இந்தியா - இலங்கை இடையே அணுசக்தி ஒப்பந்தம் கையெழுத்தானது

நான்கு நாள் அரசு முறை பயணமாக இந்தியா வந்துள்ள இலங்கை அதிபர் மைத்ரிபாலா சிறிசேனாவும் இந்திய பிரதமர் நரேந்திர மோடியும் அணுசக்தி ஒப்பந்தம் உள்ளிட்ட முக்கிய பிரச்சனைகள் குறித்து இன்று பேச்சுவார்த்தை நடத்தினர்.

ஐதராபாத் மாளிகையில் நடந்த இந்த சந்திப்பில் இலங்கை அதிபர் சிறிசேனா மற்றும் பிரதமர் நரேந்திர மோடி இருவரும் பொருளாதார உறவுகளை மேம்படுத்தும் நடவடிக்கைகள் குறித்தும், அணுசக்தி ஒத்துழைப்பு, கலாச்சாரம் மற்றும் விவசாயம் உள்ளிட்ட துறைகளுக்கான நான்கு முக்கிய ஒப்பந்தங்கள் குறித்தும் விவாதிக்கப்பட்டதாக வெளியுறவுத்துறை அமைச்சகத்தின் செய்தி தொடர்பாளர் சையத் அக்பருதீன் தெரிவித்தார்.

கடந்த ஜனவரி 9ம் தேதி அதிபராக பதவி ஏற்றுக்கொண்ட சிறிசேனாவுக்கு பிரதமர் மோடி வாழ்த்து தெரிவித்ததுடன், இந்தியாவிற்கு வரும்படி அழைப்பு விடுத்திருந்தார். இந்நிலையில் தனது மனைவி ஜெயந்தியுடன் இலங்கை அதிபர் நேற்று இந்தியாவிற்கு வருகை புரிந்தார்.

விமான நிலையத்தில் அவருக்கு சிறப்பான வரவேற்பு அளிக்கப்பட்டது. காலை 10 மணிக்கு குடியரசு தலைவர் மாளிகைக்கு சென்ற அவர், முன்னதாக வெளியுறவுத்துறை அமைச்சர் சுஷ்மா ஸ்வராஜை அவர் சந்தித்து பேசினார். அப்போது, இந்தியா - இலங்கை இடையேயான நல்லுறவு குறித்து பேச்சுவார்த்தை நடத்தப்பட்டது.

ஐதராபாத மாளிகையில் நடந்த சந்திப்புக்கு பின்னர் இரு நாட்டு தலைவர்களும் பத்திரிகையாளர்களிடம் பேசினர். இதில் அணுசக்தி ஒப்பந்தம் கையெழுத்தான விவரம் தெரிவிக்கப்பட்டது. பத்திரிகையாளர்களிடம் பேசிய மோடி, மீனவர் பிரச்சனைக்கு நிரந்தர தீர்வு காணப்படும் என்று உறுதி கூறினார். பத்திரிகையாளர் சந்திப்புக்கு பின்னர் மாலை குடியரசு தலைவர் அளிக்கும் விருந்தில் இலங்கை அதிபர் சிறிசேனா பங்கேற்கிறார்.

நாளை பீகார் மாநிலம், புத்தகயாவுக்கு சென்று புத்த மத தலத்தில் வழிபாடு செய்யும் அவர் இரவு திருப்பதி கோயிலுக்கு சென்று அங்கிருந்து கொச்சி வழியாக இலங்கை செல்கிறார். இலங்கை அதிபராக பதவியேற்ற பின்பு, சிறிசேனா மேற்கொள்ளும் முதல் வெளிநாட்டுப் பயணம் இது என்பது குறிப்பிடத்தக்கது.

இலங்கையை நாம் எந்தவிதத்திலும் கோபமாகவே/கனிவாகவோ கூட மிரட்ட முடியாது
போலிருக்கு மத்தியில் எந்த அரசு வந்தாலும் பாவப்பட்டவர்கள் தமிழ்நாட்டு
மீனவர்களே