5 ஆண்டுகளில் இல்லாத சரிவு; மொத்த விலை பணவீக்கம் குறைவு !

5 ஆண்டுகளில் இல்லாத சரிவு; மொத்த விலை பணவீக்கம் குறைவு !



புதுடில்லி: புதிய அரசு பொறுப்பேற்றது முதல் பொருளாதாரம் சீர் அடையும், மெல்ல, மெல்ல சீரான நிலையை நோக்கி நகரும் என எதிர்பார்த்தது போல் சமீபத்திய 3 மாதங்களில் பொருளாதார முன்னேற்றம், பணவீக்கம் சரிவு, டாலருக்கான ரூபாய் மதிப்பும் ஒரளவுக்கு ஏறியும், இறங்கியும் வந்த வண்ணம் உள்ளது. இது நல்ல முன்னேற்றமாக இருக்கும் என பொருளாதார நிபுணர்கள் எதிர்பார்க்கின்றனர்.

தீபாவளி நெருங்கி வரும் வேளையில், சாமானிய மக்களுக்கு மகிழ்ச்சி அளிக்கும் விதமாக, கடந்த செப்டம்பரில், சில்லரை விலை பணவீக்கம், 6.46 சதவீதமாக குறைந்துள்ளது.குறிப்பாக, பழங்கள் மற்றும் காய்கறிகள் விலை வீழ்ச்சி கண்டதையடுத்து, சில்லரை விலை பணவீக்கம் வெகுவாக குறைந்துள்ளது.


கடந்த, 2012ம் ஆண்டு ஜனவரியில், நுகர்வோர் விலை குறியீட்டு எண் அடிப்படையில், சில்லரை விலை பணவீக்கம் கணக்கிட துவங்கியதிலிருந்து, கடந்த செப்டம்பரில் தான், இப்பணவீக்கம் இந்த அளவிற்கு சரிவடைந்துள்ளது.கடந்த செப்டம்பரில், ஒட்டு மொத்த உணவுப் பொருட்களுக்கான பணவீக்கம், 7.67 சதவீதமாக வீழ்ச்சி கண்டுள்ளது. இது, முந்தைய ஆகஸ்ட் மாதத்தில், 9.35 சதவீதமாகவும், கடந்தாண்டு செப்டம்பரில், 11.75 சதவீதமாகவும் அதிகரித்து காணப்பட்டது.கடந்த ஆகஸ்ட் மாதத்தில், சில்லரை விலை பணவீக்கம், மறுமதிப்பீட்டில், 7.73 சதவீதமாக குறைக்கப்பட்டுள்ளது.

இது, முன், 7.80 சதவீதமாக மதிப்பிடப்பட்டிருந்தது. கடந்த செப்டம்பரில், காய்கறிகளுக்கான சில்லரை விலை பணவீக்கம், 8.59 சதவீதமாக குறைந்துள்ளது; இது, முந்தைய ஆகஸ்டில், 15.15 சதவீதம் என்ற அளவில் அதிகரித்து காணப்பட்டது.இதே போன்று, பழங்களுக்கான பணவீக்கமும், 24.27 சதவீதத்திலிருந்து, 22.40 சதவீதமாக குறைந்துள்ளது. மேலும், முட்டை, மீன், இறைச்சி உள்ளிட்ட புரதச் சத்து நிறைந்த உணவு பொருட்களுக்கான பணவீக்கமும் குறிப்பிடத்தக்க அளவிற்கு குறைந்துள்ளது.

கடந்த செப்டம்பரில், நகர்ப்புற நுகர்வோருக்கான பணவீக்கம், 6.34 சதவீதமாகவும், கிராமப்புற நுகர்வோருக்கான பணவீக்கம், 6.68 சதவீதமாகவும் குறைந்துள்ளன என, மத்திய புள்ளியியல் மற்றும் திட்ட அமலாக்கத் துறை தெரிவித்துள்ளது. இது, ஆகஸ்ட் மாதத்தில் முறையே, 7.04 சதவீதம் மற்றும் 8.27 சதவீதம் என்ற அளவில் அதிகரித்து காணப்பட்டது.

இந்நிலையில் மொத்த விலை பணவீக்கம் கடந்த 5 ஆண்டுகளில் இல்லாத அளவிற்கு 2. 38, சதவீதமாக சரிந்துள்ளது.கடந்த செம்டம்பரில் உணவுப்பொருள் பணவீக்கம் 3. 74ஆக இருந்தது. சர்வதேச அளவில் கச்சா எண்ணெய் பொருட்கள் விலை குறைந்ததால் எரிபொருள் பணவீக்கமும் சரிந்து வருகிறது. மேலும் உணவு பொருட்கள் பணவீக்கமும் குறைந்துள்ளது. இதுவே மொத்த பணவீக்கத்தின் சரிவுக்கு காரணமாகும்.

தினமணி

செய்தி இப்படி போட்டிருக்காங்க........ஆனால் காய்கறி பழம் விலை குறைந்தது போல எனக்கு தெரியலை..............டாலரும் பவுண்டும் stabel ஆக இருக்கு :)