13-வது உலகக் கோப்பை ஹாக்கி 2014

First topic message reminder :

உலகக் கோப்பை ஹாக்கி போட்டித் தொடர், நெதர்லாந்தில் நடைபெறுகிறது. 12-வது உலகக் கோப்பையை ஆஸ்திரேலியா கைப்பற்றி நடப்புச் சாம்பியனாக உள்ளது.

13-வது உலக கோப்பை ஆடவர் ஹாக்கி போட்டித் தொடரில், தகுதி சுற்றுகள் மூலம் வெற்றி பெற்ற 12 அணிகள் பங்கேற்கின்றன. இத்தொடர், ஜூன் 15-ம் தேதி வரை நடைபெறவுள்ளது.

இரு பிரிவாக பிரிக்கப்பட்டுள்ள இத்தொடரில், 'A' பிரிவில் நடப்பு சாம்பியன் ஆஸ்திரேலியா, இங்கிலாந்து, பெல்ஜியம், இந்தியா, ஸ்பெயின், மலேசியா ஆகிய அணிகளும், 'B' பிரிவில் நெதர்லாந்து, ஜெர்மனி, நியூசிலாந்து, தென் கொரியா, ஆர்ஜென்டினா, தென் ஆப்பிரிக்கா ஆகிய அணிகளும் இடம் பெற்றுள்ளன.

ஒவ்வொரு பிரிவிலும் இடம்பெற்றுள்ள அணிகள், தங்கள் பிரிவில் உள்ள மற்ற அணிகளுடன் தலா ஒரு முறை மோத வேண்டும். லீக் ஆட்டங்களின் முடிவில் ஒவ்வொரு பிரிவிலும் முதல் 2 இடங்களை பிடிக்கும் அணிகள் அரையிறுதிக்கு முன்னேறும்.

இந்திய அணி தனது முதல் ஆட்டத்தில் இன்று பெல்ஜியத்திடம் மோதி தோல்வியடைந்துள்ளது, மேலும் ஜூன் 2-ந் தேதி இங்கிலாந்தையும், 5-ந் தேதி ஸ்பெயினையும், 7-ந் தேதி மலேசியாவையும், 9-ந் தேதி ஆஸ்திரேலியாவையும் எதிர்கொள்ளவுள்ளது.

இறுதிப் போட்டி வரையிலான தகவல்களை இங்கு தொகுத்து வழங்க உள்ளேன். மற்றவர்களும் தங்களின் ஹாக்கி உலகக் கோப்பை தகவல்களை இப்பகுதியில் பதிவிடலாம்.

மேலும் தகவல்களுக்கு: http://en.wikipedia.org/wiki/2014_Men%27s_Hockey_World_Cup

Tags: #உலகக்கோப்பை #ஹாக்கி #2014 #இந்தியா #பெல்ஜியம் #நெதர்லாந்து

உலகக் கோப்பை ஹாக்கி: வரலாறு படைத்தது அர்ஜென்டீனா

நெதர்லாந்தில் நடைபெற்று வரும் உலகக் கோப்பை ஹாக்கிப் போட்டியில் தென் ஆப்பிரிக்க அணியை 5-1 என்ற கோல் கணக்கில் வீழ்த்தி அர்ஜென்டீனாமுதல் முறையாக உலகக் கோப்பை போட்டிகளில் அரையிறுதிக்குள் நுழைந்து வரலாறு படைத்துள்ளது.

இந்த வெற்றியின் மூலம் மற்றொரு முதன்மை அணியான ஜெர்மனி அரையிறுதி வாய்ப்பை இழந்துள்ளது.

5 போட்டிகளில் 4-ல் வென்று அர்ஜென்டீனா 12 புள்ளிகள் பெற்று அரையிறுதி வாய்ப்பை ஜெர்மனியிடமிருந்து தட்டிப்பறித்துள்ளது.

பிரிவு பி-யில் நெதர்லாந்து அணி முதலில் அரையிறுதிக்குத் தகுதி பெற்றது. பிரிவு ஏ-யில் இங்கிலாந்து, ஆஸ்திரேலிய அணிகள் அரையிறுதிக்கு முன்னேற பிரிவு பி-யில் அர்ஜென் டீனா மற்றும் நெதர்லாந்து அரையிறுதிக்கு முன்னேறியுள்ளது.

உலகக் கோப்பை ஹாக்கி வரலாற்றில் ஜெர்மனி அரையிறுதிக்குத் தகுதி பெறாமல் வெளியேறுவது இதுவே முதல் முறை. இதற்கு முன்பு முதல் ஹாக்கி உலகக் கோப்பை போட்டிகள் 1971ஆம் ஆண்டு நடைபெற்றபோது கென்யா தகுதி பெற்று மேற்கு ஜெர்மனியை வெளியேற்றியது.

இதற்கு முன்பு உலகக் கோப்பை ஹாக்கி தொடரில் அர்ஜென்டீனா 1986 மற்றும் 2002ஆம் ஆண்டு 6ஆம் இடம் பிடித்ததே அந்த அணியின் சிறப்பாக இருந்தது.

உலக கோப்பை ஹாக்கி 9-வது இடத்துக்கான ஆட்டத்தில் இந்தியா-தென் கொரியா

உலக கோப்பை ஹாக்கி போட்டி நெதர்லாந்து நாட்டில் உள்ள ஹாக் நகரில் நடந்து வருகிறது. லீக் ஆட்டங்கள் நேற்றுடன் முடிந்தன.

லீக் முடிவில் ‘ஏ’ பிரிவில் ஆஸ்திரேலியா, இங்கிலாந்து அணிகளும், ‘பி’ பிரிவில் அர்ஜென்டினா, நெதர்லாந்து அணிகளும் முதல் இரண்டு இடங்களை பிடித்து அரை இறுதிக்கு முன்னேறின.

இந்திய அணி அரை இறுதி வாய்ப்பை இழந்ததால் 9-வது இடத்துக்கான ஆட்டத்தில் வருகிற 14-ந் தேதி தென் கொரியாவை சந்திக்கிறது.

ஆசிய கோப்பை இறுதிப்போட்டியில் தென் கொரியாவிடம், இந்திய அணி கண்ட தோல்விக்கு பழிதீர்க்கும் என்று எதிர்பார்க்கப்படுகிறது.

உலகக் கோப்பை ஹாக்கி: ஆஸ்திரேலியா சாம்பியன்



உலகக் கோப்பை ஹாக்கி போட்டியில் ஆஸ்திரேலியா 6-1 என்ற கோல் கணக்கில் நெதர்லாந்தை வீழ்த்தி சாம்பியன் ஆனது.

நெதர்லாந்தின் தி ஹேக் நகரில் ஞாயிற்றுக்கிழமை நடைபெற்ற இறுதியாட்டத்தின் 14-வது நிமிடத்தில் நெதர்லாந்தின் ஹெர்ட்ஸ்பெர்கர் கோலடித்தார். இதன்பிறகு ஆட்டம் முற்றிலுமாக ஆஸ்திரேலியா வசமானது. 20-வது நிமிடத்தில் ஆஸ்திரேலியாவுக்கு முதல் கோலை அடித்த கிரில்லோ, 47 மற்றும் 53-வது நிமிடங்களில் மேலும் இரு கோல்களை அடித்து ஹாட்ரிக் சாதனை படைத்தார். ஆஸி.யின் கோவர், டர்னர், டுவையர் ஆகியோர் தலா ஒரு கோலடிக்க 6-1 என்ற கோல் கணக்கில் அபார வெற்றி கண்டது.

தொடர்ந்து 2-வது முறையாக உலகக் கோப்பையை வென்ற ஆஸ்திரேலியா, ஒட்டுமொத்தத்தில் 3-வது முறையாக உலக சாம்பியன் ஆகியிருக்கிறது. 3-வது இடத்துக்கான ஆட்டத்தில் அர்ஜென்டீனா 2-0 என்ற கோல் கணக்கில் இங்கிலாந்தைத் தோற்கடித்தது.

மகளிர் பிரிவு இறுதியாட்டத்தில் நெதர்லாந்து அணி 2-0 என்ற கோல் கணக்கில் ஆஸ்திரேலியாவை வீழ்த்தி சாம்பியன் ஆனது. நெதர்லாந்து உலகக் கோப்பையை வெல்வது 7-வது முறையாகும்.