தமிழகத்தில் வேகமாக பரவும் 'டெங்கு': அலட்சியம் காட்டினால் ஆபத்து

சென்னை : கொசு ஒழிப்பில் சிறப்புக் கவனம் செலுத்தாததால், தமிழகம் முழுவதும், டெங்கு பாதிப்பு வேகமாக பரவி வருகிறது. விழுப்புரத்தில் பெண் ஒருவர் இறந்துள்ள நிலையில், தடுப்பு நடவடிக்கைகளில், அரசு தீவிரம் காட்ட வேண்டிய அவசியம் ஏற்பட்டு உள்ளது.

தமிழகத்தில், கடந்த இரண்டு மாதங்களாகவே, ஆங்காங்கே காய்ச்சல் ஏற்பட்டு வருகிறது. அத்துடன் உடல் சோர்வு, மூட்டு வலியும் இருப்பதால், எந்த மாதிரியான காய்ச்சல் என்று தெரியாமல், மக்கள், அரசு, தனியார் மருத்துவமனைக்கு அலைந்து திரிகின்றனர்.

விரிவான கட்டுரை :

தமிழகத்தில், டெங்கு அறிகுறி, ஜூன் மாதத்திலேயே ஏற்பட்டது. தர்மபுரி மாாவட்டம், ஜம்புகானாகோட்டை பகுதியில், பலர் டெங்கு காய்ச்சலுக்கு பாதிக்கப்பட்டனர். 'தமிழக அரசு, நோய் தடுப்பில் கவனம் செலுத்தா விட்டால், செப்., மாதங்களில் இதன் பாதிப்பு அதிகமாகும்; உயிரிழிப்புக்கு வழிவகுத்து விடும்' என, ஜூன் 25ல், 'தினமலர்' நாளிதழில், விரிவான கட்டுரை வெளியானது.ஆனால், 'இரண்டு ஆண்டுகளாக, டெங்கு உயிரிழப்பே இல்லை, தடுப்பு நடவடிக்கைகள் எடுக்கப்பட்டு வருகிறது' என, தமிழக அரசு அறிவித்தது.இந்நிலையில், டெங்கு பாதிப்பு, தமிழகம் முழுவதும் வேகமாக பரவி வருகிறது. விழுப்புரம் மாவட்டம், விக்கிரவாண்டி பகுதியில், குணசுந்தரி, 50, டெங்கு காய்ச்சலுக்கு பலியாகி உள்ளார். மேலும், 10க்கும் மேற்பட்டோர், டெங்கு காய்ச்சலால் சிகிச்சை பெற்று வருவதை, சுகாதாரத் துறை அதிகாரிகள் உறுதி செய்துள்ளனர்.தர்மபுரி, மதுரை, திருச்சி, புதுக்கோட்டை, கிருஷ்ணகிரி, விழுப்புரம், திண்டுக்கல் மற்றும் கன்னியாகுமரி போன்ற மாவட்டங்களில், பாதிப்பு அதிகமாக உள்ளது.

காரணம் என்ன?

வெப்பச்சலனத்தால், ஆங்காங்கே விட்டு விட்டு மழை பெய்ததால், டெங்குவுக்கு காரணமான, 'ஏடிஸ்' வகை கொசுக்கள் உருவாகி விட்டன. இதை கட்டுப்படுத்த சிறப்புக் கவனம் செலுத்தாததே, தற்போதைய சிக்கலுக்கு காரணம் என, கூறப்படுகிறது.இரண்டு ஆண்டுகளுக்கு முன், இதே கால கட்டத்தில் தான் (ஆகஸ்டு முதல் அக்டோபர் வரை), தமிழகம் முழுவதும் டெங்கு காய்ச்சல் அதிகமாகி, 66 பேர் இறந்தனர். திணறிய தமிழக அரசு, நிலவேம்பு கஷாயம், பப்பாளி இலைச்சாறு கொடுத்து, நிலைமையை கட்டுக்குள் கொண்டு வந்தது.அதுபோன்ற நிலை மீண்டும் வராமல் இருக்க, தமிழக அரசு, இனியாவது டெங்கு பாதிப்பைக் கட்டுப்படுத்த, சிறப்புக் கவனம் செலுத்த வேண்டும் என்பதே, மக்களின் எதிர்பார்ப்பு.

இதுகுறித்து, சுகாதாரத் துறை உயரதிகாரி ஒருவர் கூறுகையில், 'டெங்கு பாதிப்பைத் தடுக்க, எல்லா முயற்சிகளும் எடுக்கப்பட்டு வருகின்றன. விழுப்புரத்தில் பாதிக்கப்பட்டோருக்கு, ரத்த மாதிரிகள் எடுத்து, பரிசோதனைக்கு அனுப்பி உள்ளோம். அரசு, தனியார் மருத்துவமனைகளில், காய்ச்சலால் வருவோர் பற்றி ஆய்வு செய்து, பாதிப்பு அதிகம் உள்ள பகுதிகளில் சிறப்புக் கவனம் செலுத்தப்படுகிறது. மக்கள் அச்சம் அடைய தேவையில்லை' என்றார்.

தர்மபுரியில் 50 பேர் பாதிப்பு:

தர்மபுரி மாவட்டம், அரூர், வீரப்பநாயக்கன்பட்டியை அடுத்த, பாளையம் கிராமத்தில், சிறு குழந்தைகள், முதியோர் என, 50க்கும் மேற்பட்டோர், மர்மக் காய்ச்சலால் பாதிக்கப்பட்டு உள்ளனர். பலர் வீடுகளில் முடங்கி உள்ளனர்.ஆரம்ப சுகாதார நிலையத்தில், போதிய வசதி இல்லாததால், 20 கி.மீ., தூரம் தாண்டி தனியார் மருத்துவமனை செல்லும் நிலை உள்ளது. 'மாவட்ட நிர்வாகம், சுகாதார அதிகாரிகளுக்கு தகவல் தெரிவித்தும், கண்டு கொள்ளவில்லை. கிராமத்தில் சிறப்பு முகாம் நடத்தி, உயர் சிகிச்சை பெற நடவடிக்கை எடுக்க வேண்டும்' என, பொதுமக்கள் வலியுறுத்தி உள்ளனர்.