அரசியல் சாக்கடை வேண்டாம்: அன்னா ஹசாரே அலறல்

மும்பை:''அரசியல் சாக்கடையில் மூழ்க விருப்பமில்லை,'' என, சமூக ஆர்வலர் அன்னா ஹசாரே கூறியுள்ளார்.

ஊழலுக்கு எதிராக சமூக ஆர்வலர் அன்னா ஹசாரே போராட்டம் நடத்தியபோது, அவருடன் சேர்ந்து போராடியவர்கள், அரவிந்த் கெஜ்ரிவாலும், கிரண் பேடியும். தற்போது, கெஜ்ரிவால், ஆம் ஆத்மி என்ற கட்சியைத் துவங்கி, அதன் தலைவராகி விட்டார். கிரண் பேடி, பா.ஜ.,வில் சேர்ந்து விட்டார். இந்நிலையில், அரசியலில் சேருவது குறித்து தகவல் தெரிவிக்க, அன்னா ஹசாரேவுக்கு போன் செய்ததாகவும், ஆனால், அவர் பதில் அளிக்க மறுத்து விட்டதாகவும், கிரண் பேடி கூறியிருந்தார்.

இதுகுறித்து, அன்னா ஹசாரே கூறியதாவது:அரசியல் ஒரு சாக்கடை; அதில் மூழ்க எனக்கு விருப்பம் இல்லை. அதில், மற்றவர்கள் சேருவது குறித்து, எந்த கருத்தும் தெரிவிக்க விரும்பவில்லை. கிரண் பேடி விஷயம் குறித்தும் பதில் அளிக்க விரும்பவில்லை. ஜன் லோக்பால் தொடர்பாக, விரைவில் மீண்டும் போராட்டத்தை துவக்குவேன். அதற்கான தேதி, விரைவில் அறிவிக்கப்படும். இந்த போராட்டத்தில், என்னுடன் யார் யார் இருப்பர் என்பது பற்றியும் விரைவில் அறிவிப்பேன். இவ்வாறு, ஹசாரே கூறினார்.

இதற்கிடையே பா.ஜ., சார்பில், டில்லி சட்டசபைத் தேர்தலுக்கான, முதல்வர் வேட்பாளராக அறிவிக்கப்பட்டுள்ள, முன்னாள் ஐ.பி.எஸ்., அதிகாரி கிரண் பேடி, கிருஷ்ணா நகர் தொகுதியில், நேற்று வேட்புமனு தாக்கல் செய்தார். அவருடன், மத்திய அமைச்சரும், பா.ஜ., மூத்த தலைவருமான ஹர்ஷவர்த்தன் மற்றும் கட்சி நிர்வாகிகள் வந்திருந்தனர்.


கிரண் பேடி வசம் 5 கிராம் தங்கம் மட்டுமே!
ஆனால் சொத்து மதிப்பு 12 கோடி ரூபாய்டில்லி சட்டசபை, பா.ஜ., முதல்வர் வேட்பாளராக அறிவிக்கப்பட்டுள்ள கிரண் பேடியிடம், 5 கிராம் தங்க நகை மட்டுமே உள்ளது. எனினும், அவர் வசம், 12 கோடி ரூபாய் சொத்துகள் உள்ளன. டில்லியில் உள்ள கிருஷ்ணா நகர் தொகுதியில் போட்டியிடும், நாட்டின் முதல் பெண், ஐ.பி.எஸ்., அதிகாரியான கிரண் பேடி (ஓய்வு), நேற்று வேட்பு மனு தாக்கல் செய்தார். அதனுடன் அவரின் சொத்து பட்டியலையும் இணைத்துள்ளார்.
அதன் விவரம்:
அசையும் சொத்து 3.15 கோடி ரூபாய்
5 கிராம் தங்க நாணயம் 25 ஆயிரம் ரூபாய்
கணவரின் அசையும் சொத்து 33 லட்சம் ரூபாய்
அசையா சொத்துகள் 6 கோடி ரூபாய்
துவாரகா, உதய் பார்க்,
கவுதமபுத்தா நகரில் தலா 1 வீடு
கார் - மாருதி 800 1
விவசாய நிலம் - புனே,
குர்கான் - மதிப்பு 2 கோடி ரூபாய்
கணவரின் விவசாய
நிலம் - அமிர்தசரஸ் - 25 லட்சம் ரூபாய்
ரொக்கம் 56 ஆயிரம் ரூபாய்
கணவர் வசம் 15 ஆயிரம் ரூபாய்
பிக்சட் டெபாசிட் 2.10 கோடி ரூபாய்
சேமிப்பு கணக்கு 25 லட்சம் ரூபாய்