ஆப்கானிஸ்தான் அருங்காட்சியகத்தில் புத்தரின் பிச்சை பாத்திரம்

 ஆப்கானிஸ்தான் அருங்காட்சியகத்தில் புத்தரின் பிச்சை பாத்திரம் விசாரணை நடத்த இந்திய அதிகாரிகள் குழு பயணம்



பீகாரில் உள்ள வைஷாலி மக்களுக்காக புத்தர் நன்கொடையாக வழங்கிய பிச்சை பாத்திரம், தற்போது ஆப்கானிஸ்தான் நாட்டின் காபூல் அருங்காட்சியத்தில் வைக்கப்பட்டுள்ளது, அதனை மீட்க நடவடிக்கை எடுக்க வேண்டும் என்று பாராளுமன்றத்தில் கடந்த ஆண்டு ராஷ்டீரிய ஜனதா தள கட்சி தலைவர்கள் வற்புறுத்தினர். வைஷாலியில் இருந்து பெஷாவருக்கு சென்ற இந்த பிச்சை பாத்திரம் இறுதியாக ஆப்கானிஸ்தான் நாட்டில் உள்ள காபூல் மியூசியத்தில் உள்ளதாக அவர்கள் தெரிவித்தனர்.

400 கிலோ எடையுடன் 1.75 மீட்டர் விட்டம் கொண்ட அந்த பிச்சை பாத்திரம் காபூல் மியூசியத்தில் கண்காட்சிக்காக வைக்கப்பட்டு உள்ளது.

இதைத்தொடர்ந்து இந்திய தொல்பொருள் ஆராய்ச்சி கழக அதிகாரிகள் குழு பி.கே.மிஸ்ரா தலைமையில் ஆப்கானிஸ்தான் நாட்டுக்கு நேற்று பயணமானது.

இந்த குழுவினர் புத்தரின் பிச்சை பாத்திரம் பற்றி ஆய்வு செய்து, இந்திய தொல் பொருள் ஆய்வுக்கழகத்துக்கு அறிக்கை தாக்கல் செய்வார்கள் என அதிகாரிகள் தெரிவித்தனர்.

அது புத்தரின் பிச்சைப் பாத்திரம் அல்ல

ஆப்கான் மியூசியத்தில் உள்ள பிச்சைப் பாத்திரம் புத்தர் வைத்திருந்த பிச்சைப் பாத்திரம் அல்ல என்று இந்திய தொல்லியல் ஆய்வுக் கழகம் தெரிவித்துள்ளது.

இந்தியத் தொல்லியல் ஆய்வுக் கழகம் இந்தப் பிச்சைப் பாத்திரத்தை ஆய்வு செய்தபோது, அதில் பொறிக்கப்பட்டுள்ள வாசகங்கள் அரபு மொழியில் உள்ளது என்று தெரியவந்துள்ளது.

புத்தர் காலத்தில் அரபு லிபி இல்லை. மேலும் புத்தரின் போதனைகள் பாலி மொழியிலும் பிராமி லிபியிலும் இருக்கும்.

ஆனால் இந்த 400 கிலோ எடையுள்ள பிச்சைப் பாத்திரத்தில் உள்ள வாசகங்கள் அராபிய லிபியில் எழுதப்பட்ட பெர்சிய மொழி வாசகங்கள் என்று தொல்லியல் ஆய்வுக் கழகம் தெரிவித்துள்ளது.

கி.பி.5-ஆம் நூற்றாண்டின் போதுதான் அரபு எழுத்துக்கள் தோன்றின. ஆனால் புத்தர் வாழ்ந்த காலம் கி.மு.2 அல்லது 3ஆம் நூற்றாண்டு என்று கூறப்படுகிறது. எனவே இந்தப் பிச்சைப் பாத்திரத்தில் உள்ள போதனைகள் புத்தருடையதாக இருக்க வாய்ப்பில்லை என்று கூறப்படுகிறது.

சர்ச்சையின் பின்புலம்

முன்னாள் ராஷ்ட்ரிய ஜனதா தள எம்.பி. ரகுவன்ஷ் பிரசாத், இந்தப் பிச்சைப் பாத்திரம் உண்மையில் பீகாரில் உள்ள வைசாலியைச் சேர்ந்தது என்று ஆரம்பித்து வைத்தார்.

நாடாளுமன்றத்தில் இந்த விவகாரத்தை அவர் கிளப்பியபோது, பகவான் புத்தர் நிர்வாண நிலையை அடைவதற்குச் செல்லும்போது வைஷாலி மக்களிடம் பிச்சைப் பாத்திரத்தைக் கொடுத்தார் என்று வாதாடினார்.

அதன் பிறகு இந்தப் பிச்சைப் பாத்திரம் படையெடுத்தவர்கள் இதனை இப்போதைய பெஷாவருக்கு எடுத்துச் சென்றதாகவும் இது குறித்து நிறைய வரலாற்றாசிரியர்கள் எழுதியுள்ளதாகவும் அவர் வாதாடினார்.

ஆகவே ஆப்கானில் இருக்கும் அந்தப் பிச்சைப் பாத்திரத்தை இந்தியாவுக்குக் கொண்டு வரவேண்டும் என்று அவர் வலியுறுத்தினார்.

இந்தப் பின்னணியில்தான் இந்திய தொல்லியல் ஆய்வுக் கழகம் இந்த ஆய்வை மேற்கொண்டு முடிவை வெளியிட்டுள்ளது.