சிவகங்கைக்கு வாருங்கள்: மன்மோகனுக்கு அழைப்பு

காங்கிரஸ் தலைவர் சோனியா, துணைத் தலைவர் ராகுல் மட்டுமே, தேர்தல் பிரசார களத்தை, வலம் வந்து கொண்டிருக்கும் நிலையில், பிரதமர் மன்மோகன் சிங்கையும் பிரசாரத்தில் இறங்கி விட, காங்கிரஸ் தலைமை முடிவு செய்துள்ளது. அதன் படி, தமிழகத்தில் சிவகங்கை உட்பட, நாடு முழுவதும், 32 தொகுதிகளில் அவர் பிரசாரம் செய்ய உள்ளார்.

மூன்று பிரசார கூட்டங்களில்...:

கடந்த, 2009 லோக்சபா தேர்தலில், பிரதமர் மன்மோகன் சிங்கை முன்னிறுத்தி, காங்கிரஸ் பிரசாரம் செய்தது. அதனால் அந்த தேர்தலில், மன்மோகன் சிங் நாடு முழுவதும் சுற்றுப்பயணம் மேற்கொண்டு, காங்கிரஸ் வேட்பாளர்களை ஆதரித்து, மக்களிடம் ஓட்டு சேகரித்தார். இந்த முறை, அவர் பிரதமர் பதவிக்கு போட்டியிடுவதில்லை என, ஒதுங்கிக் கொண்ட நிலையில், தேர்தல் களத்திலும் அவர் சந்தடி இல்லாமல் இருந்து வருகிறார். காங்கிரஸ் சார்பில், சோனியாவும் ராகுலும், நாடு முழுவதும் சுற்றுப்பயணம் மேற்கொண்டு வருகின்றனர்.

கடந்த வாரம் நடைபெற்ற காங்கிரஸ் பிரசாரக்குழு கூட்டத்தில், பிரதமரையும் நாடு முழுவதும் சுற்றுப்பயணம் செய்ய வைப்பது என, முடிவெடுக்கப்பட்டது. தேர்தல் துவங்கியதில் இருந்து, மூன்றே மூன்று தேர்தல் பிரசார கூட்டங்களில் மட்டுமே, மன்மோகன் சிங் பங்கேற்றுள்ளார்.

ஆதரவாக பிரசாரம்:

கட்சி மேலிடம் எடுத்துள்ள முடிவை அடுத்து, நாடு முழுவதும் சுற்றுப்பயணம் மேற்கொள்ள உள்ளார். தேர்தல் முடிவடைய இன்னும், 20 நாட்களே உள்ள நிலையில், 'பிரதமரை பயன்படுத்திக் கொள்ளுங்கள்' என, காங்கிரஸ் தலைமை தகவல் கொடுத்தவுடன், 32 இடங்களில் இருந்து பிரதமருக்கு அழைப்புகள் வந்துள்ளன. பஞ்சாப் மாநிலத்தில், அமிர்தசரஸ் தொகுதியில், பா.ஜ., மூத்த தலைவர் அருண் ஜெட்லியை எதிர்த்து, காங்கிரஸ் சார்பில் போட்டியிடும் அம்ரிந்தர் சிங், பிரதமருக்கு அழைப்பு விடுத்து, தனக்கு ஆதரவாக பிரசாரம் மேற்கொள்ள கேட்டுள்ளார்.

இதே போல், மத்திய அமைச்சர் அம்பிகா சோனியும் அழைப்பு விடுத்துள்ளார். தமிழகத்தில், நிதியமைச்சர் சிதம்பரம் சார்பில், பிரதமருக்கு அழைப்பு வந்துள்ளது. அவர் மகன் கார்த்தி சிதம்பரத்திற்காக, சிவகங்கை தொகுதிக்கு வந்து, தேர்தல் பிரசாரம் மேற்கொள்ளும் படி, சிதம்பரம் அழைத்துள்ளார். இவர்களைப் போல், காங்கிரஸ் பிரபலங்கள் பலரும் மன்மோகன் சிங்கிற்கு, அழைப்பு விடுத்துள்ளதாக, பிரதமர் அலுவலக வட்டாரங்கள், டில்லியில் தெரிவித்தன.

[thanks] தினமலர் [/thanks]