடி நீளம் உடைய, 710 எல்.இ.டி., டியூப் லைட் வாங்க, அதிகாரிகள் முடிவு செய்து உள்ளனர். மேலும், ஏழு மண்டலம்; 37 மின் பகிர்மான வட்டம், 2,600 பிரிவு அலுவலகங்களிலும், எல்.இ.டி., பல்ப் பொருத்தப்பட உள்ளது.

– நமது நிருபர் -தினமலர்