அசுத்தமான காற்று நிறைந்த நகரங்களில் டெல்லிக்கு முதலிடம்

**சிவா** · **சிவா** Sat 10 May 2014 - 12:42

புதுடெல்லி: உலகில் அசுத்தமான காற்று நிறைந்த அபாயகரமான நகரங்களில் முதன்மையானதாக டெல்லி கண்டறியப்பட்டுள்ளது. உலக சுகாதார நிறுவனம் 1600 நகரங்களில் நடத்திய ஆய்வில் இந்த உண்மை வெளியாகியுள்ளது. டெல்லி மட்டுமில்லாது ராய்ப்பூர், ஆக்ரா போன்றவையும், மிக அசிங்கமான காற்று நிறைந்த நகரங்களாக இருப்பது தெரியவந்துள்ளது. இந்த நகரங்களில் வாழும் மக்கள் புற்றுநோய், மாரடைப்பு, பக்கவாதம் போன்ற ஆபத்துகளுக்கு ஆளாவது அதிகரித்துள்ளதாக புள்ளி விவரங்கள் தெரிவிக்கின்றன. டீசல், பெட்ரோல், வாகனங்களின் எண்ணிக்கை நாளுக்கு நாள் அதிகரித்து வருவது காற்று மாசுக்கு முக்கிய காரணமாக கூறப்படுகிறது.

டெல்லி மற்றும் சுற்றுவட்டார நகரங்களில் பாரம்பரிய தொழிற்சாலைகள் அதிக அளவு இருப்பது காற்று மாசுபாட்டுக்கு முக்கிய காரணமாக கூறப்படுகிறது. டெல்லியில் 1 சதுர மீட்டர் கன அளவு கொண்ட காற்றில் 153 மி.கி. அளவிற்கு சிறு துகள்கள் கலந்து இருப்பதால் அங்குள்ள மக்களின் வாழ்நாள் அளவு குறைந்து வருவதாகவும் ஆய்வு முடிவுகள் தெரிவிக்கின்றன.

இந்தியாவில் கடந்த 2010-ம் ஆண்டில் மட்டும் 6 லட்சத்து 20 ஆயிரம் பேர் முன்கூட்டியே மரணம் எய்தியது புள்ளிவிவரங்கள் மூலம் தெரிய வந்துள்ளது. டெல்லி மட்டுமில்லாது இந்தியாவின் பெரு நகரங்கள் அனைத்திலும் காற்று மாசு அதிகரிப்பதை தடுக்க கடுமையான நடவடிக்கைகள் தேவை என உலக சுகாதார நிறுவனம் வலியுறுத்தியுள்ளது.