திரையிசைப் பாடல்களில் செந்தமிழ் இலக்கணம்

pon.sellamuththu · pon.sellamuththu Sun 18 May 2014 - 12:03

. . . .

திரையிசைப் பாடல்களில் செந்தமிழ் இலக்கணம்

திரையிசைப் பாடல்களில் செந்தமிழ் இலக்கணம் என்ற இந்த பகுதியில் முதற்கண் வினா வகைகள் பற்றி பார்ப்போம்.

வினா வகைகள்

வினாக்கள் ஆறுவகைப்படும் என்று நன்னூல் மொழிகின்றது. அறி வினா, அறியா வினா, ஐய வினா, கொளல் வினா,
கொடை வினா, ஏவல் வினா - என்றவாறாக வினாக்கள் ஆறுவகைப்படும்.

அறிவறி…யாமை…………ஐயுறல்….கொளல்கொடை
ஏவல்……...தரும்வினா..ஆறும்…….இழுக்கார்
…………………………………….(நன்னூல் சூத்திரம் 385)

1.அறி வினா

ஆசிரியர் மாணவனை நோக்கி “பதினெண் கீழ்க்கணக்கு நூல்கள் எவை?” என்று வினவுவது அறி வினாவாகும்.
அதாவது ஆசிரியருக்கு பதினெண் கீழ்க்கணக்கு நூல்கள் எவையென்று தெரியும். ஆனால் மாணவன்
அறிந்திருக்கிறானா என்று சோதிக்கும் பொருட்டு மாணவனிடம் ஆசிரியர் இந்த வினாவை எழுப்புகிறார்.

இங்ஙனம் ஒருவர் தாம் ஒரு பொருளை அறிந்திருந்து, அப்பொருள் பிறருக்கு தெரியுமா என்பதை அறிதற்பொருட்டு,
அதனைக்குறித்து பிறரிடம் கேட்பது “அறி வினா” எனப்படும்.

இந்த திரைப்பட பாடல்களில், ஆசிரியை மாணவர்களை நோக்கி வினவும் அறி வினா அமைந்துள்ளது

அறி வினா கொண்டு வரும் பாடல்கள்.

1.பூப்பூவா பூத்திருக்கு (குல விளக்கு)
2.ஒன்றே ஒன்று உலகில் (குருதட்சணை)

2.அறியா வினா

மாணவன் ஆசிரியரை நோக்கி “நெடிலடிக்கு எத்தனை சீர்கள் ஐயா?” என்று வினவுவது அறியா வினாவாகும். மாணவனுக்கு
நெடிலடிக்கு எத்தனை சீர்கள் என்று தெரியாது. அதை அறிந்து கொள்ளும் பொருட்டு ஆசிரியரை நோக்கி அதற்கான
விடையை கேட்டு வினா எழுப்புகிறான்.

இவ்வாறு ஒருவர் தான் அறியாத பொருளை அறிந்து கொள்ளுதல் பொருட்டு பிறரிடம் வினவுவது அறியா வினா எனப்படும்.

அறியா வினா கொண்டு வரும் படல்கள்.

1.என்னதான் பாடுவது நான் எப்படித்தான் ஆடுவது (நாணல்)
2.எந்தக்கடை சேலை இந்த பொண்ணு உடல் மேலே (அதைவிட ரகசியம்)

3.ஐய வினா

“வானத்தில் மேகமூட்டம் மிகுதியாக உள்ளது. மழை வருமா? வராதா?” என்று வினவுவது ஐய வினாவாகும்.

இவ்வாறு ஒருவர் தனக்கு ஐயமாக உள்ள கருத்து அல்லது பொருளைப் பற்றி, அந்த ஐயம் அகலும் பொருட்டு பிறரை வினவுவது
ஐய வினா எனப்படும்.

ஐய வினா கொண்டு வரும் பாடல்கள்.

1.கொடி அசைந்ததும் காற்று வந்ததா காற்று வந்ததும் கொடி அசைந்ததா (பார்த்தால் பசி தீரும்)
2.பூமியை படைத்தது சாமியா இல்லை சாமியை படைத்தது பூமியா (கண்ணன் வருவான்)

4.கொளல் வினா

கடைக்கு சென்று "மஞ்சள் உள்ளதா?" என்று வினவுவது கொளல் வினாவாகும். அதாவது ஒரு பொருளை கொள்ளுதல் பொருட்டு
அப்பொருள் இருக்கிறதா என்று அப்பொருள் இருக்குமிடத்தில் வினவுவதாகும்.

இவ்வாறு ஒரு பொருளை ஒருவர் கொள்ளுதல் பொருட்டு அப்பொருள் இருக்குமிடம் நோக்கி வினவுவது கொளல் வினா எனப்படும்.

கொளல் வினா கொண்டு வரும் பாடல்கள்.

இருக்குதா
அம்மா . . . . . . . . இருக்குதா
அய்யா . . . . . . . .இருக்குதா
படிக்காதவன் . .படிச்சுப்போட்ட
பழசுபட்டு . . . . . பேப்பர்
எதுவும் . . . . . . . .இருக்குதா (தங்கம் மனசு தங்கம்)

5.கொடை வினா

தேர்வு எழுதும் மாணவனைப் பார்த்து ஆசிரியர் "(கூடுதல்) விடைத்தாள் வேண்டுமா?" என்று வினவுவது கொடை வினாவாகும். அதாவது
தேர்வு மையத்தில் தேர்வு எழுதும் மாணவனுக்கு விடைத்தாள் இல்லை என்பதை உணர்ந்து, ஆசிரியர் விடைத்தாள் கொடுப்பதற்காக
கேட்ட கேள்வியாகும்.

இவ்வாறு ஒருவர் ஒரு பொருளை கொடுப்பதன் பொருட்டு, அப்பொருள் இல்லாதவரை பார்த்து வினவுவது "கொடை வினா" எனப்படும்.

1.நன்கு பாடுபவர் ஒருவர் நம்மைப் பார்த்து
பாட்டு வேண்டுமா என்று கொடை வினா
எழுப்புகிறார்.

பாட்டு வேணுமா ஒரு பாட்டு (மோகனசுந்தரம்)

2.இதோ மற்றொருவர் வெற்றி வேண்டுமா என்று
கொடை வினா எழுப்புகிறார்.

வெற்றி வேண்டுமா (எதிர் நீச்சல்)

6.ஏவல் வினா

"கண்ணா இதை நீ செய்து முடிப்பாயா?" என வினவுவது ஏவல் வினாவாகும். இவ் வினாவானது கண்ணனை நோக்கி, ஒரு செயலை செய்து முடிக்கும்படி ஏவுவதற்கு தொடுத்த வினாவாகும்.

இவ்வாறு ஒரு செயலை செய்யும்படி ஏவுதற் பொருட்டு, அச்செயலின் நிகழ்ச்சியைப் பற்றி பிறரை வினவுவது "ஏவல் வினா" எனப்படும்.

1.நினைக்கத் தெரிந்த மனத்தை நோக்கி, மறக்கும்படி ஏவல் வினா தொடுக்கிறாள் இவள்.
நினைக்கத் தெரிந்த மனமே (ஆனந்த ஜோதி)

2.தென்றலை நோக்கி, அதை தூது செல்லும்படி ஏவல் வினா தொடுக்கிறாள் இவள்.
அசைந்தாடும் தென்றலே தூது செல்லாயோ (தாய்க்குப் பின் தாரம்)

( இலக்கணம் இன்னும் வளரும் )

அன்புத் தமிழ் நெஞ்சம் . . பொன். செல்லமுத்து

திரையிசைப் பாடல்களில் செந்தமிழ் இலக்கணம்

திரையிசைப் பாடல்களில் செந்தமிழ் இலக்கணம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக